«Псыр — псэ» аIо цIыфхэм. Ары зэрэщытри. Псыр ымыгъотэу хэти щыIэн ылъэкIыщтэп. Ар къыдалъыти, псым и Мафэ илъэси 10-кIэ узэкIэIэбэжьымэ агъэнэфагъ, гъэтхапэм и 22-м ар хагъэунэфыкIы.

Пшызэ псыубытыпIэ шъо­лъырым и ГъэIорышIапIэ икъутамэу Адыгеим щыIэм ипащэу Хьатикъое Асе псым и Мафэ илъэс къэс зэрэхагъэунэфы­кIырэр къытфиIо­тагъ.

Тиреспубликэ псыхъоу, хьыкъумэу, нэмыкI псыуцупIэу итыр 973-рэ мэхъу, зэхэбгъэхъожьы­мэ ахэм якIыхьагъэ километрэ мин 23-рэ фэдизыщт.

Урысыем ишъолъырхэр зэкIэ зэбгъапшэмэ, ахэм апхырыкIырэ псыхъохэмкIэ Адыгеим апэрэ чIыпIэр еубыты. Хьыкъум 680-рэ зэрэтиIэр Урысыем шIэныгъэ­хэмкIэ и Академие хегъэу­нэ­фыкIы.

ТхылъеджапIэхэм, гурыт еджа­пIэхэм мы мафэм фэгъэ­хьыгъэ къэгъэлъэгъонхэр ащызэ­хащэх, псым мэхьэнэ ин зэри­Iэм щатегущыIэх. Анахьэу кIэлэеджакIохэм псыхъоу ти­Iэхэм ацIэхэр зэ­рагъашIэх, зыдэщыIэ чIыпIэхэм къакIэ­упчIэх.

Адыгеир IэрышI хьыкъум­хэмкIи апэ ит. Шапсыгъэ, Щынджые, Краснодар псыубытыпIэхэр илъэс зэфэшъхьафхэм агъэпсыгъэх. Псы­хъохэу Шъхьэгуащэ, Лабэ, Къурджыпс зы­гъэпсэфыпIэ чIыпIэхэр яIэх.

Къыблэ шъолъырым щы­псэухэрэм псыр тызэрэфаеу тэгъэфедэми, ар зы­фимы­къоу е къэзыщэфэу дунаим тетыр нэбгырэ миллион пчъа­гъэ ­мэхъу.

— Республикэм ипсыхэр мыушIоинхэм фэшI псыхъо­хэм янэпкъыхэм, хьыкъум­хэм ягъэ­къэбзэн илъэс къэс студентхэмрэ велонтерхэмрэ къыхэтэгъэлажьэх. Экологиер къабзэу къызэтегъэнэнымкIэ ащ ишIуагъэу къа­кIорэр ныбжьыкIэхэм ятэгъа­шIэ, — къыIуагъ А. Хьа­ти­къуаем.

Псыхъохэр нэпкъыхэм къа­дэкIыхэу мэхъу. Анахьэу гъатхэм осыр къушъхьэхэм къа­щыткIунэу зыщыригъа­жьэкIэ, губгъохэми, псэупIэ­хэми псыр акIэлъадэу, зэрар аригъэкIэу къыхэкIы. Псым гумэкIыгъо къыздимыхьыным ащ фэгъэзэгъэ къулыкъу­хэр лъэплъэх.

Псыр щымыIэмэ, псэ зыпыт пстэур чIышъхьашъом щы­псэушъущтэп.

(Тикорр.).