Быслъымэнэу дунаим тетхэм агъэлъэпIэрэ НэкIмэзэ мазэм гукIэгъур, бэрэчэтыр, дэхагъэр хэлъых, гунахьым пэчыжьэ уешIы. ШIоу, псапэу цIыфым ышIэрэр мэбагъо.

Быслъымэн диныр зылэжьы­хэрэм мазэм къыкIоцI нэкIыр аIыгъын фае, шхэхэ, псы ешъо­хэ хъущтхэп. НэкIмэзэ мазэм икIыхьэгъэщтыр мэфэ 29 — 30. Ар зэлъытыгъэр мазэм къы­- тырэ мэфэпчъыр ары.

НэкIмазэм епхыгъэ шапхъэ­хэм, ахэр быслъымэнхэм зэрагъэцэкIэн фаем тащигъэгъозагъ Мыекъопэ мэщытым иIимамэу Шъхьэлэхъо Ибрахьим.

Ибрахьим къызэриIуагъэмкIэ, а мазэр ары КъурIан лъапIэр къызехыгъэр, быслъымэнхэми нэкIыр зыщырагъажьэрэр. Ащ фэгъэхьыгъэу КъурIаным мырэущтэу ит: «КъурIаныр къы­зыщехыгъэ НэкIмазэр цIыф­хэмкIэ гъуазэу, гъогу дэгъури дэири зэхэфыгъэ хъугъэу щытышъ, зытефэрэм а мазэр ерэ­нэкI. Сымаджэу ащ тефэрэм е гъогум тетым ащ фэдиз мэфэ пчъагъэ ыужкIэ ерэнэкIыжь. Шъо НэкIмазэр псынкIэ къы­шъуфишIыным Алахьыр фай нахь, къин шъуигъэлъэгъунэу фаеп. Шъо гъогу занкIэм шъу­зэрэрищэрэм пае НэкIмазэри шъуухынэу, Алахьыри жъугъэлъэпIэнэу фай. Шъо разэ шъу­хъункIи мэхъу».

НэкIыр ислъам диным ипкъэуи­тфымэ ащыщ. НэкIыр зышIошъ мыхъоу, умынэкIыми хъунэу зыIорэм гунахьышхо егъахъэ. Тхьэм цIыф пстэуми нэкIыр къатырилъхьагъ. Тхьэм къыригъэхыгъэ КъурIаным унэ­кIын зэрэфаер къыгъэнафэу Iаятхэр итых. Алахьталэм мырэущтэу КъурIанымкIэ зыкъытфегъазэ: «О, шIошъхъуныгъэ зиIэхэр! ШъуапэкIэ цIыфхэм зэрателъыгъэм фэдэу нэкIыр шъори шъутелъ…»

Алахьталэм ыIуагъэу Пегъым­барым мырэущтэу цIыфхэм къалъигъэIэсыжьыгъ: «НэкIма­зэр сэсый, псапэр сэры къязытыщтыр». Сыд фэдэрэ Iофэу Алахьым цIыфым къытырилъхьагъэм, нэкIым нэмыкIырэм, псапэу къыкIакIорэр гъэнэ­фагъэу щыт. НэкIмазэм псапэу къыкIакIорэр гъэнэфагъэп, Тхьэр зыфаем фэдиз. ЦIыфым шIоу ышIэрэм тефэрэ псапэр Алахьым къыретыжьы, ау нэ­кIым тефэрэр зыми ымылъэгъоу къыIуегъэкIэжьы.

НэкIмазэм ишапхъэхэр

Мы мэзэ лъапIэм Тхьэм гу­нахьхэр афегъэгъу, псапэри афегъэбагъо. Алахьталэр цIыфым имэлэкIалIэ щыкIэрэкIэ арэп нэкIыр ащ къызфыты­рилъхьагъэр, ар гъогу зафэ теуцоным, хъярэу мы мафэм хэлъхэр къылъыIэсынхэм пае нахь. ЦIыфым ипсауныгъэ, идунэететыкIэ федэ афэхъугъэу НэкIмазэм бэ хэлъыр: мыхъунхэм ар ащеухъумэ, Iэпкъ-лъэпкъыр егъэрэхьаты, цIыфхэр зэкъотынхэм, шIу зэрэлъэ­гъунхэм, гъукIэгъу къахэфэным фегъасэх.

НэкIмазэм цIыфымкIэ бэ хъярэу хэлъыр. Пчэдыжь нэ­мазым ебгъэжьэнышъ, тыгъэр къохьафэ уинэкI зыкъутэщтхэм защыбдзыеныр ары нэкIыр. Угу илъыри пшIэрэри зэдиштэу, Тхьэми ирэзагъэ зэхапшIэу ущытын фае.

НэкIмазэм къыкIоцI цIыфым иIиман мэпытэ, зекIокIэ дэйхэм защедзые. НэкIмазэр лъапIэ, ащ нахь мэзэ лъапIэ илъэсым хэтэп. НэкIыр къаймэт мафэм цIыфыр фэгущыIэ, шы­хьат фэхъу. Ащ елъытыгъэу Пегъымбарым ыIуагъ: «НэкIымрэ КъурIанымрэ цIыфым фэгущыIэх, шыхьат фэхъух». НэкIым цIыфым ыгуи ыпкъи егъэкъабзэ, шIушIэным регъасэ, тхьамыкIэмэ гукIэгъу афыре­гъэшIы, гум щэч къырегъахьэ, шэнышIу ешIы.

Мы мазэм сэдакъэ птыныр, КъурIан уеджэныр, тэрауихь нэмаз уахътэхэр блэмыгъэкIынхэр псэпэшхоу щыт. УиIахьыл­хэм, уигупсэхэм а мазэм къыкIоцI уахахьэмэ, уалъыкIомэ, псапэ къыпфыхэкIыщт.

Нахь зэпэблагъэ, зэфэгумэкIыжь ешIых

НэкIмазэм социальнэ мэхьэнэ ин иI. Мы мазэм гъот зиIэхэм агухэр фэныкъорэ цIыфхэм нахь афызэIухыгъэ мэхъух. НэмыкIхэм гукIэгъу афэпшIыным, тхьамыкIэмэ ­уалъыплъэным, уиIэмэ, зимыIэм ептыным, уимыIэмэ, гущыIэ дахэ нэмыIэми апэбгъохыным НэкIмазэм уафегъасэ. НэкIмэзэ мазэм къыкIоцI нэкI зыIыгъ­хэр ыгъэшхэнхэу, пчыхьэрэ хи­гъэIэжьынхэу амал быс­лъы­мэным иI. НэкIым быслъымэныр щэIагъэм, нэмыкIхэм афигъэгъуным, афигъэкIотэным, мыгубжыным, ыбзэгу фэсакъыным афепIу.

НэкIыр зыIыгъынэу зытефэрэр

— Зиакъыл уцугъэу, зы-ныбжь илъэс 15 икъугъэ хэтрэ быслъымэни нэкIыр ыIыгъынэу тефэ. Тхьэм ар зытыриIэтыкIыгъэхэр бзылъфыгъэ зэпкъаджэхэр, быдзыщэкIэ сабыир зыгъашхэхэрэр, сымаджэхэр, гъогу тетхэр ары, ау ахэми ыужыкIэ а мафэхэр апщыны­жьынхэ фае. Нэжъ-Iужъхэми, уз гъэтIылъыгъэ зиIэхэми анэ­кIынэу атефэрэп. Ханэгъэ мэфэ пчъагъэм фэдизкIэ гъот макIэ зиIэ зы нэбгырэ ахэм агъэ­шхэн фае.

НэкIым къыхэбгъахьэ мыхъущтхэр

Пчэдыжь нэмазым къыщегъэ­жьагъэу тыгъэр къохьэфэ шхэхэ, псы, Iэзэгъу уц ешъохэ, зэшъхьэгъусэхэр зэгуахьэхэ, хъуанэхэ, убэхэ, пцIы аусы, ажэ къыдахьэрэр аIо, яягъэ цIыфмэ арагъэкIы хъущтэп.

НэкIым ипсэпагъэ зыгъэкIодырэмэ ахэр ащыщых.

КIАРЭ Фатим.