Илъэсым икIэлэпIу
Республикэ зэнэкъокъоу «Илъэсым икIэлэпIу» зыфиIорэм икIэух уцугъо зэфахьысыжьыгъ.
«Заочнэ шIыкIэм ыуж очнэ шIыкIэкIэ уцугъуищымэ ахэм зыкъащагъэлъэгъуагъ. Аужырэ ушэтынэу хъугъэх «КIэлэегъэджэ зэпеохэр». Сэнэхьатэу зэрылажьэхэрэмкIэ яшIэныгъэ зынэсырэр, цIыфхэм апашъхьэ къыщыгущыIэнхэмкIэ амалэу яIэр къагъэлъэгъуагъ, хэукъоныгъэ хэмытэу, къаIорэр къэгъэшъыпкъэжьыгъэу, гупшысэ куу хэлъэу якъэIотэн зэрагъэпсышъурэр къагъэлъэгъуагъ», — къыщаIуагъ АР-м гъэсэныгъэмрэ шIэныгъэмрэкIэ и Министерствэ. Зэфэхьысыжьэу ашIыгъэхэмкIэ анахь дэгъоу къыхахыгъэр Красногвардейскэ районым ит кIэлэцIыкIу IыгъыпIэу N 4-у «Жемчужинка» зыфиIорэм имузыкальнэ пащэу Овсянникова Марина Виктор ыпхъур ары (сэмэгумкIэ апэрэр). ЯтIонэрэр фагъэшъошагъ Мыекъуапэ икIэлэцIыкIу IыгъыпIэу N 39-м икIэлэпIоу Даценко Юлия Игорь ыпхъум. Тэхъутэмыкъое районымкIэ кIэлэцIыкIу IыгъыпIэу N 10-у «Ручеек» зыфиIорэм икIэлэпIоу ХьакIэко Мэлайчэт Айдэмыр ыпхъум я 3-рэ чIыпIэр къыхьыгъ.