Гъэтхапэм и 23-м АР-м и Лъэпкъ тхылъеджапIэ республикэ гъэзетэу «Адыгэ макъэр» къызыдэкIырэр илъэси 100 зэрэхъугъэм фэгъэхьыгъэ зэхахьэ щыIагъ. Ащ гъэзетым иIофышIэхэр хэлэжьагъэх.

Лъэпкъ гъэзетым илъэси 100 гъогур мытхъытхъэу къыкIугъ. Гъэзетым инэкIубгъохэм Адыгэ Республикэм ищыIэкIэ-псэукIэ лъэныкъуабэкIэ тарихъ шъыпкъагъэр алъапсэу, гъунджэм фэдэу, тапашъхьэ къырагъэуцо.

Тилъэпкъ культурэ хэхъоныгъэ ышIынымкIэ, адыгабзэр къызэтегъэнэгъэнымкIэ, адыгэ литературабзэр уцунымкIэ «Адыгэ макъэм» IофшIэгъэшхо зэриIэм, джырэ уахътэми ипшъэрылъ ин егугъоу зэригъэцакIэрэм зие адыгэ лъэпкъымкIэ мэхьанэшхо зэриIэр кIигъэтхъэу зэхахьэр гъэпсыгъагъэ.

МэфэкIыр дахэу зэрищагъ АР-м и Лъэпкъ тхылъеджапIэ иIофышIэ шъхьаIэу Кучмэз Аминэт.

— Адыгэ Республикэм илэгъу шъыпкъэу, «Адыгэ макъэу» илъэси 100-р хэзыгъэунэфыкIырэм имэфэкI къеблэгъагъэх республикэм икъэралыгъо къулыкъу зэфэшъхьафхэм – культурэмкIэ Министерствэм, Адыгэ Республикэм и Къэралыгъо Совет – Хасэм ныбжьыкIэ IофхэмкIэ икомитет, АР-м иобщественнэ движениеу «Адыгэ Хасэм», гъэсэныгъэмрэ шIэныгъэмрэкIэ Министерствэм, гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм, КъокIыпIэм щыпсэурэ лъэпкъхэм яискусствэкIэ

Къэралыгъо музеим икъутамэу Мыекъуапэ дэтым, партиеу «Единэ Россием» икъутамэу Адыгеим щыIэм ыкIи мыхэм анэмыкIхэм ялIыкIохэр.

АР-м культурэмкIэ иминистрэ игуа— дзэу Кушъу Светланэ пстэуми апэу гъэзетым иилъэси 100 мэфэкIкIэ псэлъэ фэбэ кIэкI къышIыгъ ыкIи къафэгушIуагъ, АР-м и ЛIышъхьэу КъумпIыл Мурат и Рэзэныгъэ тхылъ гъэзетым изэдзэкIакIоу ЛIышэ Санет ритыжьыгъ. Джащ фэдэу «Адыгэ макъэм» иобозревателэу, лъэпкъ культурэр, литературэр, тарихъыр къизыIотыкIэу, тхыгъэ зэфэшъхьафыбэр къызIэкIэкIэу Мамырыкъо Нуриет лъэпкъ усакIоу Теуцожь Цыгъо имедалэу фагъэшъошагъэр IэкIигъэхьажьыгъ.

АР-м и Къэралыгъо Совет – Хасэм гъэсэныгъэмкIэ икомитет итхьаматэу Шэуджэн Тембот АР-м и Парламент ыцIэкIэ илъэсыбэ хъугъэу гъэзетым ишIын-къыдэгъэкIын фэлажьэхэрэ IофышIэхэу Беджэлд Асиет, Сетэ Фатимэ, Нэгъой Сафыет щытхъу тхылъхэр аритыгъэх.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет щытхъу тхылъхэмкIэ къыхигъэщыгъэх гъэзетым ибухгалтерэу Шъхьэлэхъо Светэ, корректорэу КIэмэщ Фатимэ, хэутакIоу Нэфышъ Светэ ыкIи секретарэу АкIэгъу Фатимэ.

АР-м гъэсэныгъэмрэ шIэныгъэмрэкIэ и Министерствэ Щытхъу тхылъ фигъэшъошагъ журналистэу Делэкъо Анетэ.

Цифрэ хэхъоныгъэмкIэ АР-м и Министерствэ и Рэзэныгъэ тхылъхэр къафагъэшъошагъ компьютерымкIэ отделым щылажьэхэу Ацумыжъ Хьилымрэ Константин Романцовымрэ.

Партиеу «Единэ Россием» АР-мкIэ икъутамэ игъэцэкIэкIо комитет ипащэу АфэшIэгъо Рэмэзан журналист чанэу, общественнэ IофышIэу Тхьаркъохъо Адам Щытхъу тхылъ къыритыгъ. Урысыем щыпсэурэ лъэпкъ зэфэшъхьафыбэм абзэ ухъумэгъэныр ыкIи хэгъэхъогъэн фаеу УФ-м и Президентэу В. Путиным зэрэкIигъэтхъырэм зэрэдыри— гъаштэрэр ащ къыIуагъ, гъэзетэу «Адыгэ макъэм» нэмыкI пстэоу къэгущыIагъэхэм афэдэу, гъэхъагъэхэмкIэ къыфэлъэIуагъ.

АР-м и Адыгэ Хасэ хэтэу Хъот Юныс адыгэ гущыIэр зыухъумэу, зылэжьэу, гъэзетым ижурналистхэм, ипащэхэм ыкIи иIофышIэхэм псэлъэ фабэ къафиIуагъ, Хасэм ыцIэкIэ щытхъу тхылъхэр «Адыгэ макъэм» иредактор шъхьаIэу МэщлIэкъо Саидэ, корреспондентэу Шъаукъо Аслъангуащэ, хэутакIохэу Нешэ Светэ, Хъымыщ Марзет аритыгъэх.

МэфэкI шIухьафтынхэр къэзылэжьыгъэхэм заратыжьым ыуж лъэпкъ гъэзетым, анахьэу адыгабзэм иIофыгъохэм язытет, зыфагъэзагъ. Ныдэлъфыбзэр кIодыжьыпэным ищынагъо зэхашIэу ащкIэ шIэгъэн фаеу алъытэрэ лъэныкъохэм, Iофыгъохэм чанэу къатегущыIагъэх шIэныгъэлэжьхэу ЩэшIэ Щамсэт, Агъыржьанэкъо Симхъан, культурэмкIэ министрэм игуадзэу Кушъу Светланэ, КъокIыпIэм щыпсэурэ лъэпкъхэм яискусствэкIэ Къэралыгъо музеим ипащэу ШъэуапцIэкъо Аминэт, МэщлIэкъо Саидэ, апэрэ гущыIэр мыщкIэ къезыщажьи, гупшысэр ишъыпкъэу кIэзыщыгъэу МэщфэшIу Нэдждэт, Тэу Аслъан, ЦIыкIушъо Аслъан. Адыгабзэр зылэжьырэ ыкIи ащ мафэ къэс рылэжьэрэ гъэзетэу «Адыгэ макъэм» ишIушIагъэ кIагъэтхъыгъ, зышъхьэ уасэ фэзышIыжьырэм ыбзи ихабзи сыдигъуи афэсакъэу зэриухъумэрэр, адыгабзэм икъызэтегъэнэн хэгъэхъонкIэ зэдеIэнхэшъ, Iоф ашIэн гухэлъ зэряIэр къыхагъэщыгъ.

ДЗЭУКЪОЖЬ Нуриет. Сурэтхэр: Лъэпкъ тхылъеджапIэр, А. Лаутеншлегер.