ЧIыпIэ зэфэшъхьафхэм хэкIыр зэращыратэкъухьэрэм гумэкIыгъуабэ къызэрэпыкIырэм иIофыгъо Адыгэ Республикэм и ЛIышъхьэу КъумпIыл Мурат министрэхэм я Кабинет изэхэсыгъохэм бэрэ къащеIэты. ЦIыф­хэм зызыщагъэпсэфырэ чIыпIэхэм, мэзхэм хэкIэу ахэлъыр бэдэд.

Мы Iофыгъом фэгъэзэгъэ ор­ганизациехэм япшъэрылъхэр нахь тэрэзэу зэрагъэцэкIэн, ищыкIагъэ хъумэ студентхэр, кIэлэеджакIохэр, общественнэ организациехэм ялIыкIохэр зыхэлэжьэрэ шIыхьафхэр зэхащэхэзэ ашIын зэрэфаер рес­публикэм ипащэ зэхэсыгъохэм къащеIо.

АР-м и ЛIышъхьэу КъумпIыл Мурат пшъэрылъ къызэрафишIыгъэм тетэу Адыгэ Респуб­ликэм икъалэхэм ыкIи иму­ниципальнэ образованиехэм зэкIэми шэмбэт шIыхьафхэр ащыкIуагъэх.

Iофтхьабзэм хэлэжьагъэх шъолъырым ихэбзэ къулыкъу­хэм, къэлэ предприятиехэм ыкIи учреждениехэм, общественнэ ыкIи ныбжьыкIэ объединениехэм ялIыкIохэр, кIэлэеджакIохэр.

Шэмбэт шIыхьафым пшъэ­рылъ шъхьаIэу иIагъэр жьыб­гъэм зэрихьэрэ хэкIыр Iущыгъэ­ныр, джащ фэдэу зыгъэпсэфыпIэ чIыпIэхэм, саугъэт комп­лекс­хэм, гъогу напцэхэм ыкIи мэз шъолъырхэм шIоеу ащызэтырихьагъэр гъэкъэбзэгъэныр ары.

Къэлэ администрацием къызэритыгъэмкIэ, Мыекъуапэ щы­кIогъэ шэмбэт шIыхьафым зэ­кIэмкIи нэбгырэ 8300-м ехъу хэлэжьагъ. Къэлэ администрацием, ведомствэхэм, мысатыу ыкIи бюджет организациехэм яIофышIэхэр, экологием икъэу­хъумэн дэлажьэхэрэр, общест­венникхэр мы Iофтхьабзэм зэ­рищэлIагъэх.

Коммунальнэ къулыкъум ихэу­шъхьафыкIыгъэ машинэ 16 къалэм щагъэфедагъ. ЦIыфыбэ зыхэлэжьэгъэ Iофтхьабзэм хэкI кубометрэ 243-рэ къыщау­гъоигъ ыкIи ар итэкъупIэм ащагъ. Джащ фэдэу чIыгу гектар 13,3-мэ уцыжъхэр ащырачыгъэх.

Хабзэ зэрэхъугъэу, илъэс къэс къэбзэныгъэм имазэ епхыгъэ Iофтхьабзэр гъэтхапэм ра­гъа­жьэшъ, жъоныгъокIэ мэфэкI ма­фэхэм нэс республикэм щэкIо.

Мазэм къыкIоцI псэупIэхэр санитар шапхъэхэм адиштэу агъэкъабзэх, амыгъэнэфэгъэ хэкIитэкъупIэхэр аукъэбзых. Арэу щытми, зыхэм агъэкъэ­бзагъэр, гукъау нахь мышIэми, нэмыкIхэм ауцIэпIыжьын алъэ­кIыщт. Ащ фэдэ мыхъуным пае, зэкIэри зэдеIэжьхэзэ, мы гумэкIыгъом идэгъэзыжьын дэлэ­жьэнхэ фае. КъызэтынэкIыгъэ хэкIыр тэр-тэрэу Iутымыхы­жьымэ, къэбзэныгъэм тызэ­рэпэчыжьэщтыр, типсауныгъэкIэ ащ иягъэ къызэрэтэкIыщтыр къэшIэгъуаеп.

КIАРЭ Фатим.