Мыекъуапэ и Гупчэ саугъэт зэхэтэу «ЕгъэшIэрэ машIор» зыфиIорэм дэжь гъэтхапэм и 26-м зэхахьэ щыкIуагъ.

Хэгъэгу зэошхом ТекIоныгъэр къызыщыдахыгъэр илъэс 78-рэ зэрэхъурэм епхыгъэу Союзнэ общественнэ-патрио­тическэ проектэу «Наша Ве­ликая Родина» зыфиIорэ зэIэпахырэ маршым хэтхэр Адыгеим къызэрэсыгъэхэм ар фэ­гъэхьыгъагъ.

Iофтхьабзэм хэлэжьагъэх УФ-м и ЛIыхъужъэу, АР-м и Къэ­ралыгъо Совет — Хасэм и Тхьаматэ игуадзэу, зэо зэ­пэу­цужьхэм ахэлэжьагъэу Цэй Эду­ард, Адыгеим лъэпкъ Iоф­хэм­кIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, Мыекъопэ къэлэ ад­мини­страцием ипащэ игуадзэу Юрий Томчак, общественнэ организациехэм ялIыкIохэр, Юнармием хэтхэр, кIэлэеджа­кIохэр.

Гъэтхапэм и 17-м къэлэ-лIы­хъужъэу Севастополь авто­пробегыр къыщырагъэжьагъ, гъэтхапэм и 26-м ар Адыгеим къэсыгъ. Патриотическэ пIуныгъэм ехьылIэгъэ нэрылъэгъу IэпыIэгъухэр автомашинэхэм абгъухэм атетхэу, бы­ракъхэр аIыгъхэу Iофтхьабзэм хэла­жьэ­хэрэр къекIолIагъэх.

АР-м и ЛIышъхьэу КъумпIыл Мурат ыкIи депутатхэм ацIэкIэ къэзэрэугъоигъэхэм Цэй Эдуард закъыфигъэзагъ. Нэмыц техакIохэр зэхагъэтэкъонхэмкIэ, мамырныгъэ джы тиIэным фэбэнэгъэ лъэпкъ зэфэшъхьафхэм къахэкIыгъэ цIыфхэм языкIыныгъэ ыкIи тарихъ шIэжьыр къызэтегъэнэгъэнхэмкIэ автопробегым изэхэщакIохэм патриотическэ IофшIэны­шхо зэрэзэрахьэрэр ащ къыIуагъ.

— Хэгъэгу зэошхом иветеранхэм, къэралыгъом шIулъэ­гъоу фыриIэр ыпэ изыгъэшъхэу, уасэ фэзышIырэ тичIыгогъухэу къулыкъур зыхьыхэрэм, патриотхэм тарэгушхо, — хигъэунэфыкIыгъ Цэй Эдуард.

Патриотическэ Iофтхьабзэм хэлажьэхэрэм закъыфигъэзагъ АР-м иветеранхэм я Совет итхьаматэу Къоджэ Аслъан.

— Республикэм щыпсэурэ ветеранхэм ацIэкIэ шIуфэс шъо­сэхы. Къэли 100-м ехъоу къэшъукIухьащтхэм Мыекъуапэ зэ­рахэжъугъэхьагъэмкIэ ты­шъу­фэраз. Мэзихым ехъурэ Адыгэ автоном хэку цIыкIур оккупаци­ем щыIагъ. Ау тицIыфхэм зыкъатыгъэп, ТекIоныгъэр къэ­гъэ­блэгъэгъэным яIахьышIу ха­шIыхьагъ. Тисоветскэ цIыфхэм лIыхъужъныгъэу зэрахьагъэм тырэгушхо. Автопробегым хэтхэм джыри ягъогууанэ лъагъэ­кIотэщтышъ, «гъогумаф» ятэIо, — къыIуагъ Къоджэ Аслъан.

ГущыIэр лъигъэкIотагъ зэIэпахырэ марш проектэу «Наша великая Родина» зыфиIорэм изэхэщакIоу, УФ-м и Къэра­лыгъо Думэ идепутатэу Олег Слюсаренкэм.

— Союзнэ общественнэ-патриотическэ проектым мурад шъхьаIэу иIэр къыткIэхъухьэрэ ныбжьыкIэхэм патриотическэ зэхашIэ яIэным фэпIугъэнхэр, УФ-м щыпсэурэ лъэпкъхэм языкIыныгъэ гъэпытэгъэныр ары. Урысыер къэралыгъо кIо­чIэшхоу зэрэщытыр зэрэдунаеу ядгъэшIэным, мамырныгъэ щы­IакIэ ащ илъыным тызэкъотэу тыфэбэнэщт, — къыIуагъ Олег Слюсаренкэм.

Джащ фэдэу Адыгеим ипащэхэр патриотическэ Iофтхьабзэм зэрэдырагъэштагъэмкIэ «тхьашъуегъэпсэу» ариIуагъ.

Зэхахьэм къыщыгущыIагъэх депутатхэр, общественнэ организациехэм ащыщхэм ялIыкIохэр. Пстэуми къызэрэхагъэщыгъэмкIэ, ТекIоныгъэр къыда­хыным фэшI тисоветскэ дзэ­кIолIхэм лIыхъужъныгъэу зэра­хьагъэр зыщыдгъэгъупшэ хъущтэп, ахэр тищысэтехыпIэх. Ау непэ бэмэ тарихъыр кIатхыкIыжьын гухэлъ яI. ТекIоныгъэ­шхом къэбар шъыпкъэу пылъыр сыдигъуи тиIэубытыпIэу щытын зэрэфаер къэгущыIэгъэ пстэуми къыхагъэщыгъ.

Зэхахьэм икIэух саугъэтым къэгъагъэхэр кIэралъхьагъэх. Нэужым Iофтхьабзэм къыды­хэлъытагъэу, квадрат метрэ 200 хъурэ ТекIоныгъэм ибы­ракъы­шхо аубгъугъ. Машинэхэр зэ­хэтхэу гъогу техьажьыгъэх, джы къызыщыуцущтхэр Невинномысск.

Шъугу къэдгъэкIыжьын, Союз­нэ общественнэ-политическэ проектэу «Наша Великая Победа» зыфиIорэр Хэгъэгу зэошхом ТекIоныгъэр къызыщыдахыгъэм ипэгъокIэу илъэс къэс зэхащэ ыкIи апэрэу 2020-рэ илъэсым Мыекъуапэ щыкIуагъ. Мыщ хэхьэх Урысыем, Белоруссием, Приднестровьем, Абхъазым, Къыблэ Осетием яоб­щественнэ-патриотическэ объединениехэм ялIыкIохэр. Автопробегыр Урысыем икъэли 100-м ехъумэ ащыкIощт. ТекIоныгъэм и Мафэ ехъулIэу зэкIэмкIи километрэ мин 21-рэ хъурэ гъогууанэр къакIущт.

ЖъоныгъуакIэм и 9-м, ТекIоныгъэм и Мафэ зыщыхагъэунэфыкIыщтым, Москва и Краснэ площадь щыкIощт «ЕгъэшIэрэ полкым» проектым хэлажьэ­хэрэм ТекIоныгъэм ибыракъы­шхо рахьылIэжьыщт ыкIи ащ щаубгъущт.

Iэшъынэ Сусан. Сурэтхэр: А Балабась.