Мыекъуапэ ипарк зэтегъэпсыхьэгъэным фэгъэхьыгъэ Iофы­гъохэм защатегущы­Iэгъэ­хэ зэIукIэу щыIагъэр зэрищагъ АР-м и ЛIы­шъхьэу КъумпIыл Мурат.

ЗэIукIэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, Мыекъуапэ имэрэу Геннадий Митрофановыр, АР-м псэолъэшIынымкIэ, унэ-коммунальнэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан, къалэм иар­хитектор шъхьаIэу Шумэфэ Сулиет, «Стройзаказчикым» ипащэ ипшъэрылъхэр зыгъэцэкIэрэ Хьаджымэ Аслъан, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Форвардым» ипащэу ДзэлI Аскэр, проект ыкIи подряднэ организациехэм ялIыкIохэр.

Нэпкъым игъэпытэнкIэ ыкIи зыгъэпсэфыпIэ шъолъырым игъэпсынкIэ Iофэу ашIагъэм икIэуххэр Адыгеим и ЛIышъхьэ зэригъэлъэгъугъэх. Шъугу къэтэгъэкIыжьы: республикэм исо­циальнэ-экономикэ хэхъоныгъэ ипрограммэ тегъэпсыхьагъэу, федеральнэ гупчэм иIэпыIэгъу хэлъэу а IофшIэнхэр агъэцэкIагъэх. Псыхъоу Шъхьэгуащэ инэпкъ километри 2,5-м ехъоу агъэпытагъ, цIыфхэр зы­щытезекIухьэщтхэ ыкIи джэгукIэ зэфэшъхьафхэм апае чIыпIэхэр ашIыгъэх, псыхъом ылъэ­ныкъокIэ къызэрехыщтхэ чIыпIэри зэтырагъэпсыхьагъ, къэ­гъагъэхэр агъэтIысхьагъэх. Те­тIысхьапIэхэр, къэзыгъэнэфыщтхэр, къалэм итамыгъэу щыт мыIэрысэу гъучIым хэшIыкIыгъэр, архитектурнэ пкъыгъо зэфэшъхьафхэр ыкIи нэмыкIхэр нэпкъым дэжь щагъэуцугъэх.

IофшIэн шъхьаIэхэр ыкIэм фэкIуагъэх. Къэлэдэсхэмрэ хьа­кIэхэмрэ зызщагъэпсэфырэ чIыпIэ шъхьаIэу ар хъугъэ. Ау ащ дакIоу къэIогъэн фае: Адыге­им и ЛIышъхьэ паркым изэтегъэ­псыхьан зэрэкIорэр зеу­плъэкIу лъэхъаным къыхигъэщыгъ щыкIагъэхэм ядэгъэ­зы­жьын­кIэ Iоф­тхьэбзэ заулэ джы­ри зэ­шIуахын фаеу зэрэхъущтыр. КъумпIыл Мурат къызэриIуа­гъэмкIэ, зызщагъэпсэфыщт шъо­лъырыкIэхэм яшIынкIэ ыкIи ахэм язэтегъэпсыхьанкIэ ра­хъухьагъэхэм атетэу, зэдиштэхэу IофшIэнхэр гъэцэкIэгъэнхэ фае.

«Джырэ уахътэм диштэрэ ыкIи гуIэтыпIэу щыт къалэу Мыекъуапэ хъуным пае бэ зэшIотхырэр. Республикэм икъэ­лэ шъхьаIэ хэпшIыкIэу зызэ­блехъу. Къэлэ паркым игъэ­кIэжьынкIэ Iофтхьэбзэшхохэми якIэуххэр нэрылъэгъух. Мы охътэ благъэхэм щыкIэгъэ мыинхэу къыхэдгъэщыгъэхэри зэ­рэдэдгъэзыжьыщтхэм тыдэлэ­жьэн фае», — къыIуагъ КъумпIыл Мурат.

Ащ дакIоу зызщагъэпскIырэ чIыпIэр гъэкIэжьыгъэн, дэкIояпIэхэр нахь зэтегъэпсыхьэгъэн, тетIысхьапIэхэр нахьыбэ шIыгъэн, хъэренхэм адэжь чIыгур тэрэзэу гъэпкIэгъэн, къэгъагъэ­хэр нахьыбэу гъэтIысхьэгъэнхэ зэрэфаер къыIуагъ.

Къэлэ бассейнэми изэтегъэ­псыхьан иIофыгъо къаIэтыгъ, псэолъэшIынымкIэ республикэм и Министерствэ къызэрэхи­гъэщыгъэмкIэ, мылъкоу ащ пэIухьащтым иIофыгъо джырэ- кIэ тегущыIэх. Федеральнэ бюджетым мылъку къыхигъэкIыным пае лъэIу тхылъыр агъэ­хьазырыгъах.

Ащ нэужым Адыгеим и ЛIы­шъхьэ республикэ стадионым къыпэIулъ чIыпIэр къыплъы­хьагъ, ащ скейт-паркыкIэм ишIын щэкIо. Гъэмафэм ехъулIэу Iоф­шIэнхэр аухын мурад яI. Щы­нэгъончъэным иIофыгъохэр ары анахьэу анаIэ зытетыр, видеокамерэхэр гъэуцугъэнхэм яшъыпкъэу ыуж ихьагъэх.

«ТиIофшIэнкIэ зэкIэми мэхьэнэ гъэнэфагъэ яI. Зы лъэныкъомкIэ республикэм икъэлэ шъхьаIэ ущыпсэуныр нахь Iэ­рыфэгъу, нахь гуIэтыпIэ зэрэ­хъущтым тынаIэ тетэгъэты, ащ дакIоу республикэм зекIоу къи­хьэхэрэми япчъагъэ зэрэхэд­гъэхъощтым иIофыгъохэр къыдэтэлъытэх. Арышъ, зэкIэ лъэныкъохэм икъоу тягупшысэн фае. Щынэгъончъэным дакIоу, гуIэтыпIэу, зэдиштэу зэкIэ зэ­рэхъущтым тынаIэ тетымыгъэт хъущтэп. Къэлэ паркыр загъэ­кIэжькIэ, джырэ уахътэм ди­штэрэ, цIыфхэм зызщагъэпсэфын алъэкIыщт чIыпIэ щыIэ хъущт», — къыIуагъ КъумпIыл Мурат.

АР-м и ЛIышъхьэ ипресс-къулыкъу