Про­мышленнэ продукциер хэбзэнчъэу амгъэзекIонымкIэ Адыгэ Республикэм и Комиссие изэхэсы­гъо республикэм и Правительствэ зы­чIэт унэм непэ щыкIуагъ.

Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу АР-м иминистрэхэм я Кабинет и Тхьаматэу КIэрэщэ Анзаур ар зэрищагъ.

Зэхэсыгъом хэлэжьагъэх АР-м ипрокуратурэ, и МВД, щынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ, Федеральнэ хэ­бзэIахь къулыкъум АР-мкIэ и ГъэIорышIапIэ, АР-м и Апшъэрэ хьыкум, феде­ральнэ, шъолъыр къулы­къухэм, муниципальнэ образованиехэм япащэхэр.

АР-м и МВД экономикэ щынэгъончъэнымкIэ ыкIи къолъхьэ тын-Iыхыным пэуцужьыгъэнымкIэ и ГъэIорышIапIэ ипащэ игуадзэрэ АР-м мэзхэмкIэ и ГъэIорышIапIэ ипащэрэ къатегущыIагъэх мэзхэмкIэ хэбзэгъэуцугъэр зэраукъорэм, хэбзэнчъэу чъыгхэр рес­публикэм зэрэщыраупкIыхэ­рэм апэуцужьыгъэнымкIэ амалэу зэрахьэхэрэм.

Зэхэсыгъом зэрэщыха­гъэу­нэфыкIыгъэмкIэ, 2022-рэ илъэсым полицием иIо­фышIэхэм деревообраба­тывающэ цех 14, чъыгхэр зыщыраупкIыгъэ чIыпIэ 18, пхъэхэр зезыщэрэ транспорт 680-рэ ауплъэкIугъ. Хабзэм димыштэу гъогогъуи 8 чъыгхэр раупкIыгъэу агъэунэфыгъ, уголовнэ Iоф­хэр къызэIуахыгъэх. Документхэр ямыгъусэу пхъэхэр зэрэзэращагъэмкIэ ма­териал 54-рэ, админист­ративнэ пшъэдэкIыжь ягъэ­хьыгъэнымкIэ протоколи 3 зэхагъэуцуагъ.

АР-м иминистрэхэм я Кабинет и Тхьаматэ къя­джагъ мэзым епхыгъэ хэ­бзэукъоныгъэ зышIыхэрэм ягъогупэ игъом пыбзыкIыгъэнэу.

«Республикэм и ЛIышъхьэ мэзымкIэ хэбзэгъэу­цугъэм къыщыдэлъытэгъэ шап­хъэхэр амыукъонэу къа­фигъэпытагъ. ХэбзэIахь къулыкъухэр мэзым ибаиныгъэхэр зыгъэзекIохэрэм зэралъыплъэщтхэр, хабзэр зау­­къокIэ зэрагъэпщынэщтхэр ахэм ашIэн фае», — къы­Iуагъ КIэрэщэ Анзаур.

Краснодар таможнэм ипащэ илIыкIо къызэриIуагъэмкIэ, гъэрекIо уплъэкIунхэр зызэхащэхэм документ зыпымылъ товари 100-м ехъу къыхагъэщыгъ ыкIи къаIахыгъ. Илъэсыр къызи­хьагъэм щегъэжьагъэу товар нэпцI 900 фэдиз къыхагъэщыгъ.

Промышленнэ продук­циеу хэбзэнчъэу республикэм щызэрагъакIохэрэр къыхэгъэщыгъэнхэмкIэ ыкIи ахэм ягъогупэ пыбзыкIыгъэнымкIэ хэбзэгъэуцугъэр зэраукъуагъэр къыхигъэщынэу таможнэм игъо фалъэгъугъ.

Россельхознадзорым и Къыблэ шъолъыр ГъэIоры­шIапIэ илIыкIорэ Роспотребнадзорым АР-мкIэ и ГъэIорышIапIэ ипащэрэ къаIо­тагъ хэбзэнчъэу гъомылапхъэхэр Адыгеим зэрэщагъэзекIо­хэрэм зэрэпэуцужьхэрэр.

Россельхознадзорым иIо­фышIэхэм уплъэкIун 29-рэ зызэхащэм, маркировкэхэр ямыIэу гъомылэпхъэ 25-рэ къыхагъэщыгъ.

Роспотребнадзорым кIэлэцIыкIу шхыныгъохэр къа­IэкIэзыгъахьэхэрэр ыкIи ахэм ягъэшхэн зэхэзыщэ­хэрэр, зэхэубытэгъэ гъэсэныгъэ языгъэгъотырэ организациехэр ыуплъэкIугъэх. ЦIыфхэм закъызэрафагъэзагъэм тетэу гъомылэп­хъэшI объектхэм административнэ уплъэкIуни 7 ащызэхащагъ. ГъэрекIо гъомылапхъэхэм язытет епхыгъэ админист­ративнэ материал 79-мэ ахэплъагъэх. Сомэ миллион 1,2-м ехъу къазэраIахы­жьыщт тазыр 62-рэ атыралъ­хьагъ. ЦIыфхэм япсауныгъэ къегоон зылъэкIыщт гъомылэпхъэ партие 51-мэ яIу­гъэкIын къызэтырагъэуцуагъ.

Республикэм иминистрэ­хэм я Кабинет и Тхьаматэ администрациехэмрэ къулыкъу гъэнэфагъэхэмрэ япа­щэхэм афигъэпытагъ пэшIорыгъэшъ IофшIэныр нахь агъэлъэшынэу, цIыфхэм япсауныгъэ къегоон зы­лъэкIыщт гъомылапхъэхэр Адыгеим игъомылэпхъэщэ бэдзэрхэм къатырарамы­гъэлъхьанэу.

«Хэбзэ къулыкъухэмрэ уплъэкIунхэр зэхэзыщэрэ ведомствэхэмрэ эпидемиологиемрэ санитариемрэ алъэныкъокIэ Iофхэр нахьы­шIу ашIын фае. ЦIыфхэм къягоон зылъэкIыщт гъомылапхъэхэр сатыушIыпIэхэм, ермэлыкъхэм, гъэсэныгъэмкIэ, псауныгъэм икъэухъу­мэнкIэ, социальнэ ухъумэнымкIэ учреждениехэм ачIа­рагъахьэхэ хъущтэп», — къыIуагъ КIэрэщэ Анзаур.

АР-м иминистрэхэм я Кабинет и Тхьаматэ зэ­хэсыгъом хэлэжьагъэхэм анаIэ тыраригъэдзагъ зэхэ­сыгъом къыщыхалъхьэгъэ Iофыгъохэм ягъэцэкIэн нахь егугъунхэ, мы лъэныкъомкIэ ведомствэхэм язэдэлэжьэныгъэ агъэлъэшын зэрэфаем.

Адыгэ Республикэм и ЛIышъхьэ ипресс-къулыкъу