Лъэпкъ проектэу «ПсэупIэр ыкIи къэлэ щыIакIэр» зыфиIорэм къыдыхэлъытэгъэ республикэ программэу жъы хъугъэу зэхэоным нэсыгъэ унэхэм ачIэсхэм ягъэкощын фэгъэхьыгъэр 2022-рэ илъэсым ыкIэхэм адэжь Адыгеим щагъэцэкIагъ.

Зигугъу къашIырэр 2017-рэ илъэсым ищылэ мазэ и 1-м ехъулIэу учIэсынкIэ щынагъоу агъэнэфэгъэгъэ унэхэр ары. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъыз­мэтымкIэ и Министерствэ къызэрэщаIуагъэмкIэ, цIыфхэр агъэкощынхэмкIэ ыкIи унакIэхэр ахэм ягъэгъотыгъэ— нымкIэ пшъэрылъэу Адыгеим къыфагъэу— цугъагъэр проценти 103-кIэ ыгъэцэкIагъ. 2023-рэ илъэсым имэзэе мазэ и 15-м зэIухыгъэ хэбзэ компанием и ГъэIорышIапIэу «Шъолъырхэм хэхъоныгъэхэр ягъэшIыгъэнхэмкIэ Фондыр» зыфиIорэм ышIыгъэ унашъом рыгъуазэхэзэ, жъы хъугъэу, зэхэоным нэсыгъэ унэхэм ачIэсхэм ягъэкощын фэгъэхьыгъэ Iоф— тхьабзэр Адыгеим игъом къыпэу щагъэ— цэкIагъ.

2017-рэ илъэсым ищылэ мазэ и 1-м ехъулIэу агъэнэфэгъэгъэ унэ 29-мэ ащыпсэущтыгъэ цIыфхэр агъэкощынхэр программэм къыдилъытэщтыгъ. Мыхъу— жьыщтэу алъытэгъэ унэхэм зэкIэмкIи квадратнэ метрэ 7865-рэ арылъыгъ, ахэм нэбгырэ 437-рэ ащыпсэущтыгъ. Iофтхьабзэм изэшIохын сомэ миллион 296,68-рэ пэIухьанэу программэм къыщыдалъытэгъагъ, ащ щыщэу сомэ миллион 255,46-р Фондым къытIупщыгъагъ.

2022-рэ илъэсым икIэухым ехъулIэу программэр зэрэпсаоу гъэцэкIагъэ хъугъэ. Мыекъуапэ пштэмэ, фэтэр 11-мэ ащыпсэущтыгъэ нэбгырэ 31-рэ агъэкощыгъ, ахэм квадратнэ метрэ 346,3-рэ аубытыщтыгъ; поселкэу Яблоновскэм щыщ нэбгырэ 27-рэ, ахэр фэтэр 15-мэ ащыпсэущтыгъэх, зэкIэмкIи квадратнэ метрэ 484,1-рэ хъущтыгъэ яунэхэр; Кощхьэблэ районымкIэ нэбгыри 185-рэ, ахэр унэ 95-мэ арысыгъэх, квадратнэ метрэ 3939,1-рэ аIыгъыгъ; Мыекъопэ районымкIэ нэбгыри 194-рэ, фэтэр 82-мэ ащыпсэущтыгъэх, квадратнэ метрэ 3095,5-рэ ахэм аубытыщтыгъ.