Лъэпкъ гвардием хэтхэм афэгушIуагъэх
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Муратрэ Адыгэ Республикэм и Къэралыгъо Совет — Хасэм и Тхьаматэу Владимир Нарожнэмрэ Урысыем илъэпкъ гвардие идзэхэм я МафэкIэ афэгушIуагъэх:
Урысыем илъэпкъ гвардие иIофышIэхэу лъытэныгъэ зыфэтшIыхэрэр!
Шъуисэнэхьат епхыгъэ мэфэкIым — Урысые Федерацием илъэпкъ гвардие идзэхэм я Мафэ фэшI тышъуфэгушIо!
Урысые гвардием идзэкъулыкъушIэхэу тиреспубликэрэ хэгъэгумрэ мамырныгъэрэ рэхьатныгъэрэ арылъынхэмкIэ пшъэрылъэу яIэхэр зэрифэшъуашэу зыгъэцакIэхэрэм лъытэныгъэ ин зэрафытиIэр мы мафэм къыхэдгъэщы тшIоигъу.
Лъэпкъ гвардием идзэхэм ахэтхэр терроризмэм ыкIи экстремизмэм апэуцужьых, общественнэ рэхьатныгъэр, цIыфым ифитыныгъэхэмрэ ифедэхэмрэ якъэухъумэн яIахьышхо хашIыхьэ.
Урысые Федерацием илъэпкъ гвардие идзэхэм я Федеральнэ къулыкъу и ГъэIорышIапIэу республикэм щыIэм ыкIи а ведомствэм иветеранхэм инэу тафэраз зыфэгъэзэгъэ Iофым зэрэфэшъыпкъэхэм, яхэгъэгу шIу зэралъэгъурэм, IэпэIэсэныгъэ ин зэрахэлъым, апсэ емыблэжьхэу зэрифэшъуашэу къулыкъур хьыгъэным анаIэ зэрэтырагъэтырэм фэшI. ЗэкIэми тышъуфэлъаIо псауныгъэ пытэ, щыIэкIэшIу шъуиIэнэу, шъуиIофшIэн гъэхъагъэхэр щышъушIынхэу, шъо шъушъхьэкIи къышъупэблагъэхэмкIи насыпрэ щыIэкIэшIурэ шъуиIэнэу!