ПрограммакIэхэр ыгъэцэкIэщтых
Къихьащт илъэс еджэгъум Адыгэ къэралыгъо университетым гъэсэныгъэ программи 5 кIэу щатIупщынхэу агъэнафэ, программэ 15-у зыдэлажьэхэрэми зэхъокIыныгъэхэр афашIыгъэх.
Тикъэралыгъо ит шIэныгъэ-гъэсэныгъэ организацие пэрытхэм ягъусэу программакIэхэр университетым ыгъэцэкIэщтых.
«Пчъэ зэIухыгъэхэкIэ» заджэхэрэ Iофтхьабзэу бэмышIэу апшъэрэ еджапIэм зэхищэгъагъэм программакIэхэм якъэбар абитуриентхэм къащафаIотагъ. Адыгеимрэ Краснодар краимрэ ягурыт еджапIэхэр мыгъэ къэзыухыщт ныбжьыкIэхэр ары ащ хэлэжьагъэхэр.
Адыгэ къэралыгъо университетым программакIэхэм ягъэцэкIэнкIэ игъусэх къэкIыхэрэм ягенетикэ изэгъэшIэнкIэ Урысые институтэу Н. И. Вавиловым ыцIэ зыхьырэр, Баксан дэт нейтриннэ обсерваториер, къалэу Дубнэ щыIэ ядернэ ушэтынхэмкIэ Зэхэт институтыр, Къыблэ федеральнэ университетыр, НТУ-у «Сириусыр», Пшызэ къэралыгъо мэкъумэщ университетэу И. Т. Трубилиным ыцIэ зыхьырэр ыкIи нэмыкIхэр.
Бакалавриатыр пштэмэ, «Информатикэр ыкIи къэзылъытэрэ техникэм» ылъэныкъокIэ гъэсэныгъэ программэу щыIэм къыдыхэлъытагъэу «Технологии искусственного интеллекта” зыфиIорэ сэнэхьатыр университетым чIахьэхэрэм зэрагъэгъотын алъэкIыщт. Педагогикэмрэ психологиемрэкIэ факультетым ублэпIэ классхэр езыгъэджэщтхэ кIэлэегъаджэхэр зэригъэхьазырхэрэм дакIоу урысыбзэмрэ литературэмрэкIэ ыкIи хьисапымрэ информатикэмрэкIэ гурыт еджапIэм щырагъэджэнхэ алъэкIынэу студентхэр агъэсэщтых. Ащ ишIуагъэкIэ къоджэ еджапIэхэр кIэлэегъаджэу зыщыкIэхэрэм япчъагъэ нахь макIэ хъущт.
Магистрэ программэм кIэу къыхэхьагъэх: «медиакоммуникации», “физикэм фегъэджэгъэнхэмкIэ акъылыгъэ зыхэлъ технологиехэр, астрономиер ыкIи информатикэр” зыфиIохэрэр.
КIэлэегъэджэ сэнэхьатым фэгъэхьыгъэ гъэсэныгъэ программэ 12-мэ язытет зэблахъугъ, джащ фэдэу «ЗекIоным ыкIи хьакIэегъэблэгъэным, зекIомэ узэрапэгъокIыщтыр» ыкIи «Бизнесым игъэIорышIэн» зыфиIорэ программэхэри агъэкIэжьыгъэх.
«Приоритет 2030» зыфиIорэ программэм елъытыгъэу Адыгэ къэралыгъо университетым «иIалъмэкъ» аушъэжьыгъ, ар гъэсэныгъэ дэгъу еджакIомэ ягъэгъотыгъэным фэIорышIэ.
Адыгэ къэралыгъо университетым ипресс-къулыкъу