Адыгэ къэралыгъо университетым истудент 400-м ехъумэ IT-м епхыгъэ сэнэхьат тедзэ ыпкIэ хэмылъэу зэрагъэгъоты.

Университетым илIыкIохэм ар къафаIотагъ «Цифрэ кафедрэм имарафон» зыфиIорэ Урысые зэнэкъокъоу рагъэкIокIырэм хэлажьэхэрэм.

Программэ пэрытэу «Приоритет 2030» зыфиIорэр зыгъэцэкIэрэ апшъэрэ еджапIэхэр ары марафоным хэлэжьэнхэу фитыныгъэ зиIэхэр. Федеральнэ проектэу «IТ лъэныкъом щылэжьэщт IофышIэхэр зэгъэгъотыгъэнхэр» зыфиIорэм елъытыгъэу проектэу «Цифрэ кафедрэхэр» агъэцакIэ, ащ ишIуагъэкIэ студентхэм ыпкIэ хэмылъэу сэнэхьат тедзэр зэрагъэгъотын алъэкIы.

Апшъэрэ еджапIэм чIэс студентхэу нэмыкI сэнэхьатхэм афеджэхэрэми IT-м ылъэныкъокIэ шIэныгъэ тедзэ зэрагъэгъотышъущт. Ау ежь IT-м фэгъэзагъэу еджэхэрэм джыри нахь шIэныгъэ куу къаратыщт, нахь IэпэIэсэныгъэ ин къахалъхьащт. Алгоритмизациемрэ программированиемрэ афэгъэхьыгъэ шIэныгъэу апэ зыфагъасэхэрэр IT-м фэмыгъэзэгъэ студентхэми арагъэшIэщт.

«Цифрэ кафедрэм имарафон» гъэтхапэм и 13-м рагъэжьагъ, гъэтхапэм и 31-м нэс кIощт, ар къалэхэу Москва, Санкт-Петербург, Новосибирскэ, Екатеринбург, Ростов-на-Дону, Нижний Новгород ыкIи нэмыкI чIыпIэхэм ащырагъэкIокIы. Апшъэрэ еджапIэхэм якIэлэегъаджэхэмрэ студентхэмрэ я «Цифрэ кафедрэхэр» зэрагъэпсыгъэхэр, егъэджэнхэр зэрэзэхащэхэрэр ыкIи гъэсэныгъэ программэхэу зэхагъэуцохэрэр зыфэдэхэр къаIуатэх.

Марафоным изэхэщакIор университетэу Иннополис, ащ иIэпыIэгъух УФ-м цифрэмкIэ и Министерствэ, УФ-м шIэныгъэмрэ апшъэрэ гъэсэныгъэмрэкIэ и Министерствэ, лъэпкъ проектэу «Цифрэ экономикэр» ыкIи нэмыкIхэр. «Цифрэ кафедрэм имарафон» зэрэкIорэм онлайн шIыкIэм тетэу хэти еплъын ылъэкIыщт, ащ пае проектым исайт ухэхьан фае.

Гъэтхапэм и 20-м къалэу Ростов-на-Дону Адыгэ къэралыгъо университетым икIыгъэ купыр марафоным щыхэлэжьагъ, къыщыгущыIагъэх. Ахэр: проектым ипащэу Виктория Бучацкаяр, алгоритмизациемрэ автоматизациемрэ афэгъэхьыгъэ программэм ипащэу Семен Теплоуховыр ыкIи филологиемкIэ факультетым ия 3-рэ курс щеджэрэ Оксана Попадия.

Ежьхэм зэхагъэуцогъэ программэхэу «ХъызмэтшIапIэмэ ябизнес Iофхэр гъэIорышIэгъэнхэр:IС» зыфиIорэр ыкIи алгоритмизациемрэ автоматизациемрэ афэгъэхьыгъэм марафоным хэлажьэхэрэр щагъэгъозагъэх. Апэрэ программэмкIэ студент 66-рэ рагъаджэ, ятIонэрэмкIэ нэбгырэ 370-рэ. Проектым игъэпсын, игъэцэкIэн япхыгъэ Iофхэм университетым икIыгъэ купыр игъэкIотыгъэу къатегущыIагъ, упчIэхэм яджэуапхэр аратыжьыгъэх.

Адыгэ къэралыгъо университетым ипресс-къулыкъу