Адыгеим и ЛIышъхьэу КъумпIыл Мурат хэлэжьагъ Урысые Федерацием ишъолъыр­хэм яхэхъоныгъэ­кIэ Правительствэ комиссием и Президиум изэхэсыгъоу щыIа­гъэм.

Урысыем и Правительствэ и Тхьаматэ игуадзэу Марат Хуснуллиным видеоконференцие шIыкIэм тетэу ар зэрищагъ. Бюджет кредитхэм яшIуагъэкIэ зэшIуахырэ инфраструктурнэ проектхэм япхырыщынкIэ Iофыгъоу къэуцугъэхэм ащ щахэп­лъагъэх.

Урысые Федерацием и Вице­премьерэу Марат Хуснуллиным анахьэу ынаIэ зытыригъэтыгъэр инфраструктурэм ихэхъоныгъэ­кIэ пшъэрылъэу къэуцугъэхэр ары. Урысые Федерацием и Президентэу Владимир Путиным къыгъэуцугъэ пшъэрылъхэм ащыщых инженер, социальнэ, гъогу ыкIи транспорт инфраструктурэмкIэ, унэ-коммунальнэ хъызмэтым къыхиубытэрэ псэуа­лъэхэр гъэкIэжьыгъэн­хэмкIэ Iофыгъоу къэуцугъэхэр. Ана­хьэу анаIэ зытырадзагъэхэм ащыщых зэхэтэкъоным нэсыгъэ унэхэм ачIэсхэр къачIэщыжьыгъэнхэр, программакIэм къыдилъытэрэ Iофхэр ащкIэ зэшIохыгъэнхэр. ИпIалъэм къыпэу программэм къыдилъытэрэ пшъэрылъхэр зыгъэцэкIагъэхэм Адыгеир ащыщ, ащ дакIоу етIани программакIэ а лъэныкъомкIэ зэхагъэуцуагъ.

«2017-рэ илъэсым щылэ ма­зэм и 1-м нэс зэхэтэкъоным нэсыгъэ унэжъкIэ алъытагъэхэм цIыфхэр къачIэщыжьыгъэнхэм епхыгъэ Iофтхьабзэхэр ипIа-лъэм къыпэу зэрэзэшIуахы­гъэ­хэм къы­хэкIэу шъолъыр зау­лэмэ программакIэм ипхырыщын рагъэжьэн алъэкIыгъ. Непэ штабым изэхэсыгъо къызэрэщаIуагъэмкIэ, 2023-рэ илъэсымкIэ программакIэм къызэрэдилъытэрэм тетэу лимитхэр шъолъыр 14-мэ атегощэгъэным дырагъэштагъ. ПстэумкIи сомэ миллиард 22,5-рэ фэдиз мылъку IэпыIэгъур зэрэ­хъу­рэр. ПрограммакIэм игъэ­цэкIэн тапэкIэ ыуж ихьэгъэгъэ шъолъырхэм джыри шъолъыри 5 ахэхьан алъэ­кIыщт. Ахэр: Адыгэ Респуб­ликэр, Калмыкиер, Камчатскэ краир, Астраханскэ ыкIи Воронеж хэ­кухэр. Унашъоу аштагъэм амал къытыщт зэхэтэкъоным нэ­сыгъэ унэ квадрат метрэ мин 418,8-рэ фэдизмэ 2023-рэ илъэсым цIыфхэр къачIащыжьынхэу. 2022-рэ илъэсым щылэ мазэм и 1-м нэс зэхэтэ­къоным нэ­сыгъэ псэупIэкIэ алъытэгъагъэхэр ары ащ къыхиубытэхэрэр. Прог­раммэм изэшIохын амал къытыгъ зэтегъэпсыхьэгъэ псэупI­акIэхэр зыгъотыгъэ цIыфхэм япчъагъэ нахьыбэ хъунэу», — къыIуагъ Марат Хуснуллиным.

Адыгеим и ЛIышъхьэ къызэрэхигъэщыгъэмкIэ, бюджет къэкIуапIэхэр нахь шIогъэ ин хэлъэу гъэфедэгъэнхэмкIэ, УФ-м и Президент ипшъэ­рылъхэр гъэ­цэкIагъэ хъунхэмкIэ рес­публикэм ищыкIэгъэ амалхэр зэкIэ агъэ­федэх. Анахьэу анаIэ зы­тырагъэтырэр цIыфхэм ящыIакIэ нахьышIу шIы­гъэныр къыдэзы­лъытэрэ социальнэ програм­мэхэр ары.

«Тэ зыуж титыр социальнэ пшъэрылъхэр зэкIэ гъэцэкIагъэ хъунхэм иза­къоп, республикэм псын­кIэу хэхъоныгъэ ышIыным пае кIэгъэгушIун амалхэри гъэфедэгъэнхэр ары. Гущы­Iэм пае, илъэситIукIэ узэ­кIэIэбэжьмэ зэхэтэкъоным нэсыгъэ унэхэм цIыфхэр къачIэщыжьыгъэнхэм тегъэпсыхьэгъэ программэр ипIалъэм къыпэу гъэцэ­кIагъэ хъуным епхыгъэ пшъэрылъхэр зыфэтшIы­жьыгъэх. А пшъэрылъыр зэшIотхыгъ. Ары пакIошъ, илъэсэу икIыгъэм проценти 103-м нэсэу ар дгъэцэкIагъэ, зэхэтэкъоным нэсыгъэ псэупIэ квадрат метрэ 8000-м къачIэт­щыжьыгъэхэм псэупIакIэ ядгъэгъотыгъ. НэмыкIэу къэпIон хъумэ, 2017-рэ илъэсым щылэ мазэм и 1-м нэс зэхэтэкъоным нэ­сыгъэ унэкIэ алъытэгъа­гъэхэм япхыгъэ программэр зэрэпсаоу Адыгеим щыгъэцэкIагъэ хъугъэ», — къыIуагъ КъумпIыл Мурат.

Адыгеим и ЛIышъхьэ къызэрэхигъэщыгъэмкIэ, 2017-рэ илъэсым щылэ мазэм и 1-м ыуж ащ фэдэ фондым цIыфхэр къычIэщыжьыгъэнхэм ипрограммэу республикэм щызэхагъэуцуагъэм мыхэр къыделъытэх: непэкIэ ащ фэдэ унэжъхэм квадрат метрэ мин 37-рэ аубыты, нэмыкIэу къэпIон хъумэ фэтэрыбэу зэхэт унэ 69-рэ мэхъух, нэбгырэ 2228-рэ фэдиз ахэм ащэпсэу.

Зэхэубытагъэу къэпIон хъумэ, сомэ миллиарди 3,4-рэ фэдиз ахэм ягъэ­кощын пэIухьащт. «Фонд развития территорий» зы­фиIорэ комиссиеу зэха­щагъэм къызэритыгъэмкIэ, 2023 — 2024-рэ илъэсхэм ателъытэгъэ программэр зэшIохыгъэным пае Адыге­им мылъку IэпыIэгъумкIэ Фондым къикIынышъ сомэ миллион 551,3-м ехъу къы­IэкIэхьащт, республикэм имылъкоу сомэ миллион 295-рэ фэдиз ащ хэхьащт. ЗэрэхъурэмкIэ, 2024-рэ илъэсым ыкIэм нэс зэхэтэкъоным нэсыгъэ псэу­пIэхэу квадрат метрэ мини 8,9-рэ фэдизмэ цIыфхэр къачIащыжьынхэ амал яIэщт. Сомэ миллион 346-рэ фэдиз ащ пэIухьащт.

Адыгэ Республикэм и ЛIышъхьэ ипресс-къулыкъу