БаскетболымкIэ Уры­сыем ичемпионат иапшъэрэ лигэ хэт командэхэм яешIэгъухэр щыIагъэх.

Тигуапэу къыхэтэгъэщы, ­Адыгэ Республикэр къэзыгъэлъэгъорэ «Динамо-МГТУ-м» ящэнэрэ чIыпIэр къыдихыгъ.

Мы мафэхэм зэнэкъокъум къыдыхэлъытэгъэ аужырэ ешIэгъухэр къалэу Ростов-на-Дону щыкIуагъэх. Лигэм икомандэ анахь лъэши 4-р мыщ щызэIу­кIагъэх. Ахэр: «Челбаскет» (Челябинск), «БАРС-РГЭУ» (Ростов-на-Дону), «Динамо-МГТУ» (Мыекъуапэ) ыкIи «Металлург (Магнитогорск).

Мыр ятIонэрэ турэу щытыгъ, апэрэр Челябинскэ щыкIуагъ. Мыекъуапэ испортсменхэм ящэ­нэрэ чIыпIэр къыдахыным пае «Металлургым» текIонхэ фэягъ. Апэрэ командитIум очко пчъагъэу рагъэкъугъэм укIэхьан плъэ­кIыщтыгъэп. Адыгеим икомандэ дэгъоу зыкъыгъэлъэгъуагъ, пшъэ­рылъэу ыпашъхьэ щытыр ыгъэцэкIагъ. Турым къыдыхэлъытэгъэ аужырэ ешIэгъоу иIагъэр Магнитогорскэ икомандэ къышIуихьыгъ, пчъагъэр 90:71. Ащ ишIуагъэкIэ очко 53-рэ ригъэкъугъ ыкIи медаль къыхьыгъ. Очко 60 изыгъэ­къугъэ «Челбаскетыр» чемпион хъугъэ, «БАРС-РГЭУ-м» ящэнэрэ чIыпIэр къыдихыгъ.

Тикомандэ ешIэгъоу иIагъэм дэгъу дэдэу зыкъыщагъэлъэгъуагъ тибаскетболистхэм ащыщ­хэм. ГущыIэм пае, Павел Крященкэм очко 26-рэ ригъэкъугъ, адзыгъэ Iэгуаор гъогогъу 17 къызIэкIигъэ­хьажьын ылъэкIыгъ Юрий Кочневым. Мы нэ­бгыритIур лигэм ще­шIэрэ спорт­смен анахь лъэшхэм ащыщых. Джащ фэдэу ешIэкIэ дахэ къызыгъэ­лъагъохэрэм ащыщ тренерэу ыкIи ешIакIоу Артем Гапошиныр.

Урысыем ичемпионат къы­дыхэлъытагъэу «Динамо-МГТУ-р» джыри зы турнир хэлэжьэщт, къызытекIохэрэр зыхэзыщт системэм тегъэпсыхьагъэу ар щыт. Тобольскэ икомандэу «Нефтехимикым» апэрэ зэIукIэгъоу дыриIэщтыр мэлылъфэгъум и 9-м зэхащэщт, мэлылъфэгъум и 16-м Мыекъуапэ щызэдешIэщтых.