Спортсмен ныбжьыкIэхэр зэнэкъокъугъэх
ДзюдомкIэ Урысые зэнэкъокъухэр Адыгеим щыкIуагъэх. СпортымкIэ заслуженнэ мастерэу, Олимпийскэ чемпионэу Арсен Галстян ыцIэкIэ агъэнэфэгъэ шIухьафтынхэм зыныбжь илъэс 18-м шIомыкIыгъэ спортсмен ныбжьыкIэхэр афэбэнагъэх.
Мыщ икъызэIухын фэгъэхьыгъэ зэхахьэу спортивнэ комплексэу «Ошъутенэм» щыкIуагъэм хэлэжьагъ ыкIи къэзэрэугъоигъэхэм шIуфэс гущыIэхэмкIэ закъыфигъэзагъ Адыгеим и ЛIышъхьэу КъумпIыл Мурат.
— Тиолимпийскэ чемпионэу Арсен Галстян ыцIэкIэ мы турнирыр зэрэзэхащагъэр лъэшэу тигуапэ. Тиспортсмен цIэрыIо апэрэ лъэбэкъухэр зыщишIыгъэр Адыгеир ары. Я XX-рэ лIэшIэгъум итренер анахь дэгъоу алъытэгъэ ыкIи дунаим щызэлъашIэрэ дзюдомкIэ Мыекъопэ еджапIэр зыгъэпсыгъэ Кобл Якъубэ тибэнакIохэм гъэхъэгъэшIухэр ашIынхэм иIахьышхо хэлъ. А лIыкIохэм зэу ащыщ А. Галстян. Адыгеим зыщызыгъэсэрэ ныбжьыкIэхэм Арсен ищысэ яIэубытыпIэу лъэгэпIэ инхэм анэсынхэм зэрэфэбэнэщтхэм сицыхьэ телъ. Урысыем идзюдоистхэр зэкIэми анахь дэгъугъэх, тапэкIи арэущтэу щытын фае, — къыIуагъ КъумпIыл Мурат.
Адыгеим и ЛIышъхьэ къызэрэхигъэщыгъэмкIэ, шъолъырым Урысые мэхьанэ зиIэ зэнэкъокъухэр бэу щызэхащэх, илъэс къэс ахэм япчъагъэ хэхъо. Мы спорт лъэпкъым республикэм мэхьанэшхо щыраты, зэлъашIэрэ дзюдоистхэм ащыщыбэхэм Адыгеим защагъэсагъ, апэрэ гъэхъагъэхэр щашIыгъэх.
Зэнэкъокъум ихьэкIэ лъэпIагъэх олимпийскэ чемпионхэу Арсен Галстян, Мудрэнэ Бислъан, Минсур Исаевыр. Урысыем ишъолъыр 14-мэ – Санкт-Петербург, Марий Эл, Къэбэртэе-Бэлъкъар ыкIи Къэрэщэе-Щэрджэс республикэхэм, Краснодар ыкIи Ставрополь крайхэм, Къырым, Темыр Осетием, Дагъыстан, Чэчэным, Ингушетием, Белгород ыкIи Ростов хэкухэм яспортсмен 217-мэ заушэтыгъ. Адыгеир нэбгырэ 81-мэ къагъэлъэгъуагъ, ар зэкIэмэ анахь командэ иныгъ.
Анахь дэгъоу зыкъэзыгъэлъэгъуагъэр Краснодар краим икоманд ары, мыщ илIыкIохэм зэкIэмкIи медали 9 къахьыгъ, ахэм ащыщэу 5-р — дышъэх. Апэрэ чIыпIэр гъогогъуитIу зырызэ къыдахыгъ Къэбэртэе-Бэлъкъарым ыкIи Ингушетием яспортсменхэм. Адыгеим ибэнакIохэм хагъэунэфыкIырэ чIыпIи 5 къыдахыгъ. ЯтIонэрэ хъугъэ Бэгъ Салим, ящэнэрэр къахьыгъ Байкъул Аслъан, Максим Грищук, Джарым Ибрахьим ыкIи Максим Гонскоим.