КIэлэцIыкIухэм апае зэхащэгъэ шъолъыр олимпиадэу «Юный ­правовед» зыфиIорэм изэфэхьысыжьхэр мы мафэхэм къэнэфагъэх. Адыгэ къэралыгъо университетым итарихъ факультет къызызэ­Iуахыгъэр илъэс 30 зэрэхъурэм ар фэгъэхьыгъагъ. КIэлэеджэкIо 58-рэ ащ хэлэжьагъ.

Iофтхьабзэм изэхэщэн­кIэ АР-м гъэсэныгъэмрэ шIэныгъэмрэкIэ и Министерствэ IэпыIэгъу къа­фэхъугъ. Юриспруденциер зышIогъэшIэгъонхэр къыхэгъэщыгъэнхэр ары пшъэрылъ шъхьаIэу зэ­хэщакIохэм зыфагъэуцу­жьыгъэр.

Олимпиадэр сыхьатищым къыкIоцI кIуагъэ. Я 9 — 11-рэ классхэм аще­джэхэрэм ыпэрапшIэу тест шIыкIэм тетэу IофшIэнхэр агъэцэкIагъэх, джащ фэдэу творческэ екIолIакIэри къызфагъэфедагъ. Ахэр анахьэу конституционнэ, гражданскэ, унэгъо, Iоф­шIэн, уголовнэ, админист­ративнэ правэм афэгъэ­хьыгъагъэх.

ОсэшIхэм зэрагъэнэ­фагъэмкIэ, ныбжьыкIэхэм мы лъэныкъомкIэ шIэныгъэ дэгъухэр яIэх. ТекIоныгъэр ыкIи хагъэунэфыкIырэ чIыпIэхэр къызы­фагъэшъошагъэхэр 2023-рэ илъэсым тарихъ факультетым чIэхьанхэм пае балли 3 тедзэу къафа­шIыщт.

Мы олимпиадэр илъэс къэс зэхащэнэу агъэнафэ ыкIи ащ хэлажьэхэрэм япчъагъэ хагъэхъощт.

Адыгэ къэралыгъо университетым ипресс-къулыкъу