Саугъэт зэхэтышхоу «Курскэ заор» зыфиIоу Курскэ хэкум ит Поныровскэ районым щагъэуцурэм ишIын лъагъэкIуатэ. Ащ иапэрэ чэзыу 2023-рэ илъэсым шышъхьэIум и 20-м къызэIуахынэу агъэнафэ.

А мафэм хагъэунэфыкIыщт Курскэ дэжь щыкIогъэ заом текIоныгъэр къызыщыдахыгъэр илъэс 80 зэрэхъурэр. Адыгеим щыпсэухэу  Хэгъэгу зэошхом хэлэжьагъэхэм яшIэжь зыгъэлъэпIэрэ пстэуми саугъэт зэхэтышхом ишIын яIахь хашIыхьан алъэкIыщт.

– Саугъэтым къыткIэхъухьэрэ лIэужхэмкIэ тарихъ мэхьанэ иIэщт. Мамыр щыIакIэ тиIэу, шъхьафитэу тикъэкIощт уахътэ тыщыпсэуным фэбэнэгъэ дзэкIолIхэм яшIэжь дгъэлъэпIэныр тихэгъэгу щыпсэурэ пстэуми япшъэрылъ.  Хэти ыгу пыкIырэ ахъщэр саугъэтым ишIын пэIуигъэхьан ылъэкIыщт. АщкIэ Хэгъэгу зэошхом хэлэжьагъэхэм зэрахьэгъэ лIыхъужъныгъэм, лIыблэнагъэм шъхьащэ фэтшIыщт, - къыщаIуагъ Курскэ хэкум хэхъоныгъэ ышIынымкIэ Фондым.

Урысые информационнэ къэбарлъыгъэIэс «УФ-м и ТекIоныгъ» зыфиIорэм къызэритыгъэмкIэ, мэшIоку къэуцупIэу «Поныри» зыцIэм къыпыщылъ гектар 80-м зэрэтефэу саугъэт зэхэтышхор щагъэпсыщт. А чIыпIэм дэжь тидзэхэм яухъумапIэу Iутыгъэр вермахтым идзэхэм зэхакъутэнышъ, Москва екIурэ гъогур къызэIуахын гухэлъ яIагъ.

Курскэ щыкIогъэ зэпэуцужьым (1943-рэ илъэсым бэдзэогъум и 5-м – шышъхьэIум и 25-м нэс) нэмыц дивизие 30 тидзэхэм щызэхагъэтэкъуагъ. УкIыгъэу, уIагъэу ыкIи гъэрэу аштэгъэ нэбгырэ мин 500-м ехъу пыим чIэнагъэ ышIыгъ. Ти Дзэ Плъыжь чIэнагъэ ышIыгъэ нэбгырэ мин 860-м ехъурэм щыщэу нэбгырэ мин 255-р зыдэхъугъэхэр амышIэу кIодыгъэх.

Курскэ заом нэмыц-фашист дзэхэр зыщызэхагъэтэкъогъэ мафэр Урысыем дзэ щытхъум и Мафэу щыхагъэунэфыкIы.

2022-рэ илъэсым бжыхьэм саугъэт зэхэтышхоу агъэпсыщтым ипроект къыхэхыгъэнымкIэ дунэе зэнэкъокъоу зэхащэгъагъэм икIэух зэфахьысыжьыгъ. ТекIоныгъэр  архитекторэу Константин Фоминым къыдихыгъ. УФ-м и Президентэу Владимир Путиным иунашъокIэ Урысые дзэ-тарихъ обществэмрэ Курскэ хэкум иадминистрациерэ зэгъусэхэу саугъэтым ишIын дэлажьэх.

Ахъщэр зэрэжъугъэхьын шъулъэкIыщтыр Банкым имобильнэ едзыгъокIэ QR-кодыр иотхэ. Реквизитхэр: Курское отделение № 8596 ПАО «Сбербанк» № счета 40703810933000000417 ИНН 4632253162 БИК 043807606