Дунэе форумым хэлажьэх
Адыгэ къэралыгъо университетым истудентхэр «Шаг в будущее» зыфиIорэ дунэе форумым хэлажьэх.
Ар анахь Iофтхьэбзэ инхэм ащыщ. Ушэтыным дэлэжьэрэ ныбжьыкIэ миным ехъу ащ хэлажьэ. Ахэр Европэм икъэралыгъуи 10-мэ, Азием, Африкэм ыкIи Урысые Федерацием исубъект 65-мэ ялIыкIох. Ахэм ахэтых Адыгэ къэралыгъо университетым истудентхэу Ангелина Деленьян, Гедыоджэ Джанетэ ыкIи Хьашъхъо Данэ. Форумым хэлэжьэщтхэм якъыхэхын фэгъэхьыгъэ зэнэкъокъум мыхэм яIофшIэнхэм текIоныгъэр къыщыдахыгъ.
Форумым иэкспертнэ комиссие проект анахь дэгъухэр къыхихыгъэх. Аужырэ уцугъом шъолъыр 50-мэ ащызэхащэгъэ зэнэкъокъухэм ныбжьыкIэ мин 16 ахэлэжьагъ.
Адыгеим икIыгъэхэм «Особенности проявления социально-личностной жизнеспособности одаренных подростков» зыфиIорэ IофшIэнымкIэ заушэтыгъ ыкIи экспертнэ комиссием къыхигъэщи, «Социология коммуникаций» зыфиIорэ секцием рахьылIагъ.
Пшъэшъэжъыехэр зыгъэхьазырыгъэхэр Адыгэ къэралыгъо университетым ипрофессорэу, докторэу Мария Паатовар ары. Экспериментальнэ IофшIэныр республикэ естественнэ-хьисап еджапIэм ыкIи шъолъыр гупчэу «Полярис-Адыгея» зыфиIорэм ащыкIуагъ. Ушэтыным илъэс 14-м къыщегъэжьагъэу 18-м нэс зыныбжь ныбжьыкIи 109-рэ хэлэжьагъ.
Шъугу къэдгъэкIыжьын, дунэе форумым иочнэ уцугъо гъэтхапэм и 27-м къыщегъэжьагъэу и 31-м нэс Москва щыкIощт. Шъолъырхэм текIоныгъэр къащыдэзыхыгъэхэр ары мыщ къекIолIагъэхэр. Сэнаущыгъэ ин зыхэлъ кIэлэеджакIохэр, кадетскэ корпусым ыкIи суворовскэ училищым ащеджэхэрэр, колледжхэм, техникумхэм, яапшъэрэ еджапIэхэм апэрэ курсхэм ащеджэхэрэр мыщ хэлажьэх.
Москва дэт къэралыгъо техническэ университетыр ыкIи Урысые ныбжьыкIэ политехническэ обществэр Iофтхьабзэм кIэщакIо фэхъугъэх. Адыгэ къэралыгъо университетым ипресс-къулыкъу