2022-рэ илъэсым Гупчэу «Мой бизнес» зыфиIорэм фэгъэкIотэныгъэ зиIэ займэу ытыгъэхэмкIэ зэфэхьысыжьхэр ышIыгъэх. Сомэ миллион 500 зыосэ фэгъэкIотэныгъэ займ 230-рэ атын алъэкIыгъ, ахэм ащыщэу 46-р ежь-ежьырэу зыфэлэжьэжьыхэрэм атефагъ.

— Мэкъумэщ лъэныкъом, унэ фэIо-фашIэхэр зыгъэцакIэхэрэм, щэн-щэфыным пылъхэм займэ анахьыбэрэ аратыгъ, — къыIотагъ «Предпринимательствэм IэпыIэгъу фэхъугъэнымкIэ Адыгэ Республикэм и Фонд» иIофышIэ.

Ащ нэфэшъхьафэу, Гупчэм иIофышIэхэр упчIэжьэгъу афэхъугъэх гурыт ыкIи бизнес цIыкIум хэт нэбгырэ 500-мэ, IофшIэпIэ чIыпIэ 806-рэ къагъэнэжьыгъ, IофшIэпIэ чIыпIэкIи 107-рэ агъэпсыгъ.

АР-м и Правительствэ къызэрэщаIуагъэмкIэ, Адыгеим бизнесым ущыпылъыныр нахь Iэрыфэгъу мэхъу. Адыгэ Республикэм ирайон пэпчъ «Мой бизнес» зыфиIорэ гупчэхэр итых, сатыум пылъхэм IэпыIэгъу ащафэхъух, фэIо-фэшIэ зэфэшъхьафхэр ащагъэцакIэ.

— Лъэпкъ проектэу «Гурыт ыкIи предпринимательствэ цIыкIур» зыфиIорэм тишъолъыр зэрэхэлажьэрэм ихьатыркIэ бизнесым илIыкIохэр грантхэм якъыдэхын хэлэжьэнхэ алъэкIы, хэушъхьафыкIыгъэ егъэджэнхэм апылъых, дунэе къэгъэлъэгъонхэм ащэIэх ыкIи бизнес-планхэр зэхагъэуцох, — къыIуагъ Адыгеим и ЛIышъхьэ.

Хэбзэ къулыкъухэм Iофэу агъэцэкIагъэр лъэпкъ рейтингэу АСИ-м зэрегъапшэх, УФ-м исубъектхэм яинвестиционнэ зытети еуплъэкIу. 2022-рэ илъэсым мы лъэныкъомкIэ апэ ит шъолъыр 15-мэ Адыгеир ахэфагъ.