Непэ республикэм и Къэралыгъо филармоние АР-м и Къэралыгъо Совет — Хасэм ия ХХI-рэ зэхэсыгъо щыкIуагъ. АР-м и Конституцие тегъэпсыхьагъэу Адыгэ Республикэм иминистрэхэм я Кабинет 2022-рэ илъэсым Iофэу ышIагъэм икIэуххэмкIэ зэфэхьысыжь Адыгеим и ЛIышъхьэу КъумпIыл Мурат ащ къыщишIыгъ.

Сессием иIофшIэн хэлэжьагъэх ФедерациемкIэ Советым хэтхэр, Адыгеим ыцIэкIэ Урысые Федерацием и Къэралыгъо Думэ, АР-м и Къэралыгъо Совет — Хасэм ядепутатхэр, АР-м иминистрэхэм я Кабинет хэтхэр, федеральнэ ыкIи рес­публикэ къулыкъухэм, ведомствэхэм яIэшъхьэтетхэр, му­ниципальнэ образованиехэм, об­щественнэ ыкIи лъэпкъ-культурнэ объединениехэм ялIыкIохэр. Зэхэсыгъор зэрищагъ Адыгэ Республикэм и Къэралыгъо Совет — Хасэм и Тхьаматэу Владимир Нарожнэм.

Адыгеим и ЛIышъхьэ анахь мэхьанэ зиIэгъэ лъэныкъомкIэ ипсалъэ къыригъэжьагъ — 2022-рэ илъэсым Адыгэ Республикэм къэралыгъо гъэпсыкIэ иIэ зы­хъугъэм ия 100-рэ илъэс ихэгъэунэфыкIын кIуагъэ. КъумпIыл Мурат къыхигъэщыгъ юбилеим игъэмэфэкIын республикэм анаIэ нахь къытырадзэнымкIэ, ащ гъэхъагъэу иIэхэр къэгъэлъэгъогъэнхэмкIэ амалышIухэр къызэритыгъэр.

«Къэралыгъом и Пащэу Владимир Путиным инэу тыфэраз къэралыгъо лъэгапIэм тетэу а Мафэр хэдгъэунэфыкIыным иамал къызэритыгъэмкIэ. Рес­публикэм илIэшIэгъу юбилей хэгъэгумкIэ зэрэпсаоу тарихъ мэхьанэу иIэр унашъоу ышIыгъэмкIэ Президентым къыгъэлъэгъуагъ», — къыхигъэщыгъ КъумпIыл Мурат.

Адыгеим и ЛIышъхьэ зэфэ­хьысыжьэу къышIыгъэм къыщи­Iотагъ юбилеим тегъэпсыхьэгъэ IофшIэнышхоу зэшIохыгъэ хъугъэр. Илъэс заулэрэ ар кIуагъэ ыкIи культурнэ Iофтхьабзэхэм ямызакъоу, зэхъокIыныгъэ инхэри щыIэ хъугъэх. Мы лъэныкъомкIэ ишIуагъэ къыгъэкIуагъ Урысыем и Правительствэ и Тхьаматэ игуадзэу Дмитрий Чернышенкэм. Юбилеим изыфэгъэхьазырынрэ ихэгъэунэфыкIынрэ афэгъэзэгъэ зэхэщэкIо комитетым ар ипэщагъ. Адыгеим ия 100-рэ илъэс ехъулIэу инфраструктурэм ипсэолъи 160-мэ IофшIэнхэр ащагъэцэкIагъэх. Илъэсэу икIыгъэм муниципалитет пстэуми мэхьанэшхо зиIэ Iофтхьабзэхэр ащыкIуагъэх, федеральнэ лъэгапIэм тетэуи ахэр рекIокIыгъэх. ФедерациемкIэ Советым Адыгэ Республикэм и Мафэхэр щыкIуагъэх, комитет зэфэшъхьаф­хэми зэхэсыгъо гъэнэфагъэхэр яIагъэх.

Культурнэ программэу Москва щыкIуагъэм илъэгапIэу плъытэн плъэкIыщт Къэралыгъо Унэшхоу Кремлым хэтым щырекIокIыгъэр. Къэбэртэе-Бэлъкъарымрэ Къэрэщэе-Щэрджэсымрэ ащ къыхэлэжьагъэх, ахэми къэралыгъо гъэпсыкIэ яIэ зыхъугъэм ия 100-рэ илъэс хагъэунэфыкIыгъ. Республи­кищ­мэ ащыпсэухэрэм УФ-м и Президентэу Владимир Путиныр къафэгушIуагъ, ежь ышъхьэкIи концертым еплъынэу къэкIо­гъагъ. Къэралыгъом и ЛIышъхьэ анахьэу къыхигъэщыгъэр Адыге­им, Къэбэртэе-Бэлъкъарым ыкIи Къэрэщэе-Щэрджэсым «хэгъэгум игъэпытэнрэ ихэхъоныгъэрэ, цIыфхэм азыфагу мамырныгъэ­рэ зэгурыIоныгъэрэ илъынхэм яIахьышхо зэрэхашIыхьэрэр, пшъэрылъэу апашъхьэ итхэр теубытагъэ ахэлъэу зэрэзэшIуа­хыхэрэр, тиреспубликэхэм нахь псынкIэу хэхъоныгъэ ашIыным ренэу анаIэ зэратырагъэтырэр ары».

«Джыри зэ къэсIонэу сыфай къэралыгъом и ЛIышъхьэу Владимир Путиным, Урысыем и Пра­вительствэ и Тхьаматэу Михаил Мишустиным, ФедерациемкIэ Советым и Тхьаматэу Валентина Матвиенкэм, Урысые Федерацием и Къэралыгъо Думэ и Тхьаматэу Вячеслав Володиным ыкIи хэгъэгум и Правительствэ ренэу яшIуагъэ къызэрэтагъэкIырэм, республикэм июбилей епхыгъэ проектхэр гъэцэкIагъэ хъунхэмкIи IэпыIэгъу къызэрэтфэхъугъэхэм апае инэу тызэрафэразэр», — къы­Iуагъ КъумпIыл Мурат.

Адыгеим и ЛIышъхьэ шъхьа­фэу къащыуцугъ илъэсэу икIыгъэм тихэгъэгу къиныгъоу зэу­тэлIагъэхэм. Республикэри, зэ­рэхэгъэгу фэдэу, гумэкIыгъоу къыкъокIыгъэхэм зыкIыныгъэ хэлъэу апэуцужьыгъ.

«Илъэсэу икIыгъэр УрысыемкIэ ушэтыпIэ инхэм яилъэсэу щытыгъ. Урысыем и Президент хэушъхьафыкIыгъэ дзэ операциемкIэ унашъоу ыштагъэр къызэрыкIоу щытыгъэп, ау Донбасс ыкIи зэрэхэгъэгоу ащыпсэухэрэм якъэухъумэн, хэгъэгур щынэгъончъэу щытыным афэгъэхьыгъэ унэшъо тэрэз закъоу ар щытыгъ, — къыIуагъ КъумпIыл Мурат. — ТикIалэхэм цыхьэ афэтэшIы ыкIи тарэгушхо. ТичIыпIэгъухэм ятэжъхэмрэ ятэжъ пIашъэхэмрэ яблэнагъэ ежьхэми къахэфэжьы, лIыхъужъ­ныгъэ шъыпкъэ зэрахьэ. Ахэм ащыщыбэхэм къэралыгъо тынхэр афагъэшъошагъэх. ЛIыгъэу зарихьагъэм пае старшэ лейтенантэу Валерий Заволянскэм щытхъуцIэу Урысые Федера-цием и ЛIыхъужъ» зыфиIорэр щымыIэжьэу къыфагъэшъошэ­жьыгъ. ЛIыхъужъым ыцIэ лIэшIэгъухэм къахэнэщт».

Ащ нэужым АР-м и ЛIышъхьэ игъэкIотыгъэу къыщыуцугъ хэу­шъхьафыкIыгъэ дзэ операцием хэлажьэхэрэм, дзэ формированиехэм, шъолъырыкIэхэм ащы­псэу хъугъэхэм, къэкощыжьыгъэхэм IэпыIэгъу ятыгъэнымкIэ пшъэрылъэу зэшIохыгъэн фаехэм, джащ фэдэу шIушIэ Iоф­тхьабзэр лъыгъэкIотэгъэнымкIэ, Херсон хэкум и Геническэ рай­он зыпкъ игъэуцожьыгъэнымкIэ ыкIи хэхъоныгъэ егъэшIыгъэнымкIэ зэшIуахыхэрэм.

Джащ фэдэу республикэм ихэбзэ къулыкъухэр АР-м и Къэралыгъо Совет — Хасэм идепутатхэм гъусэныгъэ адыря­Iэу волонтерхэм, граждан обществэм иинститутхэу цIыф куп зэфэшъхьафхэм яфедэхэр къэзыухъумэхэрэм ялIыкIохэм зэ­гурыIоныгъэ азыфагу илъэу адэлажьэх.

Гъэхъагъэу 2022-рэ илъэсым министрэхэм я Кабинет ышIыгъэхэм къатегущыIэзэ КъумпIыл Мурат къызэрэхигъэщыгъэмкIэ, федеральнэ гупчэм IэпыIэгъу­шхоу къытыгъэм ишIуагъэкIэ мэхьанэшхо зиIэ зэхъокIыны­гъэхэр охътэ кIэкIым зэшIохыгъэ хъугъэх, экономикэми хэ­хъоныгъэу ышIырэм ипсынкIагъэ нахь зыкъыIэтыгъ. КъумпIыл Мурат агу къыгъэкIыжьыгъ илъэсэу икIыгъэм УФ-м и Президент зэIукIэгъу зэрэдыриIагъэр. Къэралыгъом и Пащэ Адыгеим фэхъурэ зэхъокIыныгъэшхохэм осэшIу къафишIыгъ.

«Ар зэкIэми тызэгъусэу зэ­дэд­гъэцэкIэгъэ Iофым къыфишIы­гъэ осэшхоу щыт. Илъэсэу икIыгъэм Адыгэ Республикэм и ЛIышъхьэ IэнатIэ ятIонэрэу сы­хадзыжьыгъ. Урысыем и Президент ащкIэ ишIуагъэ къызэрэ­сэкIыгъэм пае лъэшу сыфэраз. Республикэм исхэми цыхьэ къызэрэсфашIыгъэм, зэхъокIыныгъэ инхэу республикэм щыкIуагъэхэмкIэ яшIогъэшхо къызэрэкIуагъэм апае сафэраз. Республикэм гъэхъагъэу ышIы­хэрэр пстэуми апэу зишIушIагъэр цIыф лъэпкъыбэмэ ялIыкIохэу Адыгеим щыпсэухэрэр ары», — къыIуагъ КъумпIыл Мурат.

Адыгэ Республикэм и ЛIы­шъхьэ ипсалъэ игъэкIотыгъэу къащыуцугъ лъэныкъо зэфэ­шъхьафхэмкIэ республикэм со­циальнэ-экономикэ хэхъоныгъэу ышIыгъэхэм, къэралыгъо программэхэмрэ лъэпкъ проект­хэмрэ гъэцэкIагъэ зэрэхъугъэ­хэм. Ащ дакIоу республикэм ихэбзэ къулыкъухэм тапэкIи анахь лъэшэу анаIэ зытырагъэ­тын фаехэр къыгъэнэфагъэх. ЛIышъхьэм изэфэхьысыжь зыщыкIогъэ лъэхъаным сурэтхэр, видеоматериалхэр къагъэлъэ­гъуагъэх, лъэныкъо зэфэшъхьаф­хэмкIэ гъэхъагъэу щыIэхэр къи­зыIотыкIырэ нэрылъэгъу IэпыIэгъухэр агъэфедагъэх. Зэфэхьысыжьыр зэрэпсаоу АР-м и ЛIышъхьэрэ АР-м иминистрэхэм я Кабинетрэ я Администрацие исайт ижъугъотэщт.

Лъэныкъо шъхьаIэхэмкIэ пшъэрылъхэр

Адыгэ Республикэм иминистрэхэм я Кабинет 2022-рэ илъэсым Iоф зэришIагъэм ехьы­лIэгъэ зэфэхьысыжьэу АР-м и ЛIышъхьэу КъумпIыл Мурат Адыгеим и Къэралыгъо Совет — Хасэм изэхэсыгъо къыщи­шIыгъэм мы охътэ благъэм Iоф зыдашIэщт лъэныкъо шъхьаIэхэр къыщигъэнэфагъэх.

Владимир Путиным Федеральнэ ЗэIукIэм фигъэхьыгъэ Джэпсалъэм лъэныкъо шъхьаIэу къыщигъэнэфагъэхэр КъумпIыл Мурат агу къыгъэкIыжьыгъэх Къэралыгъом ипащэ зэрэхигъэу­нэфыкIыгъэмкIэ, «къиныгъохэр къызэрэуцугъэхэм адакIоу, ахэм къазэрахэкIыжьыщтхэ амалхэри непэкIэ щыIэх». Правительствэмрэ шъолъырхэмрэ апа­шъхьэ ит стратегическэ пшъэ­рылъыр «экономикэр лъэгэпIа­кIэхэм алъыгъэIэсыгъэныр» ары.

Лъэныкъоу къагъэнэфагъэхэр: IэкIыб экономикэ зэпхыныгъэ­хэр гъэпытэгъэнхэр, логистикэмкIэ амалыкIэхэр къэгъотыгъэнхэр, инфраструктурэм, телекоммуникациехэм, связым, гъогу­хэм зягъэушъомбгъугъэныр, Уры­сыем ис лъэпкъхэм агъэлъэпIэрэ шIуагъэхэр къэухъу­мэгъэнхэмкIэ гурыт, апшъэрэ еджапIэхэм ащарагъэхьырэ курсхэр нахьышIоу зэхэщэгъэнхэр, рабоч сэнэхьатхэм уасэу аратырэм зыкъегъэIэтыгъэныр, гурыт звенэм хэхьэрэ специалистхэр нахьыбэу къэгъэхьазырыгъэнхэр, лэжьапкIэм зыкъегъэIэтыгъэныр.

Мэхьанэшхо зиIэ лъэныкъохэм ащыщ цIыфхэм, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм социальнэ IэпыIэгъу ягъэгъотыгъэныр.

Адыгеим и ЛIышъхьэ къызэ­рэхигъэщыгъэмкIэ, респуб­ликэм ихэбзэ къулыкъухэм анаIэ а лъэныкъохэм ренэу атырагъэтын фае.

«Пшъэрылъ шъхьаIэу тиIэр цIыфхэм ящыIэкIэ-псэукIэ на­хьышIу шIыгъэныр, гъэсэныгъэм, медицинэм, культурэм, спортым хэхъоныгъэ ягъэшIы­гъэныр, социальнэ ухъумэнымкIэ амалыкIэхэр къэгъотыгъэнхэр, рес­публикэм ис унагъо пэпчъ щы­IэкIэ-псэукIэ амалэу иIэм зыкъегъэIэтыгъэныр ары», — къыIуагъ АР-м и ЛIышъхьэ.

КъумпIыл Мурат зэхэсыгъом къызэрэщыхигъэщыгъэмкIэ, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм нахьышIоу IэпыIэгъу ягъэгъотыгъэнымкIэ ищыкIэгъэ амалхэр республикэм щызэрахьащтых дзэ­кIолIхэу, хэкIодэгъэ дзэкIолIхэм яунагъохэм арысхэу закъыфэ­зыгъазэхэрэм ащ лъыпытэу Iэ­пыIэгъу афэхъунхэм пае. ЦIыфхэм ящыIэкIэ-псэукIэ зыкъегъэIэтыгъэным епхыгъэ Iофыгъохэми анаIэ атырагъэтын фае. ГъэрекIо итыгъэгъэзэ мазэ зэдэгущыIэгъу занкIэу АР-м и ЛIышъхьэ зэрищагъэм ащ фэдэ Iофыгъохэри къыщаIэтыгъагъэх. Якъуаджэхэм, якъутырхэм хэ­хъоныгъэ ашIынэу, лэжьэпкIэ дэгъу зыпылъ IофшIэн къагъотынэу, джырэ шапхъэхэм ади­штэрэ теплъэ тиреспубликэ иIэнэу цIыфхэр фаех.

«Лъэхъэнэ мыпсынкIэхэм тэ хэкIыпIэхэр къэтэгъотых. ГъэIорышIэнымкIэ амалыкIэхэр кризисым илъэхъан Iоф зэрашIэщт шIыкIэр республикэм къыщыхахынхэ, тиэкономикэрэ бизнесымрэ зэхъокIыныгъэхэм задырагъэштэн алъэкIы. Iофыгъо пэпчъкIэ федеральнэ хабзэхэм IэпыIэгъушхо къытаты. Анахь шъхьаIэр республикэм щыпсэу­хэрэм къызэрэддырагъаштэрэр ары. ЗыкIыныгъэр къэтыухъумэмэ, лъэпкъ, патриотическэ хабзэхэм тарыгъуазэмэ, Президентым къыгъэнэфэгъэ курсыр пхырытщымэ, тидзэ­кIолIхэм IэпыIэгъу тафэхъумэ ары ныIэп тихэгъэгу нахь дгъэ­пытэн ыкIи хэхъоныгъэ едгъэшIын зытлъэкIыщтыр. Тызэгъу­сэмэ къиныгъо пстэури зэпытчын тлъэкIыщт», — къыIуагъ АР-м и ЛIышъхьэ.

АР-м и ЛIышъхьэ ипресс-къулыкъу

Сурэтхэр: А. Гусев.

Илъэс зэфэхьысыжьхэу ЛIы­шъхьэм къышIыгъэхэр нахь игъэкIотыгъэу тикъыкIэлъыкIорэ къыдэкIыгъо къыщыхэтыу­тыщтых.