Урысые Федерацием и ДОСААФ икъутамэу Адыгэ Республикэм щыIэм и Совет ия VI-рэ Пленум Мыекъуапэ щыкIуагъ. 2022-рэ илъэсым иIофшIагъэ ащ щызэфахьысыжьыгъ, 2023-мкIэ пшъэрылъхэм атегущыIагъэх.

Iофтхьабзэм хэлэжьагъэх Адыгеим и ДОСААФ илъыплъэкIо Совет хэтхэр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет, Адыгэ Республикэм иветеранхэм я Совет, АР-м и Общественнэ палатэ ялIыкIохэр, организацием икъутамэхэу районхэм ащыIэхэм япащэхэр ыкIи ныбжьыкIэхэр, къэбарлъыгъэIэс амалхэр.

Адыгеим и ДОСААФ итхьаматэу Барцо Тимур изэфэхьысыжьхэм къащыхигъэщыгъ адрэ илъэсхэм афэдэу 2022-рэ илъэсми хэхъоныгъэхэр зэрашIыгъэхэр. Урысые Федерацием итхэм ябгъапшэмэ, Адыгеим щыIэр анахь дэгъухэм ахалъытэ. Къыхэгъэщыгъэн фае, Урысыем и ДОСААФ икIыгъэ илъэсым зэфэхьысыжьхэр зешIым, Адыгеим икъутамэ зыхэхьэрэ купым а 1-рэ чIыпIэр къызэрэщыдихыгъэр.

— БлэкIыгъэ илъэсхэм афэдэу тиIофшIэн нахь дэгъоу зэрэдгъэцэкIэщтым тыпылъыгъ, — къыIуагъ ащ. — 2022-рэ илъэсыр тарихъ хъугъэ-шIагъэхэмкIэ баигъэ ыкIи ахэр зэрифэ-шъуашэм тетэу хэдгъэунэфыкIыгъэх. Пшъэрылъ шъхьаIэу тиIагъэхэри къэнэжьыгъэх, ахэм ащыщ ныбжьыкIэхэм яхэгъэгу шIу алъэгъоу пIугъэнхэр, дзэучет сэнэхьатхэм, спорт лъэпкъ зэфэшъхьафхэм афэгъэсэгъэнхэр.

Барцо Тимур къызэриIуагъэмкIэ, Адыгеим зыкъэухъумэжьынымкIэ иорганизацие хэтхэр нахьыбэ шIыгъэнымкIэ агъэнэфэгъэ пшъэрылъыр проценти 100-м ехъоу агъэцэкIагъ. Мы мафэхэм ехъулIэу мы структурэм зы шъолъыр отделение, чIыпIэ къутэми 9 ыкIи егъэджэн учреждении 2 хэхьэх. Дзэпатриотическэ пIуныгъэм ылъэныкъокIэ агъэнэфэгъэ Iофтхьабзэхэр проценти 100-м нэсэу зэшIуахыгъэх.

Адыгеим и ДОСААФ икъутамэхэу республикэм икъалэхэм, ирайонхэм ащыIэхэм япчъагъэ хэхъо, чIыпIэхэм ублэпIэ организациехэр ащызэхащэх, ахэр 174-рэ мэхъух. Мыекъопэ гарнизоным икъулыкъушIэхэм ныбжьыкIэхэр аIуагъакIэх. ЦIыфхэмрэ дзэмрэ языкIыныгъэ гъэпытэгъэным фэгъэхьыгъэ зэхахьэхэр нахь гъэшIэгъон шIыгъэнхэм фэшI мэфэкIхэр, хъугъэ-шIагъэхэм япхыгъэ зэIукIэгъухэр зэхащэх.

— 2022-рэ илъэсымкIэ типшъэрылъ шъхьаIэхэр дгъэцэкIагъэх. Ахэм ащыщых ныбжьыкIэхэм яхэгъэгу шIу алъэгъоу пIугъэнхэр, дзэ-учетнэ сэнэхьатхэм, спорт лъэпкъ зэфэшъхьафхэм афэгъэсэгъэнхэр, юнармейцэхэм япчъагъэ хэгъэхъогъэныр, нэмыкIхэри. «ЕгъэшIэрэ полк», «ШIэжьым иостыгъ», «Къырым игъатх» зыфиIорэ шIэжь зэхахьэхэм илъэс къэс заушъомбгъу. ЦIыф пчъагъэу ахэлажьэрэр нахьыбэ зэрэхъурэм дакIоу, пIуныгъэ мэхьанэу яIэм зыкъеIэты, — игущыIэ лъигъэкIотагъ Барцо Тимур.

Республикэ ДОСААФ-м ныбжьыкIэхэр дзэ къулыкъум фэгъэхьазырыгъэнхэм, лIыхъужъ ыкIи лэжьэкIо щытхъум япхыгъэ чIыпIэхэр зэрагъэлъэгъунхэм, спорт щэрыонымкIэ зэнэкъокъухэр зэрэзэхащагъэхэм, ГТО-м ишапхъэхэр игъэкъугъэнхэм кIэлэеджакIохэр зэрэхэлажьэхэрэм, нэмыкIхэм Барцо Тимур къатегущыIагъ. Анахьэу къыхигъэщыгъэр ныбжьыкIэхэм агу етыгъэу дзэ къулыкъум зыфагъэхьазырынымкIэ амалхэм зэралъыхъухэрэр, лIэужхэр зэзыпхырэ Iофтхьабзэхэр щыIэныгъэм зэрэдиштэхэрэр ары. Армейцэ цIыкIухэм якупхэр еджапIэхэм ащызэхащэх. ЛIыхъужъхэм ясаугъэтхэм адэжь щыкIорэ зэIукIэхэр щыIэныгъэм иджэмакъэх.

Нэужым ДОСААФ-м хэхьагъэхэм Барцо Тимур афэгушIуагъ, ар къэзыушыхьатырэ тхылъхэр аритыжьыгъ.

Республикэм имуниципальнэ образованиехэм ащыIэ организацием икъутамэхэм яIофшIэн къызэтырагъэуцуагъэп, япшъэрылъ шъхьаIэхэр икъоу агъэцэкIагъэх. Дзэ-учетнэ сэнэхьатхэмкIэ нэбгыри 126-рэ агъэхьазырыгъ (проценти 104-м нэсэу), техническэ сэнэхьатхэмкIэ пшъэрылъыр процент 94,04-м нэсэу агъэцэкIагъ. Шъолъыр къутамэм исатыр нэбгырэ 4650-рэ икIыгъэ илъэсым къыхэхьагъ.

Дзэ-патриотическэ пIуныгъэм ылъэныкъокIэ агъэнэфэгъэ Iофтхьабзэхэр проценти 100-м нэсэу зэшIуахыгъэх. Урысыем и ДОСААФ идзэ-патриотическэ клубхэм я Ассоциацие IофшIэныр лъигъэкIотагъ.

Iофыгъоу зыхэплъагъэхэм ащыщ авиационнэ, техническэ, дзэ къулыкъу ыкIи нэмыкI спорт лъэпкъхэм республикэм хэхъоныгъэ щашIыныр. Мы лъэныкъохэмкIэ тиспортсмен ныбжьыкIэхэм 2022-рэ илъэсым гъэхъэгъэшIухэр ашIыгъэх. ГущыIэм пае, Дзэ дунэе джэгунхэм яреспубликэ едзыгъо Мыекъопэ дзэ-патриотическэ клубэу «Вертикаль» зыфиIорэм текIоныгъэр къыщыдихыгъ.

2023-рэ илъэсым пшъэрылъэу зыфагъэуцужьыхэрэм зэхэсыгъом щатегущыIагъэх. Урысыем и ДОСААФ епхыгъэ, шъолъыр къутамэхэм, гъэсэныгъэм иучреждениехэм, авиационнэ, спорт ыкIи нэмыкI организациехэм финанс-экономикэ зыпкъитыныгъэ яIэным дэлэжьэщтых. Джащ фэдэу ныбжьыкIэхэм япатриотическэ пIуныгъэкIэ пшъэрылъыр гъэкIэжьыгъэным, социальнэ институтхэм Iоф адэшIэгъэным, нэмыкIхэми анаIэ атырагъэтыщт.

КIэухым ДОСААФ-м иIофшIэн чанэу хэлэжьагъэхэм юбилейнэ медальхэр, щытхъу тхылъхэр аратыгъэх. КъекIокIырэ Кубокыр Кощхьэблэ район къутамэм фагъэшъошагъ (тхьаматэр Бзэсэжъ Рэщыд).

КIАРЭ Фатим. Сурэтхэр: А. Iэшъынэр.