Урысые Федерацием и Правительствэ и Тхьаматэ игуадзэу Марат Хуснуллиным хэгъэгум ишъолъырхэм япащэхэм непэ адыриIэгъэ видеоконференцием хэлэжьагъ Адыгэ Республикэм и ЛIышъхьэу КъумпIыл Мурат.

Хэгъэгум ишъолъырыкIэхэм IэпыIэгъу зэраратыщтым ыкIи 2023 — 2025-рэ илъэсхэм Урысые Федерацием ишъо­лъырхэм къафэгъэзэгъэ цIыф псэупIэхэу шъолъырыкIэхэм арытхэм япсэуалъэхэу зыпкъ рагъэуцожьын фаехэм яплан изэхэгъэуцон тегущыIагъэх.

Шъугу къэтэгъэкIыжьы: Адыгеим къы­фэгъэзагъэхэр Херсон хэкумкIэ Геническэ районым имуниципалитетхэр ары. Ахэм IэпыIэгъу ятыгъэнымкIэ, инфраструктурэр зыпкъ игъэуцожьыгъэнымкIэ, социальнэ псэуалъэхэр гъэкIэжьыгъэнхэмкIэ IофшIэнхэр 2022-рэ илъэсым аублагъэх. Къэралыгъо гъэIорышIэным, инфраструктурэр зыпкъ игъэуцожьы­гъэным, социальнэ Iофыгъохэр зэшIо­хыгъэнхэм ыкIи нэмыкIхэм япхыгъэ IофхэмкIэ специалистхэр а районым агъэкIуагъэх. Адыгэ Республикэм и ЛIышъхьэу КъумпIыл Мурат Геническэ районым зыщэIэм IэпыIэгъур анахьэу зэрящыкIэгъэ лъэныкъохэр къыгъэнэ­фэгъагъэх.

Мы зэIукIэм илъэхъан Адыгеим районым IэпыIэгъу етыгъэнымкIэ иIофшIэн епхыгъэу зи щыкIагъэ фалъэгъугъэп. Урысые Федерацием и Правительствэ и Тхьаматэ игуадзэ АР-м и ЛIышъхьэ, джащ фэдэу Херсон хэкум илIыкIохэм гущыIэ аритыгъ. Ахэр къызэгущыIэхэм язэдэлэжьэныгъэ илъэныкъо шъхьаIэхэм афэгъэхьыгъэу къаIотагъ. КъызэрэхагъэщыгъэмкIэ, Iофыгъоу къэуцухэрэр зэкIэ зыпкъитыныгъэ хэлъэу зэшIуахых. Мы лъэхъаным Херсон хэкумрэ Адыгеимрэ яхэбзэ къулыкъухэм анаIэ зытетыр 2025-рэ илъэсым нэс Iофэу агъэцэкIэщтым иихъухьанкIэ зэзэгъынхэр ары.

Адыгэ Республикэм и ЛIышъхьэ къы­зэрэхигъэщыгъэмкIэ, Херсон хэкум и Геническэ район зыпкъ игъэуцожьыгъэ­ным телъытэгъэ Iофтхьабзэхэр зэшIохыгъэ хъунхэм пае илъэс къэс сомэ мил­лион 200 IэкIагъахьэзэ ашIыщт. Мыщ дэжьым къэIогъэн фае илъэсэу икIы­гъэм IофшIэнэу зэшIуахын фаем нахьыбэр зэрагъэцэкIагъэр, сомэ миллиони 130-рэ республикэ бюджетым къыхагъэкIи а Iофхэм зэрапэIуагъэхьагъэр.

Адыгеим икIыгъэ специалистхэм еджапIэхэр ыкIи кIэлэцIыкIу IыгъыпIэхэр агъэцэкIэ­жьыгъэх, спорт Iэмэ-псымэхэр къащэфыгъэх, кIэлэцIыкIу джэгупIэхэр ашIыгъэх, транспорт ыкIи инженер инфраструктурэм ипсэолъэ заулэ зыпкъ рагъэуцожьыгъ. Щагу 12 зэтырагъэ­псыхьагъ, къалэу Геническэрэ селоу Петровкэрэ яурамхэр къэзыгъэнэфыщтхэр агъэуцу­гъэх. Гъэсэныгъэ зыщарагъэ­гъотырэ организациехэм къапэ­Iулъ гъогухэр ыкIи лъэс зэпырыкIыпIэхэр нахь зэтырагъэпсы­хьагъэх. ЕджапIэхэм ягъэцэ­кIэжьын кIо зэхъум гъэфэбапIэ­хэу ящыкIагъэхэр ыкIи сантехникэм ылъэныкъокIэ Iэмэ-псы­мэхэр ахагъэуцуагъэх. КIэлэцIыкIу IыгъыпIэхэм ащыщ горэм игъэфэбапIэхэр зэблахъугъэх, спорт ыкIи джэгупIэ чIыпIэхэр зэтырагъэпсыхьагъэх.

Гъэсэныгъэ зыщарагъэгъотырэ ыкIи медицинэ организацие заулэмэ ящыкIэгъэ Iэмэ-псымэр, мебелыр, псэолъапхъэхэр ыкIи нэмыкIхэр аIэкIагъэхьагъэх. Адыгеим икIыгъэ медикхэм районым диспансеризациер щызэхащагъ, цIыфхэм ящыкIэгъэ медицинэ IэпыIэгъур аратыгъ. Геническэ районым щыщ кIэлэцIыкIу 400-м ехъумэ ыкIи Донбасс щыщ кIэлэцIыкIуи 100-мэ республикэм ичIыпIэ зэфэшъхьафхэм защагъэпсэфыгъ. Iоныгъом и 1-м ехъулIэу Геническэ районым щыщ кIэлэ­цIыкIухэу апэрэ классым кIуа­гъэ­хэм еджэнымкIэ къызфа­гъэфедэн алъэкIыщт пкъыгъо зэ­фэшъхьаф зэхэугъоягъэхэр шIу­хьафтынэу аратыгъэх. Джащ фэдэу илъэсыкIэм ипэгъокIэу кIэлэцIыкIухэм шIухьафтынхэр афарагъэщагъэх.

Партиеу «Единэ Россием» хэтхэм волонтерхэр, предпринимательхэр ыкIи общественнэ IофышIэхэр ягъусэхэу шIушIэ хьылъэхэр агъэхьазырых, шъо­лъырыкIэхэм ащыпсэухэрэми аIэкIагъахьэх. Илъэсэу икIыгъэм хьылъэ тонн 250-м ехъу афатIупщыгъ. Псэуалъэхэм яшIынкIэ ыкIи зыпкъ игъэуцожьыгъэн­хэмкIэ Iофтхьабзэхэр рахъу­хьагъэх.

«Iофтхьэбзабэ зэшIотхын фаеу къытпыщылъ: еджапIэхэм, кIэлэцIыкIу IыгъыпIэхэм Iэпы­Iэгъу ятыгъэныр, зэхэкъутэгъэ унэхэр зыпкъ игъэуцожьыгъэнхэр, кIэлэцIыкIу джэгупIэхэр шIыгъэнхэр, санитарием ишапхъэхэр укъуагъэ мыхъунхэм лъыплъэгъэныр. ТапэкIи ахэм IэпыIэгъу тафэхъущт. Къытфэгъэзэгъэ районым щыIэныгъэр зыпкъ щеуцожьыфэ нэс къыттефэрэр тшIэщт. Сэ сшъхьэкIэ ахэм зэкIэм салъэплъэ», — къыIуагъ КъумпIыл Мурат.

ИкIэухым Марат Хуснуллиным шъолъырхэм пшъэрылъ къафишIыгъ Iофыгъоу къэуцухэ­рэр псынкIэу зэшIуахынхэу ыкIи Iофтхьабзэхэу зэрахьащтхэмкIэ федеральнэ ведомствэхэм язэгъыхэзэ ашIынэу.

АР-м и ЛIышъхьэ ипресс-къулыкъу

Сурэтхэр: А. Гусев.