Адыгэ Республикэм хабзэр щымыукъо­гъэным фэгъэзэгъэ Координационнэ зэIукIэм изэхэсыгъо Адыгэ Республикэм и Правительствэ зычIэт унэм тыгъуасэ щыкIуагъ. Ар зэри­щагъ Адыгэ Республикэм и ЛIышъхьэу КъумпIыл Мурат.

Анахь шъхьаIэу зытегущыIагъэхэм ащыщ хэбзэукъоныгъэ­хэр къэмыгъэхъугъэнхэр ыкIи ахэм гъогур афызэпыбзыкIы­гъэ­ныр. Адыгэ Республикэм лъэпкъ ыкIи федеральнэ проектхэр зыщыщагъэцэкIэхэрэ лъэхъаным къыхагъэщыгъэ хэ­бзэукъоныгъэхэу къолъхьэ тын-Iыхын нэшанэ зиIэхэри ахэм къахеубытэх.

АР-м и УплъэкIокIо-лъытэкIо палатэ итхьаматэу Павел Стаценкэм къызэриIуагъэмкIэ, Адыгеим лъэпкъ проект 12-м атегъэпсыхьагъэу шъолъыр про­ект 44-рэ щагъэцакIэ. Ахэм язэ­шIохын зэрэкIорэм ренэу анаIэ тырагъэты. ЩыкIагъэу ащкIэ щыIэхэм афэгъэхьыгъэ къэбарыр республикэ прокуратурэм зэрэIэкIагъахьэрэм къытегущыIагъ Павел Стаценкэр.

Адыгеим и ЛIышъхьэу КъумпIыл Мурат лъэпкъ проектхэр пхырызыщырэ министерствэ ыкIи ведомствэ пстэуми пшъэ­рылъ афишIыгъ УплъэкIокIо-лъы­тэкIо палатэм Iофэу ышIагъэм икIэуххэр къыдалъытэнхэу ыкIи яIофшIэнкIэ тапэкIи ащ фэ­дэ щыкIагъэхэр къызхамыгъэ­фэнхэу.

«Урысыем и Президент къы­гъэуцугъэ пшъэрылъ шъхьаIэхэм зыкIэ ащыщых лъэпкъ проектхэм къыдалъытэрэ гухэлъ шъхьаIэхэр щыIэныгъэм щыпхырыщыгъэнхэр. Ащ пае проектхэр зыщыпхыращыхэрэ чэзыу пстэуми IофшIэныр тэрэзэу ащызэхэщэгъэн фае. УплъэкIокIо-лъытэ­кIо палатэм Iофтхьабзэу зэри­хьэхэрэм ахигъэхъон, а лъэныкъомкIэ лъэпкъ проектэу пхыращыхэрэми язытет зыфэдэр ыгъэунэфын фае. Бюджет мылъкур республикэм ифедэхэм нахь шIуагъэ хэлъэу апэIугъэ­хьэгъэным икъоу анаIэ тырамыгъэт хъущтэп», — къыхи­гъэщыгъ КъумпIыл Мурат.

Зыныбжь имыкъугъэхэу зи зылъымыплъэхэрэм ыкIи хэ­бзэукъоныгъэхэр зышIыхэрэм IофшIэнэу адагъэцакIэрэм фэгъэхьыгъэ псалъэми зэхэсыгъом илъэхъан едэIугъэх.

АР-м хэгъэгу кIоцI IофхэмкIэ и Министерствэ къызэри-ты­гъэмкIэ, илъэсым пыкIыгъэ мэзитIум къыкIоцI республикэм зыныбжь имыкъугъэхэм щызэрахьэрэ бзэджэшIагъэхэм процент 76,4-кIэ нахь ­къакIичыгъ. Хэбзэукъоныгъэхэм апэшIуекIорэ Iофтхьэбзэ зэфэшъхьафыбэ зэрэзэрахьа­гъэм ишIуагъэкIэ ащ фэдэу хъугъэ.

Зыныбжь имыкъугъэхэм яIоф­хэм афэгъэзэгъэ цIыфхэм гъэсэ­ныгъэ зыщарагъэгъотырэ организациехэм гурыгъэIон, зэхэфын Iофтхьабзэхэр Iэтахъохэм щадызэрахьэх, лекциехэм къа­фяджэх, бзэджэшIагъэхэр зэра­хьэхэ, хэбзэукъоныгъэхэр ашIы­хэ зэрэмыхъущтым ахэр къафагъэущых. 2022-рэ илъэсым лекцие мини 2-м ехъу зэхащэгъагъ.

Адыгэ Республикэм гъэсэныгъэмкIэ иминистрэ иапэрэ гуа­дзэу Пэрэныкъо Сусаннэ къызэ­риIуагъэмкIэ, ведомствэм ыпкъ къикIэу IофшIэнышхо зэшIохыгъэ хъугъэ. Анахьэу анаIэ зытыра­дзагъэхэр ушъхьагъу щымыIэу еджэн сыхьатхэр блэзыгъэкIы­хэрэр ары. Джащ фэдэу кIэлэцIыкIухэм гъэсэныгъэ тедзэ яты­гъэным исистемэ зыныбжь имыкъугъэхэр къыхэщэгъэнхэмкIэ Министерствэм IофшIэны-шхо зэшIуехы.

Красногвардейскэ ыкIи Мыекъопэ районхэм япащэхэр зыныбжь имыкъугъэхэм хабзэу щыIэр амыукъоным фэгъэхьыгъэ Iофтхьабзэхэу зэшIуахыхэрэм къатегущыIагъэх. КъумпIыл Мурат муниципалитетхэм япащэ­хэм пшъэрышъ афишIыгъ ашъхьэкIэ а Iофыгъом изытет лъы­плъэхэзэ ашIынэу.

Муниципалитетхэмрэ ведомствэ гъэнэфагъэхэмрэ япащэхэр мы Iофым чанэу къыхэгъэлэжьэгъэнхэ фае. ТикIэлэцIыкIухэм апэ илъым, къяжэрэм зэкIэхэми икъоу тигъэгумэкIын фае. КIэлэцIыкIу гъэсэгъуаекIэ за­джэ­хэрэр щыIэныгъэ гъогу тэрэзым тещэгъэнхэм пае ищыкIэгъэ амалхэр зэкIэ тиIэх», — къы­Iуагъ Адыгеим и ЛIышъхьэ.

Ащ нэужым цIыфхэр зыщы­псэу­хэрэ унэхэу фэтэрыбэу зэхэтхэм зиIахь ахэлъхэм яфитыныгъэхэр зыпкъ игъэуцожьыгъэнхэм иIофыгъо хэплъагъэх. АР-м псэо­лъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан ащ фэгъэхьыгъэу къэгущыIагъ.

Ащ къызэрэхигъэщыгъэмкIэ, фэтэрыбэу зэхэт унэ 36-мэ яшIын республикэм щэкIо. ­Адыгэ Республикэм псэолъэшIынымкIэ и Министерствэ анахь гумэкIыгъо къызпытэджэрэ псэуалъэхэм якъыгъэхэщынкIэ Iофыгъуабэ зэшIуехы. Ащ фэдэ псэуалъэхэм ренэу анаIэ атырагъэты, Iофхэм язытет тэрэзэу зэшIохыгъэ хъуным пае гъогу картэкIэ за­джэхэрэр зэхагъэуцох.

Фэтэрыбэу зэхэт унэхэм яшIын лъыплъэрэ къэралыгъо инспекциехэм ащкIэ Iофхэр зэшIохыгъэ зэрэхъухэрэм, псэуа­лъэхэм яшIын зэрэлъы­кIуатэрэм анаIэ тырагъэты, къыхигъэщыгъ гъэIорышIапIэм ипащэ игуадзэу Илона Крав­цовам.

Республикэм ипащэ фэтэ­рыбэу зэхэт унэхэм яшIынкIэ шапхъэхэр укъуагъэ мыхъунхэм пхъашэу лъыплъэнхэу пшъэрылъ къыгъэуцугъ.

АР-м и ЛIышъхьэ ипресс-къулыкъу