Мыгъэрэ гъэтхэ дзэ дэщыгъоу къэблагъэрэм изэхэщэн Адыгеим зэрэщылъыкIуатэ­рэм, федеральнэ гупчэм къы­гъэуцурэ пшъэрылъхэр гъэцэ­кIэгъэнхэмкIэ шIэгъэн фаехэм ыкIи 2022-рэ илъэсым бжыхьэ дзэ дэщыгъор зэрэ­рекIокIыгъэм защытегущыIэгъэхэ зэхэсыгъо АР-м и Пра­вительствэ зычIэт Унэм щы­кIуагъ. Ащ тхьамэтагъор щы­зэрихьагъ Адыгеим и ЛIы­шъхьэу КъумпIыл Мурат.

Зэхэсыгъом хэлэжьагъэх му­ниципальнэ образованиехэм япащэхэр, хэгъэгу кIоцI IофхэмкIэ, ошIэ-дэмышIэ IофхэмкIэ министерствэхэм, прокуратурэм, ДОСААФ-м ялIыкIохэр, республикэ ыкIи район дзэ комиссариатхэм якъулыкъушIэ­хэр, нэмыкIхэри.

Адыгэ Республикэм и ЛIышъхьэ зэхэсыгъор къызэIуихызэ, 2023-рэ илъэсым мэлылъфэгъум и 1-м рагъэжьэщт гъэтхэ дзэ дэщыгъо кампанием ипшъэ­рылъ шъхьаIэхэр гъэцэкIэгъэнхэм мэхьанэшхо зэриIэр къы­Iуагъ. ЗэрагъэнэфагъэмкIэ, ащ къыхиубытэу УФ-м и УIэшыгъэ КIуачIэхэм къулыкъур ащызыхьыщт ныбжьыкIэ нэбгырэ 550-м ехъу Адыгеим икIыщт.

— Къэблэгъэрэ гъэтхэ дзэ дэщыгъор зэрифэшъуашэу редгъэкIокIын фае. Ащ фэгъэзэгъэ къулыкъухэм зэкIэми яIо зэхэлъэу шIуагъэ къэзытыщт къэгъэ­лъэгъонхэм тафэкIон фае. Мыщ тикъэралыгъо изыкъэу­хъумэжьын гъэпытэгъэнымкIэ мэхьанэшхо иI, — къыIуагъ КъумпIыл Мурат.

2022-рэ илъэсым ибжыхьэ дзэ дэщыгъо зэрэкIуагъэм фэгъэхьыгъэу АР-м идзэ комиссариат ипащэу Александр Аве­риныр къэгущыIагъ. Ащ къызэриIуагъэмкIэ, блэкIыгъэ бжы- хьэ дзэ дэщыгъом аныбжьыкIэ къулыкъу ахьынэу къызытефэрэ нэбгырэ 2300-м ехъу чIыпIэ комиссариатхэм къякIолIагъ, процент 18-м ехъумэ макъэ арагъэIун алъэкIыгъэп.

Анахьэу ахэр зыщыбэр Джэджэ, Тэхъу­тэмыкъое, Теуцожь районхэр ыкIи Адыгэкъал. ИкIыгъэ илъэсым ибжыхьэ нэбгырэ 400 фэ­диз Урысыем и УIэшыгъэ КIуа­чIэхэм ащагъ.

АщкIэ Адыгеим пшъэрылъыр ыгъэцэкIагъ ыкIи цIыфхэр дзэ къулыкъум фэ­гъэхьазырыгъэнхэмкIэ Темыр Кавказ ыкIи Къыблэ федеральнэ шъолъырхэм ясубъект 17-мэ азыфагу я 3-рэ чIыпIэр щиу­бытыгъ. ИкIыгъэ илъэсым бжы­хьэ дзэ дэщыгъор Адыгеим зэрэщыкIуагъэм изэфэхьысыжьхэм къызэрагъэлъэгъуагъэмкIэ, апэрэ чIыпIэр Джэджэ рай­оным, ятIонэрэр — Мыекъопэ районым аубытыгъэх, Тэхъу­тэмыкъое районыр ящэнэрэ хъугъэ.

Мы илъэсым игъэтхэ дзэ дэщыгъуи шапхъэхэм адиштэу зэрэрагъэкIокIыщтыр, пшъэры­лъэу къафагъэуцугъэр шIокI имыIэу зэрагъэцэкIэщтыр дзэ комиссар шъхьаIэм къыхигъэщыгъ. Зэхэсыгъом шъхьафэу щытегущыIагъэх зэзэгъыныгъэм тетэу дзэм къулыкъу щызы­хьынэу кIощтхэм якъыхэхын иIофыгъуи.

Нэужым къэгущыIагъэх АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедеыр, псауныгъэр къэухъумэ­гъэнымкIэ министрэм иапэрэ гуадзэу Максим Коробко, АР-м общественнэ рэхьатныгъэр къэу­хъумэгъэнымкIэ полицием ипащэ игуадзэу Андрей Федосеевыр, Урысыем и ДОСААФ и Адыгэ шъолъыр къутамэ итхьаматэу Барцо Тимур.

Зэхэсыгъом кIэух зэфэхьысыжьхэр фашIызэ, гъэтхэ дзэ дэщыгъоу къэблагъэрэм ипшъэ­рылъ шъхьаIэхэм язэшIохынкIэ, анахьэу анаIэ зытырагъэтын фаехэр Адыгеим и ЛIышъхьэ къыгъэнэфагъэх. Мэлылъфэгъум и 1-р къэмысызэ, зыныбжьыкIэ къулыкъур зыхьынэу къызытефэхэрэм янахьыбэм макъэ арагъэIун фаеу КъумпIыл Мурат афигъэпытагъ.

АР-м хэгъэгу кIоцI IофхэмкIэ и Министерствэ илIыкIохэм муниципальнэ образованиехэм япащэхэр ягъусэхэу къулыкъум зыщызыдзыехэрэм нахь пхъа­шэу алъыхъунхэу афагъэпытагъ. Анахьэу анаIэ зытырагъэтыщтыр илъэс пчъагъэ хъугъэу зылъы­хъухэрэр ары, ахэр нэбгырэ 39-рэ мэхъу.

2022-рэ илъэсым ибжыхьэ дзэ дэщыгъо изэфэхьысыжьхэм къызэрагъэлъэгъуагъэмкIэ, медицинэ уплъэкIунхэр зыкIу­гъэхэм ащыщэу зипсауныгъэ изытеткIэ къулыкъур зыхьын зылъэкIэщтыр процент 66,9-рэ мэхъу, ар 2021-рэ илъэсым ибжыхьэ дзэ дэщыгъо ебгъа­пшэмэ, процент 22,6-кIэ нахьыб. Iофхэм язытет нахь тэ­рэзэу ашIэным пае псауныгъэр къэухъумэгъэнымкIэ министерствэмрэ дзэ-врачебнэ уплъэ­кIунымкIэ комиссариатым и Гупчэрэ зэгъусэхэу районхэр ыкIи къалэхэр къакIухьанхэу пшъэрылъ афашIыгъ. Гъэтхэ дзэ дэщыгъом къыхиубытэу къулыкъум ащэщтхэм коронавирусым пэуцужьырэ вакцинэр ахалъхьан фаеу алъытагъ.

Дэщын кампаниер зэхэщэ­гъэным муниципальнэ образованиехэм япащэхэм яIахьышIу зэрэхалъхьан фаем КъумпIыл Мурат къыкIигъэтхъыгъ. Сыда пIомэ, мыхэр чIыпIэхэм ащыIэ комиссиехэм ятхьаматэх.

Зэхэсыгъом пшъэрылъэу ща­гъэнэфагъэхэм ащыщ дзэ къулы­къум ныбжьыкIэхэр фэгъэхьазырыгъэнхэр, ныбжьыкIэхэм япатриотическэ пIуныгъэ иIофы­гъохэм япхыгъэу ДОСААФ-м, Юнармием, гъэсэныгъэм иучреждениехэм зэпхыныгъэ яIэныр, нэмыкIхэри.

— Гъэтхэ дзэ дэщыгъом ана­хьэу тынаIэ зытедгъэтыщтыр муниципальнэ образованиехэм ащыIэ чIыпIэ комиссиехэм яIоф­шIэн зыпкъитыныгъэ иIэныр ары. Тишъолъыр къыфагъэуцугъэ пшъэрылъыр дгъэцэкIэн фае, — хигъэунэфыкIыгъ АР-м и ЛIышъхьэ.

Iэшъынэ Сусан.