Мэзэ лъапIэр аублагъ
Ислъам диныр зылэжьыхэрэм агъэлъэпIэрэ НэкIмазэр къихьагъ.
Быслъымэнэу республикэм щыпсэухэрэм къафэгушIуагъ Адыгеим и ЛIышъхьэу КъумпIыл Мурат.
«НэкIмазэр — мэзэ хъяр, охътэ лъапI. ЦIыфыр ащ шIум феузэнкIы. ЩэIагъэ къыхелъхьэ, зэфыщытыкIэ дахэм, псэпэшIэным, мамырныгъэм афещэ, гунахьым пэчыжьэ ешIы. ТхьамыкIэм, сымаджэм, амалынчъэм гукIэгъу, гулъытэ фарегъэшIы.
ШъуинэкI, шъуитхьэлъэIухэр, шъуишIушIагъэхэр Тхьэм къабыл шъуфишIынхэу, псауныгъэ пытэ шъуиIэнэу, шъуигъомылапхъэ гухэхъо шхынэу, шъуиунагъохэм гушIуагъо, бэрэчэт, дэрмэн арылъынэу, шъуитхъагъо гъунэнчъэу, псапэу шъушIэрэр шъуфэбэгъонэу сышъуфэлъаIо!
НэкIмазэм икIэухэу щыт Бирам мэфэкI лъапIэм дахэкIэ шъупэгъокIынэу сышъуфэлъаIо!» — къащитхыгъ КъумпIыл Мурат исоциальнэ нэкIубгъохэм.