Врачым дэжь кIонэу зязыгъэтхы е унэм ар къэзыщэнэу фаехэр, джащ фэдэу мобилизацием хэфагъэхэм япхыгъэ упчIэхэр зиIэхэр контакт-гупчэу 122-м теонхэ алъэкIыщт.

Чэзыур къыбнэсыгъэу участковэ терапевтым е педиатрэм дэжь укIонэу щытмэ, операторым пцIэ-плъэкъуацIэ, укъызыхъугъэр епIохэмэ икъущт. Гъэтха— пэм и 6-м къыщегъэжьагъэу и 12-м нэс контакт-гупчэм телефонымкIэ гъогогъу 17483-рэ цIыфхэр теуагъэх.

Гупчэм Iоф щызышIэхэрэм зэрэхагъэу— нэфыкIыгъэмкIэ, Адыгэ Республикэм щыпсэухэрэм янахьыбэр контакт-гупчэм зыщытеохэрэр IофшIэгъу мафэхэр ары, пчэдыжьым сыхьатыр 8-м къыщегъэжьагъэу 10-м нэс. Зы сыхьатым къыкIоцI а уахътэм телефонымкIэ нэбгырэ 2000-м ехъу афытео. Сыхьатыр 10-м къыщыублагъэу 12-м нэс зы сыхьатым нэбгырэ 1300-рэ, ащ ыуж нахь макI закъыфэзгъазэрэр.

— Зигугъу къэтшIыгъэ Iофыгъохэм къахэкIэу, пчэдыжьрэ операторым уфытеоным, ар къыбдэгущыIэным фэшI гурытымкIэ такъикъи 7-м нэсэу уахътэ ехьы. Нахь псынкIэу операторым дэгущыIэ зышIоигъохэр блыпэ пчэдыжьым намыгъэсэу, а уахътэр арышъ нахьыбэр зытеорэр, гупчэм зыфагъазэмэ нахьышIу. Шъугу къэдгъэкIыжьын контакт-гупчэу 122-м пчэдыжьым сыхьатыр 8-м къыще— гъэжьагъэу пчыхьэм сыхьатыр 8-м нэс Iоф зэришIэрэр, зыгъэпсэфыгъо ыкIи мэфэкI мафэхэм пчэдыжьым сыхьатыр 8-м къыщыублагъэу мафэм сыхьатыр 2-м нэс мэлажьэх, — къыщыхагъэщыгъ псауныгъэр къэухъумэгъэнымкIэ АР-м и Министерствэ ипресс-къулыкъу.

Операторым етхы медицинэм иорганизациеу узэпхыгъэр. Зыми уемыпхыгъэ зыхъурэм, ащ врачым дэжь укIонэу ытхышъущтэп. Терапевтым е педиатрэм дэжь ущыIэгъахэ зыхъукIэ, ахэр ары лабораторнэ ыкIи диагностическэ уплъэ— кIунхэр къыуашIэнхэм фэшI узытхырэр, ащ контакт-гупчэр къыхэлэжьэжьырэп.

АР-м и ЛIышъхьэу КъумпIыл Мурат иунашъокIэ Кол-гупчэр Мыекъуапэ къыщызэIуахыгъ, ар псауныгъэр къэухъумэгъэнымкIэ АР-м и Министерствэ хэхьэрэ медицинэ къэбар-аналитическэ Гупчэм епхыгъэу мэлажьэ. А гупчэм ипащэу Саферов Александр къызэриIуагъэмкIэ, 122-рэ къулыкъум зырагъэушъомбгъущт ыкIи зыкI медицинэ Кол-гупчэ шъолъырым иIэ хъущт. Респуб— ликэ бюджетым къыхагъэкIыгъэ ахъщэм ишIуагъэкIэ IофшIэпIэ чIыпIэ 85-рэ организацием иIэ хъугъэ.