ЗэIухыгъэ Iахьзэхэлъ обществэу «Мегафон» зыфиIорэм къызэритырэмкIэ, икIыгъэ илъэсым Адыгэ Республикэм и Мыекъопэ район нэбгырэ 900266-рэ щыIагъ, ахэм ащыщэу зекIо къэкIогъагъэр 520386-рэ, экскурсиекIэ нэбгырэ 379880-рэ.

2022-рэ илъэсым зекIохэми янахьыбэр Адыгеим къызыкIуагъэр шышъхьэIу мазэр ары – нэбгырэ мин 94,5-рэ, щылэ мазэм — мин 83,5-рэ. Ахэм тикъушъхьэхэр зэрагъэлъэгъугъэх, къащакIухьагъ, хьакIэщхэм ачIэсыгъэх. Мэзаем къыщегъэжьагъэу гъэтхапэм нэс зекIо анахь макIэ зыщыIэрэ уахът — гурытымкIэ нэбгырэ мин 53-рэ.

— Адыгеим икъушъхьэ лъэныкъо къеблэгъэрэ хьакIэхэу чэщ-зымафэм нахьыбэрэ щыIэ хъугъэхэм япчъагъэ мы аужырэ илъэситIум хэпшIыкIэу хэхъуагъ. ЗекIохэм зызыщагъэпсэфыщт псэуалъэхэм яшIыни джары мы чIыпIэм зызкIыщырагъэушъомбгъурэр,— къыщаIотагъ зекIонымкIэ ыкIи зыгъэпсэфыпIэхэмкIэ АР-м и Комитет.

Шъугу къэдгъэкIыжьын, зекIоным ылъэныкъокIэ Адыгеим хэхъоныгъэхэр ышIынхэр зэрапхырэр экокурортэу «Лэгъонакъэр» ары. Шъолъырым ипащэ къыкIигъэтхъыгъ жэжъые-къушъхьэ экокурортым игъэпсын мэхьанэшхо зэриIэр, ащ зекIоным зыригъэушъомбгъущт къодыеп, республикэм иэкономики хигъэхъощт. Инвесторхэм къызэраIуагъэмкIэ, апэрэ едзыгъэу Лэгъо-Накъэ кIэпсэ кIэшIэгъэ гъогуи 6 щашIыщт, ахэм километрэ 25-рэ якIыхьэгъэщт, хьакIэщэу агъэуцущтмэ номер 642-рэ ахэтыщт.