ЕгъэджэкIо — гъэсакIом и Илъэс къыхиубытэу Шъачэ икIэлэегъаджэхэр, тренерхэр агъэшIуагъэх.

Къалэм ипащэу Алексей Копайгородскэм гъэсэныгъэм иветеранэу, илъэс 30-м къыщымыкIэу IофшIэгъэ илъэсхэр зиIэхэм, ныбжьыкIэхэм ягъэсакIохэм, кIэлэегъэджэ унагъохэм къарыкIыгъэхэм рэзэныгъэ тхылъхэр аритыжьыгъэх. Ащ тетэу къыхагъэщыгъэхэм ащыщ урысые спортым ыкIи физкультурэм яотличникэу, мы лъэныкъомкIэ Пшызэ шъолъыр иза­служеннэ IофышIэу Хьатх Анзаур.

IофшIэгъэ илъэс 46-у иIэм щыщэу 27-м олимпиадэхэм зыщафагъэхьазыр- хэрэ Шъачэ испорт еджапIэ ар ипащ. ЗэлъашIэрэ спортсменыбэу ыгъэхьазырыгъэхэм Урысыем спортымкIэ изаслуженнэ мастерэу зы нэбгырэ, дунэе класс зиIэ нэбгырих ахэт, спортымкIэ мастерхэр нэбгырэ 50-м, кандидатхэр 150-м ехъух, нэбгыриплI Олимпийскэ джэгунхэм ахэлэжьагъ. Къалэм испорт учреждение анахь инхэм ащыщэу зипащэм дзюдомкIэ, самбэмкIэ, художест­веннэ гимнастикэмкIэ, теннисымкIэ, бок­сымкIэ, нэмыкI спорт лъэпкъхэмкIэ кIэлэцIыкIуми, зихэхъогъуми, нэбгырэ миным ехъу щагъасэ.

Анзаур спортым ылъэныкъокIэ ышIэ­рэм нэмыкIэу хы ШIуцIэ шапсыгъэхэм я Адыгэ Хасэ иIофшIэни чанэу хэлажьэ. Джащ фэдэу ар гъэсэкIо унэгъошхом ипащэу мэхъу. Мы спорт еджапIэм Iоф щашIэ ыш икIалэу, дзюдомкIэ тренер шъхьаIэу, спортымкIэ мастерэу, Пшызэ шъолъыр изаслуженнэ IофышIэу Хьатх Бислъан, ежь икIэлэ нахьыжъэу, инструктор-методистэу Хьатх Муратэ, анахьыкIэу, дзюдомрэ самбэмрэ икъутамэ итренерэу, Урысыем спортымкIэ имастерэу, апэрэ категорие зиIэ спортивнэ судьяу Хьатх Мадинэ.

— НыбжьыкIэхэм ягъэсэн, физкультурэм, спортым язегъэушъомбгъун, псауныгъэмкIэ шIуагъэ къытэу псэунхэм къыткIэхъухьэхэрэр фэщэгъэнхэм къэралыгъом лъэшэу ынаIэ тет, — къыIуагъ Хьатх Анзаур. — Мы лъэныкъом мылъку хэплъхьаным имызакъоу, кIэлэ-егъаджэм истатус къэIэтыгъэным, мы сэнэхьатым нахьыбэу уасэ фашIыным дэлэжьэгъэным мэхьанэшхо иI. Ащ пае нахьыжъхэм яопыт, лъэпкъ пIуныгъэм ихабзэхэр гъэфедэгъэнхэ фае.

НЫБЭ Анзор.