Общественнэ ыкIи къэралыгъо IофышIэшхоу щытыгъэ Бэрэтэрэ ТIалый Аскэр ыкъор бэрэ зэсы­мэджэ нэуж илъэс 74-м итэу гъэтхапэм и 24-м 2023-рэ илъэ­сым идунай ыхъо­жьыгъ.

Теуцожь районымкIэ къуаджэу Гъобэ­къуае 1950-рэ илъэсым щылэ мазэм и 22-м ар къыщы­хъугъ. 1975-рэ илъэсым Пшызэ къэра­лыгъо университетым июридическэ факультет дэгъу дэдэу къыухыгъ. Урысые Федерацием юстициемкIэ и Министерствэ, Iоф щишIагъ, народнэ хьыкумышIэу, Теуцожь район хьыкумым итхьаматэу, Теуцожь район юридическэ консультацием ипащэу щытыгъ, очылхэм я Краснодар краевой коллегие и Президиум хэтыгъ.

1992-рэ илъэсым къыщыублагъэу Адыгэ Республикэм и Къэралыгъо Совет — Хасэм апэрэ ыкIи ятIонэрэ зэIугъэ­кIэгъухэмкIэ идепутатыгъ. ХэбзэгъэуцунымкIэ, цIыфым ифитыныгъэхэмкIэ комитетым пэщэныгъэ дызэрихьагъ. Адыгэ Республикэм и Конституционнэ комиссие хэтыгъ. Урысые Федерацием и Конституцие ипроект зэхагъэуцо ыкIи тегущыIэхэ зэхъум Москва щыкIогъэ Конституционнэ зэIукIэм иIофшIэн хэлэжьагъ, Федеральнэ ЗэIукIэм и Къэралыгъо Думэ ипарламент едэIунхэм, конституционнэ фитыныгъэмрэ конституционнэ правосудиемрэ яIофыгъохэмкIэ урысые ыкIи дунэе зэIукIэхэм ахэлэжьагъ. Адыгэ Республикэм и Конституцие изэхэгъэуцонрэ иштэнрэ иIахьышхо ахишIыхьагъ. Республикэм игъэцэкIэкIо ыкIи ихэбзэихъухьэ къулыкъу зэфэшъхьафхэм, Адыгеим и Конституционнэ хьыкуми зэрахэтэу, язэхэщэн чанэу ар хэлэжьагъ. «Образцы документов Государственного Совета — Хасэ Республики Адыгея» зыфиIорэ тхылъыр ыкIи нэмыкI IофшIагъэхэр къыдигъэкIыгъэх. ТIалый Аскэр ыкъом хабзэм игъэцэкIэкIо ыкIи иунэшъошI къулыкъухэм щэIэфэ иIахь ахишIыхьагъ, Адыгэ Рес­публикэм истатус правовой лъэныкъомкIэ гъэпытэжьыгъэным ишъыпкъэу дэлэжьагъ.

Адыгэ Республикэм и Къэралыгъо Совет — Хасэм и Тхьаматэ игодзагъ, и Конституционнэ хьыкум и Тхьамэтагъ, Адыгэ Республикэм и Президентрэ Адыгэ Республикэм иминистрэхэм я Кабинетрэ я Администрацие ипэщагъ. Зыхэтхэм, зыдэлажьэхэрэм шъхьэкIэфэныгъэ ин ащ къыфашIыщтыгъ. ЦIэ лъапIэу «Урысые Федерацием изаслуженнэ юрист» зыфиIорэр, ведомствэ тхылъыбэ джащ фэдэу къыратыгъ. Адыгэ Республикэм и Парламент и Щытхъу тамыгъэу «Закон, Пшъэрылъ. ЦIыфыгъ» зыфиIорэр къыфагъэшъошагъэх. ЫныбжьыкIэ зигъэпсэфынэу къызытефэми, республикэм иобщественнэ щыIакIэ чанэу ар хэлэжьагъ. Адыгэ Республикэм и Апшъэрэ хьыкум ивете-ранхэм я Совет итхьамэтагъ. Икъоджэ гупсэ щызэхащэрэ общественнэ Iофтхьэбзэ пстэуми чанэу ахэлэжьагъ. Лъфы-гъищ ыпIугъ.

Iоф дэзышIагъэхэм, иныбджэгъугъэхэм Iэдэбныгъэ, гукIэгъу зыхэлъ, IофшIэнымкIэ къогъанэ зимыIэгъэ цIыфэу ар агу къинэщт.

Адыгэ Республикэм инахьыжъхэм я Советрэ иветеранхэм я Советрэ Бэрэтэрэ ТIалый Аскэр ыкъор зэрэщымыIэжьыр гухэкIышхо ащыхъугъ ыкIи зидунай зыхъожьыгъэм иIахьыл­хэмрэ къыпэблагъэхэмрэ афэтхьаусыхэх.

ГъукIэлI Нурбый. АР-м инахьыжъхэм я Совет итхьамат.

Къоджэ Аслъан. АР-м иветеранхэм я Совет итхьамат.