Адыгэхэм гъэтхапэм илъэсыкIэр зэрагъэмэфэ­кIыщтыгъэ шIыкIэм техыгъэ «ИлъэсыкIэ мэфэкI» непэ Мыекъуапэ щызэхащагъ.

Адыгэ Республикэм культурэмкIэ и Министерствэрэ лъэпкъ культурэмкIэ Гупчэмрэ ар зэхащагъ. Хэбзэ къулыкъухэм, лъэпкъ общественнэ организациехэм ялIыкIохэр, культурэм иIофышIэхэр, цIыф жъугъэхэр ащ хэлэжьагъэх.

ЗэIукIэм лъэпкъ зэфэ­шъхьафхэр зэрипхыгъэх, пстэуми мэфэкI шъыпкъэ афэхъугъ. Пэублэм адыгэ шхыныгъохэр нахьыжъхэм апагъохыгъэх.

АР-м лъэпкъ IофхэмкIэ, тилъэпкъэгъухэм адыряIэ зэпхыныгъэхэмкIэ ыкIи ­къэбарлъыгъэIэс амалхэмкIэ и Комитетрэ общественнэ дви­жениеу «Адыгэ Хасэмрэ» яшIухьафтынхэр аратыжьыгъэх я XXI-рэ зэфэхьысыжь-хэдзын зэIукIэу Адыгэ Хасэм иIагъэм адыгэ Iэпэщысэхэм якъэгъэлъэгъонэу щызэIухыгъагъэм изэхэща­кIохэмрэ ащ хэлэжьагъэ­хэмрэ.

Комитетым ирэзэныгъэ тхылъхэр афагъэшъошагъэх IэпэIасэхэу ТIэшъу Нурбый, Нэгъуцу Аслъан, Гостэкъо Руслъан, Сет Сафиет, Гумэ Ларисэ, Абрэдж Гощэфыжь. Комитетым ищытхъу тхылъхэр аратыгъэх зэхэщакIохэу Къэбэхь Рустамрэ Хьабый Пщымафэрэ.

Адыгэ Хасэм ирэзэныгъэ тхылъхэмкIэ агъэшIуагъэх Мерэмкъулэ Изабэллэ, Битэ Азэ, Джарымэкъо Зурет, Пэунэжь Марет, Гъыщ Хайят, Нэгэрэкъо Казбек, Мыгу Рузанэ, Акушъэ Фатимэ, КIэ­рэщэ Нурьят.

Творческэ куп зэхэтэу «Ошъадэм», Шэуджэн рай­оным къикIыгъэхэ «Джэныкъом» ыкIи «ДжэгуакIом», Даутэ Сусанэ мэфэкIым хэлэжьагъэх, Адыгэ Рес­публикэм и Лъэпкъ театрэ иартистхэм ижъыкIэ Илъэ­сыкIэр зэрагъэмэфэкIыщтыгъэм техыгъэ къэгъэлъэгъон къашIыгъ. Адыгэ джэгу дахэр пчыхьэзэхахьэм кIэух фэхъугъ. Удж-хъураекIэ ар аухыжьыгъ.