ШIушIэ IэпыIэгъур лъагъэкIуатэ
Адыгэ Республикэм щыпсэухэрэмрэ ащ ихьакIэхэмрэ мэзэ заулэ хъугъэу Херсон хэкум егъэзыгъэ IофкIэ зышъхьэ къизыхыжьыгъэхэм апае шIушIэ IэпыIэгъур аугъои.
Урысые Iофтхьабзэу «Тызэгъус» зыфиIорэм епхыгъэу Iоф зышIэрэ республикэ штабым иволонтерхэм цIыфхэм къырахьылIэхэрэр зэкIэ аштагъэх, къэмланхэм адалъхьагъэх ыкIи пIэлъэ гъэнэфагъэкIэ къэкощыжьыгъэхэр къызщыуцугъэхэ чIыпIэхэм анагъэсыгъэх. Джырэблагъэ зичэзыу шIушIэ IэпыIэгъур ахэм аIэкIагъэхьагъ.
НепэкIэ Адыгеим ичIыпIи 4-мэ къэкощыжьыгъэ цIыфхэр къащыуцугъэх, ахэр Мыекъопэ ыкIи Теуцожь районхэм арытых. Херсон ыкIи Херсон хэкум къарыкIыгъэ нэбгырэ 600 фэдиз ахэм ащэпсэу.
Партиеу «Единэ Россием» пхырищырэ линием тетэу шIушIэ IэпыIэгъур республикэм зэпыу фэмыхъоу щаугъои ыкIи шъолъырыкIэхэм арысхэм аIэкIагъахьэ. Илъэсэу икIыгъэм ащ фэдэ шIушIэ IэпыIэгъоу тонн 250-м ехъурэр Адыгеим ращыгъ.