Адыгеим джырэ уахътэм къэралыгъо IэпыIэ­гъум ишIуагъэкIэ ежь иIоф къызэIузыхы зы­шIоигъохэу ар къызыдэхъухэрэм, зиIоф зезы­гъэушъомбгъухэрэм япчъагъэ щыхэхъо. Ащ пае шIыкIэ зэфэшъхьафхэр щагъэфедэх. Ахэм ащыщ къызIэкIэзыгъэхьагъэу ХьацIыкIу Маринэ къэралыгъо IэпыIэгъум ишIуагъэкIэ исатыу зызэриушъомбгъугъэр къытфиIотагъ.

Маринэ хэтэрыкI ыкIи пхъэшъхьэ-мышъхьэ, шхыныгъо зэ­фэшъхьафхэм ящэн тегъэпсы­хьэгъэ тучан Мыекъуапэ къыщызэIуихыгъэу егъэлажьэ. Ти­чIыналъэ къыщагъэкIыхэрэр бэу ащ чIэлъых. ИIоф нахь зегъэу­шъомбгъугъэным пае ащ джыри мылъку ищыкIагъэ хъугъэ. ШIыкIэ пстэоу IэпыIэгъумкIэ щыIэр зызэрегъэшIэ нэуж къыхихыгъэр анахьэу къыфэфедэщтыр ары — процент мыин зыпылъ ахъщэ чIыфэ Гупчэу «Мой бизнес» зыфиIорэмкIэ къаIихыгъ.

— Ащ фэдэ амалышIу зэрэщыIэр сэзыгъэшIагъэхэр сиIа­хьылхэу джащ фэдэу «Мой бизнес» зыфиIорэм ифэIо-фа­шIэхэр зыгъэфедэнэу игъо ифа­гъэхэр ары. Джащ пае Гупчэм зызыфэсэгъазэм сицыхьэ те­лъыгъ зишIуагъэ къысэкIыщт IэпыIэгъу ащ зэрэщызгъотыщтым. Джаущтэуи хъугъэ. Ана­хьэу тигопагъэр къэралыгъо IэпыIэгъоу щыIэ пстэуми афэгъэхьыгъэу игъэкIотыгъэу Гуп­чэм иIофышIэ къызэрэтфиIо­тагъэр ары. Ащ лъэшэу ишIуагъэ къытэкIыгъ пстэури тэрэзэу итхъухьанымкIэ, — къытфиIотагъ ХьацIыкIу Маринэ. Мылъкоу къырихыгъэмкIэ Маринэ ыщэхэрэм язэмлIэужыгъуагъэ хигъэхъон ыгу хэлъ, оборудованиякIэ ыщэфыгъэу джы егъэуцу. СатыушIэм къызэрэхигъэщыгъэмкIэ, къэралыгъо IэпыIэгъум ишIуагъэкIэ иIоф зыригъэушъомбгъущт, джыри зы тучан къызэIуихын ыгу хэлъ.

Шъугу къэдгъэкIыжьын, «Мой бизнес» зыфиIорэ гупчэр лъэпкъ проектэу «Предпри­нимательствэ цIыкIумрэ гурытымрэ IэпыIэгъу ягъэгъотыгъэныр» зыфиIорэм къыдыхэлъытагъэу зэхащагъ. ЗиIоф зызыу­шъомбгъухэрэм ямызакъоу езы­­гъажьэ зышIоигъохэми мыщ IэпыIэгъу щарагъэгъоты. ЗэшIуа­хыхэрэм ащыщ мылъку IэпыIэгъоу кредитхэр зытырэ организациехэм апеон зылъэкIыхэрэм ятын. ГущыIэм пае, кредит цIыкIухэм яштэн илъэс уасэу пылъым хагъэкIи, проценти 4 — 7-м нагъэсыгъ.

ЗэкIэмкIи гъэрекIо сатыу цIы­кIумрэ гурытымрэ ахъщэ Iэ­пыIэгъоу сомэ миллион 600 афатIупщыгъ. Ащ ишIуагъэкIэ предпринимательхэм IофшIэпIэ чIыпIэхэр къызэтырагъэнэнхэ ыкIи 100-м ехъу кIэу къызэIуа­хынхэ алъэкIыгъ.

Къэралыгъо IэпыIэгъум ипхырыщынкIэ зишIуагъэ анахьэу къакIорэр Адыгеим предпринимательствэм IэпыIэгъу егъэгъо­тыгъэнымкIэ и Фонд ары. Мы къулыкъумкIэ сатыушIэхэмрэ зиIоф езыгъэжьэгъакIэхэмрэ ящыкIэгъэ IэпыIэгъу пстэури арагъэгъоты. Гупчэу «Мой бизнес» зыфиIорэм къызэрэщытаIуагъэмкIэ, зэкIэмкIи 2022-рэ илъэсым фэгъэкIотэн зыхэлъ чIыфэ цIыкIу 230-у сомэ миллион 500-м ехъу зыпэIухьагъэр атыгъ, мы пчъагъэм щыщэу 46-р «самозанятэкIэ» заджэхэрэр арых, сатыу цIыкIу ыкIи гурыт зиIэ нэбгырэ 500-м ехъумэ упчIэжьэгъу афэхъугъэх, Iоф­шIэпIэ чIыпIэ 806-рэ къызэтырагъэнагъ, 107-рэ кIэу къызэ­Iуахыгъ.

Джащ фэдэу Гупчэм программэу «Бизнесым зегъэушъом­бгъугъэныр» зыфиIорэм къыдыхэлъытагъэу Iофтхьабзэхэр щырагъэкIокIых.

Сатыу цIыкIум псынкIэу хахъо егъэшIыгъэныр — хэушъхьафыкIыгъэ программэу компание цIыкIухэм зягъэушъомбгъугъэным телъытагъ ыкIи Урысыем ишъолъырхэм япредпринимательхэм шъхьагъырытхэр яIэхэу бизнес иным ыкIи корпоративнэм Iоф адягъэшIэгъэным тегъэпсыхьагъ, джащ фэдэу федеральнэ компанием ушэтын зэзэгъыныгъэ дэшIыгъэным иамал къеты.

Джащ фэдэу къихьащт мэлылъфэгъу мазэм и 12-м Адыге­им ипредпринимательхэм амал яIэщт гъэсэныгъэ платформэу сатыу цIыкIум псынкIэу хахъо егъэшIыгъэным тегъэпсыхьа­гъэм (Акселератор роста малого биз­неса) очнэ шIыкIэкIэ хэ­лэжьэн­хэу. Мыекъуапэ щыкIощт Iоф­тхьабзэм Акселераторым иегъэ­джакIоу Олеся Ушаковам къыщи­Iотэщт ежь иIоф къызэIуихынэу зэрэхъугъэр ыкIи федеральнэ бэдзэрым зэрихьэгъэ шIыкIэр.