ПсэупIэу Вольнэм щыщэу илъэс 23-рэ зыныбжь Иван Самойловыр Украинэм щыпсэурэ цIыф мамырхэр къэухъумэгъэнхэм фэIорышIэрэ хэушъхьафыкIыгъэ дзэ операцием къулыкъур щихьызэ лIыхъужъныгъэ зыхэлъ зекIуакIэ къызэрэзхигъэфагъэм фэшI Кощхьэблэ районыр рэгушхо.

КIэлэ ныбжьыкIэм дзэ пшъэрылъэу къыфагъэуцугъэр ыгъэцакIэзэ иныб­джэ­гъу дзэкIолIхэр игъусэхэу разведкэм щыIагъ. Пилот зэрымыс быбырэ аппаратэу щэ зэрылъыр къызырадзыхым къауи, ичIыпIэгъу къулыкъушIэу Натырбые щыщ Евгений Брынько къытефагъ, ылъа­къо уIагъэхэр тырищагъэх.

Ищынэгъончъагъэ ыкIи ежь ышъхьэ къырыкIощтым ямыгупшысэу Иван псынкIэу иныбджэгъу зы­пэIуидзи, иIэпыIэгъу ри­гъэкIыгъ.

Иван янэу Наталья Самойловам къызэриIуагъэмкIэ, яхэгъэгу къау­хъумэнэу икIэлитIуи контракт шIыкIэм тетэу къулыкъум кIуагъэх.

Иван лIыблэнагъэу зэрихьагъэр ным инэIуасэхэмкIэ зэхихыгъ, телефонымкIэ зэфытеожьых нахь мышIэми, ар амыгъэгумэкIыным фэшI мы хъугъэ­-шIагъэр къыфаIотагъэп. Иван янэ ицыхьэ телъ икIа­лэхэм афэдэу дзэкIолI­хэр зэкъотхэу мамыр щы­IакIэм фэбанэхэмэ, текIоныгъэм къызэрэфэ­кIощтхэм.

Хэгъэгум къулыкъу фа­хьыныр, къаухъумэныр ыкIи ар шIу зылъэгъурэ пстэуми япшъэрылъ. Дзэ­кIолIхэр — тинепэрэ лIы­хъужъых, ахэр мамыр­ныгъэм изехьакIох ыкIи тикъэралыгъо ищынэгъончъагъэ иухъумакIох.

ЗищыIэныгъэ къулы­къум езыпхыхэрэм къэралыгъо­ми фэгъэкIотэн зэ­фэшъ­хьафхэр афешIых. Ахэм нахь игъэкIотыгъэу нэIуасэ шъуащыфэхъун шъулъэ­кIыщт «Адыгея — служу Родине» зыфиIорэ Телеграм-каналым. Конт­ракт шIыкIэкIэ къулыкъум хэ­хьанэу фаехэм дзэ ко­мис­сариатэу зэпхыгъэхэм лъэIу тхылъхэр щатхынхэ фае.