Урысыем и Президентэу Владимир Путиным и УказкIэ мы илъэсыр егъэджэкIо-гъэсакIом и Илъэсэу агъэнэфагъ. Ар зэрэрагъажьэрэм фэгъэхьыгъэ Iофтхьабзэу республикэм и Къэралыгъо филармоние щыкIуагъэм Адыгеим и ЛIышъхьэу КъумпIыл Мурат хэлэжьагъ.

Джащ фэдэу ащ хэлэжьагъэх АР-м и Къэралыгъо Совет —Хасэм и Тхьаматэу Владимир Нарожнэр, АР-м гъэсэныгъэмрэ шIэныгъэмрэкIэ иминистрэ ипшъэ­рылъхэр зыгъэцакIэу Евгений Лебедевыр, гъэсэныгъэм иIофышIэхэр, еджапIэхэм япащэхэмрэ ялIыкIохэмрэ.

Iофтхьабзэр рагъэжьэным ыпэкIэ республикэм и ЛIышъхьэ егъэджэкIо-гъэсакIом и Илъэс фэгъэхьыгъэ къэгъэлъэгъоным иэкспозициехэм защигъэгъо­загъ.

УФ-м просвещениемкIэ иминистрэу Сергей Кравцовым пэIудзыгъэ шIыкIэм тетэу Iоф­тхьабзэм хэлажьэхэрэм шIуфэс къарихыгъ. Гъэсэныгъэм ылъэныкъокIэ шэпхъакIэхэр зэрагъэ­федэрэм, ныбжьыкIэхэр зэрагъасэрэм мэхьанэшхо зэряIэр ащ къыхигъэщыгъ. Федеральнэ ведомствэм ипащэ къызэриIуагъэмкIэ, педагог цIэрыIоу Константин Ушинскэр къызыхъугъэр мыгъэ илъэс 200 хъущт. Ащ епхыгъэу зэнэкъокъу, форум зэфэшъхьафхэр зэхащэнхэу рахъухьэ.

Республикэм и ЛIышъхьэу КъумпIыл Мурат егъэджэкIо-гъэ­сакIом и Илъэс фэшI кIэлэпIу­хэм, гурыт, апшъэрэ еджапIэ­хэм, колледжхэм якIэлэегъа­джэхэм, спортымкIэ тренерхэм, производствэм нэIуасэ фэзы­шIырэ мастерхэм, гъэсэныгъэм­кIэ ветеранхэм къафэгушIуагъ.

«Президентэу Владимир Путиным егъэджэкIо-гъэсакIом и Илъэс гъэнэфэгъэнэу унашъо зэришIыгъэм къегъэлъагъо мыщ фэдэ сэнэхьатым обществэм ихэхъоныгъэкIэ мэхьанэшхо зэ­­рэратырэр. Президентым зэрэхигъэунэфыкIыгъэмкIэ, «егъэ­джэкIо-гъэсакIом и Илъэс зыкIызэхащэрэр зиуахъти, зикъарыуи кIэлэцIыкIухэмрэ ныбжьыкIэхэмрэ атезыгощэрэ цIыфхэм анаIэ нахь къатырадзэнэу ары». Урысыем игъэхъагъэхэм егъэ­джэкIо-гъэсакIохэм непэ яIа­хьышхо зэрахашIыхьэрэм нахьыбэрэ игугъу шIыгъэн фае», — къыIуагъ КъумпIыл Мурат.

КъумпIыл Мурат зэрэхигъэу­нэфыкIыгъэмкIэ, кIэлэегъаджэм мэхьанэу ратырэм зыкъегъэIэтыгъэнымкIэ, кIэлэеджакIохэм джырэ шапхъэхэм адиштэрэ гъэсэныгъэ ягъэгъотыгъэнымкIэ тихэгъэгу бэ щашIэрэр. Гъэсэныгъэм исувереннэ системэ хэгъэгум щызэхэщэгъэнымкIэ Урысыем и Президент къыгъэу­цугъэ пшъэрылъым игъэцэкIэн нахь лъэшэу анаIэ тырагъэтынэу республикэм ипащэ Iоф­тхьабзэм къыщиIуагъ.

Лъэпкъ проект, къэралыгъо программэ заулэмэ ягъэцэкIэн мэхьанэшхо зэриIэр ЛIышъхьэм къыхигъэщыгъ. Ахэр анахьэу зытегъэпсыхьагъэхэр гъэсэ­ныгъэм, культурэм, спортым япхыгъэ инфраструктурэр гъэ­кIэжьыгъэныр, джырэ шапхъэ­хэм адиштэрэ кIэлэцIыкIу тхылъ­еджапIэхэр гъэпсыгъэнхэр, егъэ­джэнымкIэ амалыкIэ­хэр къызфэгъэфедэгъэнхэр, кIэлэегъаджэхэм нахьышIоу Iэ­пыIэгъу ягъэгъотыгъэныр ары.

Мэхьанэшхо зиIэ проектхэм яшIуагъэкIэ илъэситфым къыкIоцI республикэм гурыт еджэпIи 5, кIэлэцIыкIу IыгъыпIэ 18, культурэм и уни 9, физкультурэ комплекс 14 щагъэпсыгъ, гурыт еджэпIи 6-мэ яшIын ыуж итых.

КъумпIыл Мурат къызэрэхигъэщыгъэмкIэ, зыщыкIэхэрэ кIэлэегъаджэхэм ягъэхьазырын ыуж итых. АР-м и ЛIышъхьэ зэрэхигъэунэфыкIыгъэмкIэ, Уры­сые зэнэкъокъоу «Илъэсым имастер» зыфиIорэмрэ зэнэ­къокъоу «НыдэлъфыбзэмкIэ ыкIи литературэмкIэ кIэлэегъэджэ анахь дэгъу» зыфиIорэмрэ ябыракъ егъэджэкIо-гъэсакIом и Илъэс агъэIагъ. Адыгеим и ЛIышъхьэ Урысыем просвещениемкIэ и Министерствэ ипащэ­хэм «тхьашъуегъэпсэу» ари­Iуагъ ренэу IэпыIэгъу къазэра­фэхъу­хэрэм, республикэм гъэсэ­ны­гъэм­кIэ, культурэмкIэ ыкIи спор­тымкIэ иIофышIэхэм япшъэ­рылъхэр дэгъоу зэрагъэца­кIэ­хэрэм афэшI.

КъумпIыл Муратрэ егъэджэн IофымкIэ ветеранэу, икIэлэегъ’­джэу Тхьайшъэо Нуриетрэ оды­джынхэр аIыгъэу къытыра­хьа­гъэх, егъэджэкIо-гъэсакIом и Илъэс зэрэрагъэжьагъэм ар ишыхьатыгъ.

АР-м и Къэралыгъо Совет — Хасэм и Тхьаматэу Владимир Нарожнэм Iофтхьабзэм хэла­жьэхэрэм шIуфэс къарихыгъ. ЗиIофшIэнкIэ гъэхъагъэхэр зиIэ кIэлэегъаджэхэм, гъэсэныгъэм, культурэм, спортым иIофышIэ­хэм Адыгеим и ЛIышъхьэрэ АР-м и Къэралыгъо Совет —Хасэмрэ ярэзэныгъэ тхылъхэр, республикэ министерствэхэм ящытхъу тхылъхэр афагъэшъошагъэх. Iофтхьабзэр мэфэкI концерткIэ аухыгъ. АР-м и ЛIышъхьэ ипресс-къулыкъу