АР-м и Правительствэ и Тхьаматэ игуадзэ щагъэнэфагъ, социальнэ мэхьанэ зиIэ хэбзэгъэуцугъэхэм, джэпсалъэхэм щатегущыIагъэх, щаштагъэх непэ АР-м и Къэралыгъо Совет — Хасэм зичэзыу я XXII-рэ зэхэсыгъоу иIагъэм.

Ащ хэлэжьагъэх Адыгеим и ЛIышъхьэу КъумпIыл Мурат, Адыгеим иминистрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, министрэхэм я Кабинет хэтхэр, федеральнэ ыкIи республикэ ведомствэхэм, къулыкъухэм ялIыкIохэр, нэмыкIхэр. Зэхэсыгъор зэрищагъ Парламентым и Тхьаматэу Владимир Нарожнэм.

Пстэумэ апэу АР-м иминистрэхэм я Кабинет и Тхьаматэ игуадзэ агъэнэфагъ. Мы IэнатIэм Iугъэхьэгъэнэу АР-м и ЛIышъхьэ къыгъэлъэгъуагъ нахьыпэкIэ Адыгэкъалэ иадминистрацие ипащэщтыгъэу ЛIыхэсэ Махьмудэ икандидатурэ. КъумпIыл Мурат гущыIэр зештэм, респуб­ликэм экономикэ хэхъоныгъэмкIэ иминистрэ, етIанэ Адыгэ­къалэ имэр IэнатIэхэм защыIутыгъэ илъэсхэм ипшъэрылъхэр хэзыгъэ имыIэу зэригъэцэкIэщтхэр къызэригъэлъэгъуагъэр, лъэныкъо зэфэшъхьафхэмкIэ Iофыгъуабэ зиIэгъэ къалэм хэ­хъоныгъэу фэхъугъэхэр зэ­рэ­нэрылъэгъухэм, федеральнэ гупчэм, республикэм къатIупщыгъэ мылъкур зэрищыкIагъэм тетэу зэригъэфедагъэр ащ къы­зэриушыхьатырэм, а зэпстэумэ тапэкIи ащ тетэу Iоф ышIэнэу цыхьэ зэрэфыуагъэшIырэм къы­кIигъэтхъыгъ.

— ЛIыхэсэ Махьмудэ ипшъэ­рылъхэр шIуагъэ къытэу зэригъэцэкIэщтым сицыхьэ телъ. ТапэкIэ къиныгъохэр къызэпытчышъун ыкIи цIыфхэр къызэ­рэтщыгугъыхэрэр къэдгъэ­шъып­къэжьын фае, — къыIуагъ Адыгеим и ЛIышъхьэ.

Республикэм ипащэ къызэриIуагъэмкIэ, ЛIыхэсэ Махьмудэ экономикэм, инвестициехэм япхыгъэ Iофхэр, индустриальнэ паркэу поселкэу Инэм дэжь щырагъэжьагъэм ишIын, мэкъумэщ хъызмэтыр ары ана­хьэу зыфэгъэзэгъэщтыр.

Депутатхэм зэIухыгъэ шIыкIэм тетэу амакъэхэр атыхи, ЛIыхэсэ Махьмудэ мы IэнатIэм IухьанымкIэ дырагъэштагъ.

Федеральнэ гупчэм фэгъэзэгъэ джэпсалъэу агъэхьазырыгъэхэми мы зэхэсыгъом щатегущыIагъэх. Ахэр щы мэхъух. ТIур УФ-м и Правительствэ ипащэ игуадзэу Марат Хуснуллиным фэгъэзагъэх. КIэлэцIыкIу ибэхэм ыкIи лъыплъэн зимыIэу къэнагъэхэм псэупIэ ятыгъэным фэшI Адыгеим ахъщэ IэпыIэгъу къыфыхагъэкIыным, унэгъо ныб­жьыкIэхэм псэукIэ амалэу яIэр нахьышIу шIыгъэным апае социальнэ ахъщэ тын афэтIупщыгъэным шапхъэу пылъхэм зэ­хъо­кIыныгъэхэр афэшIыгъэнхэм ахэр афэгъэхьыгъэх.

Урысые Федерацием и Правительствэ и Тхьаматэ игуадзэу Андрей Белоусовым фэгъэзэгъэ джэпсалъэр бюджетым къыхэ­хыгъэ кредитыр ары зыфэгъэ­хьыгъэр.

АР-м хэгъэгу кIоцI IофхэмкIэ и Министерствэ блэкIыгъэ илъэсым Iофэу ышIагъэм фэ­гъэхьыгъэ докладэу ащ ипащэу Олег Безсмельницыным къы­шIыгъэми депутатхэр едэIугъэх. Ащ къызэриIуагъэмкIэ, пшъэ­рылъхэр зэкIэ агъэцэкIагъэх. ГъэрекIо Адыгеим пстэумкIи бзэджэшIэгъэ 4388-рэ щызэрахьагъ, ар 2021-м агъэунэ­фыгъагъэм нахь макI.

АР-м и ЛIышъхьэ хэгъэгу кIоцI IофхэмкIэ Министерствэм къулыкъу щызыхьыхэрэм зэрафэразэр къыхигъэщызэ, тапэкIи къэгъэлъэгъонхэм къа­щамыгъэкIэнэу зэращыгугъы­хэрэм къыкIигъэтхъыгъ.

— Ведомствэм муниципалитетхэмрэ псэупIэ койхэмрэ Iоф адишIэным, нэмыкI къулыкъоу щынэгъончъэным фэгъэзагъэхэм зэпхыныгъэ адыриIэу адэлэжьэным мэхьанэшхо иI. А зэпстэур цIыфхэм хабзэм цыхьэ фашIыным, инвестиционнэ политикэм, экономикэм, социальнэ Iофхэм алъэныкъокIэ проектхэр пхырыщыгъэнхэм фэIорышIэх, — къыIуагъ КъумпIыл Мурат.

ЧIыгу зэфыщытыкIэхэм, бжьэхъуным, административнэ хэукъоныгъэхэм, муниципальнэ къулыкъум, муниципальнэ образованиехэм ядепутатхэм яхэдзынхэм, зэгъэшIужь хьыкумышIхэм яIофшIэн, социальнэ фондым къыхэхыгъэ псэупIэхэм ятын, АР-м ис лъэпкъ зэфэшъхьафхэм яныдэлъфыбзэ, машIохэр щынэгъончъэнхэм, нэмыкIхэм афэгъэхьыгъэ хэбзэ­гъэуцугъэхэм зэхъокIыныгъэхэр афэшIыгъэнхэм фэгъэхьыгъэ законопроектхэри, законхэри мы зэхэсыгъом апэрэ ыкIи ятIонэрэ еджэгъухэмкIэ ща­штагъэх.

Тэхъутэмыкъое районымкIэ Афыпсыпэ псэупIэ коим, Теуцожь районымкIэ Пэнэжьыкъое псэупIэ коим янароднэ депутатхэм ясоветхэр кIэщакIо фэ­хъугъэхэу, поселкэу «Кубанстроир» «КубаньстройкIэ» гъэтэрэзыжьыгъэным, къуаджэу Нэ­чэрэзые ыцIэ урысыбзэкIэ непэ «НачерезийкIэ» атхымэ, «Нечерезий» шIыжьыгъэным мы зэхэсыгъом щытегущыIэхи ахэр игъохэу алъытагъ.

Джащ фэдэу ЕмтIылъ Оскар Мыекъопэ районым ихьыкумышI участкэу N 3-м, Цэй Заремэ мы муниципальнэ образование дэдэм иучасткэу N 2-м язэгъэ­шIужь хьыкумышIхэу гъэнэфэгъэнхэм депутатхэм дырагъэштагъ, Андрей Скобченкэр,

Устэ Тимур, Жадэ Зарыет ыкIи Сэкурэ Муртаз АР-м ихьыкумышIхэм яквалификационнэ коллегие хагъэхьагъэх.

ХЪУТ Нэфсэт.