Жъэгъэузым пэуцужьыгъэнымкIэ Адыгэ республикэ клиническэ диспансерым зэхищэгъэ Iофтхьабзэу «Белая ромаш­ка» зыфиIорэр Лениным ыцIэ зыхьырэ гупчэм гъэтхапэм и 22-м щыкIуагъ. Мыекъуапэ щыпсэухэрэм ыкIи къеблэгъагъэхэм ыпкIэ хэмылъэу флюорографие ашIын амал яIагъ.

Илъэс къэс гъэтхапэм и 24-м жъэгъэ- узым пэшIуекIогъэным и Дунэе мафэ хагъэунэфыкIы. Ащ тарихъ гъэнэфагъэ пылъ. 1882-рэ илъэсым гъэтхапэм и 24-м зэкIэми зэлъашIэрэ микробиологэу Роберт Кох жъэгъэузым «ипалочкэ» къыгъотыгъ, ащ ыпкъ къикIыкIэ цIыфхэм уз хьылъэхэр яIэ зэрэхъурэр ыгъэунэфыгъ. А уахътэм къыщегъэжьагъэу мы мафэр мэфэпчъым щыхагъэунэфыкIэу аублагъ. Iофтхьабзэм «Белая ромашка» фаусыгъ.

— Илъэси 10-м ехъугъэу «Белая ромашка» зыфиIорэр диспансерым зэхещэ. Мы мафэм шIоигъоныгъэ зиIэ пстэуми, блэкIэу къэзылъэгъугъэхэми, къэбарыр зышIэу изыхъухьагъэхэми, чэзыум хэмытхэу, псынкIэу, ыпкIэ хэмылъэу флюорографиер ашIын амал яI. Непэрэ Iофтхьабзэм пшъэрылъ шъхьаIэу иIэр жъэгъэузым икъыхэгъэщынкIэ флюорографие уплъэкIуныр амалышIоу зэрэщытыр ягъэшIэгъэныр ары. Джащ фэдэу мы узым гумэкIы- гъоу къыздихьын ылъэкIыщтыр цIыфхэм алъыдгъэIэсыным, япсауныгъэ изытет нахь лъыплъэнхэм тынаIэ тет. Ащ дакIоу, мыщ фэдэ уплъэкIуным жъэгъэузым имызакъоу, нэмыкI узхэри къыхигъэщынхэ елъэкIы, — къыIуагъ жъэгъэузым пэуцужьыгъэнымкIэ Адыгэ рес­публикэ клиническэ диспансерым иврач шъхьаIэ ипшъэрылъхэр зыгъэ­цэкIэрэ Татьяна Ермаковам.

Джащ фэдэу тигущыIэгъу къызэрэхигъэщыгъэмкIэ, машинэр къызыщыуцугъэ уахътэу пчэдыжьым сыхьатыр 10-м къыщегъэжьагъэу 11-м нэс нэбгырэ 48-мэ уплъэкIуныр афашIыгъ. ПэшIорыгъэшъэу къызэралъытагъэмкIэ, Iофтхьабзэр мафэм сыхьатыр 2-м нэс окIофэ нэбгыри 100-м ехъумэ флюорографиер акIущт. Татьяна Ермаковам къызэри- IуагъэмкIэ, Iофтхьабзэу «Белая ромашка» зыфиIорэм къекIуалIэхи зязыгъэуп- лъэкIугъэхэм япсауныгъэ изытет зэрытхэгъэщт тхьапэр зы мафэ зытешIэкIэ жъэгъэузым пэуцужьыгъэнымкIэ республикэ диспансерым къащыратыжьыщт.

Адыгэ республикэ клиническэ диспансерым иIофышIэхэм къызэраIуагъэмкIэ, илъэс къэс цIыфхэм флюорографие ашIын фае. Хэти зыщыпсэурэ чIыпIэм епхыгъэ поликлиникэм, район сымэджэщым, жъэгъэузым пэуцужьыгъэ- нымкIэ диспансерым ар ащикIун ылъэкIыщт.

Узыр хэмыужъыныхьэзэ къыхэбгъэщ­мэ, нахь гъэхъужьыгъошIу мэхъу. Мыщ фэдэ Iофтхьабзэхэм яшIуагъэкIэ цIыфхэр япсауныгъэ лъыплъэнхэ, нахь зыфэса- къыжьынхэ зэрэфаер агу къагъэкIыжьы.

Зипсауныгъэ языгъэуплъэкIумэ шIоигъоу къыIухьэгъэ нэбгырэ заулэмэ гу­щыIэгъу тафэхъугъ. Ахэм зэу ащыщ Се­менова Татьяна Владимир ыпхъур, ар пенсионер.

— Мыекъопэ къэлэ администрацием ителеграм канал сыкIэтхагъэу щыт. Ащ зэкIэ къалэм щыхъурэ-щышIэрэр дэгъоу зэгъэфагъэу къырагъахьэ. Мы Iофтхьабзэр зэрэщыIэщтыр ащ къисыджыкIыгъ. Тэщ фэдэ ныбжь зиIэхэр нахьыбэрэ япсауныгъэ лъыплъэнхэ фае. Зэпахырэ узэу коронавирусыр зыпэкIэкIыгъэхэм анахьэу ятхьабылхэр ауплъэкIунхэу щыт. Арышъ, Лениным ыцIэ зыхьырэ гупчэм щызэхащэгъэ Iофтхьабзэм ащкIэ амалышIу къеты чэзыуми тыхэмытэу, псын­кIэу флюорографиер ткIунымкIэ. Блэ­кIыгъэ илъэситIум мыщ сыкъэкIонэу хъугъэп, ау ащ ыпэкIэ зыщязгъэуплъэкIоу къыхэкIыгъ.

Николай Иванченкэри апэрэп мы Iофтхьабзэм зэрэхэлажьэрэр.

— Сишъхьэгъусэ зыгорэм щызэхи­хыгъ Лениным ыцIэ зыхьырэ гупчэм флюорографиер зыщашIырэ машинэр къызэриуцощтыр. Сэ мы чIыпIэм пэгъунэгъоу сыщэпсэу, арышъ, чыжьэу сымыкIоу мыщ уплъэкIуныр щязгъэшIыныр сэркIэ Iэрыфэгъу. Зы илъэс горэми джащ фэдэу сыщыIагъ.

IЭШЪЫНЭ Сусан.

Сурэтхэр Iэшъынэ Аслъан тырихыгъэх.