Фабэ къызэрэхъоу лъэпкъ проектэу «Щынэгъончъэ ыкIи шэпхъэ­шIухэм адиштэрэ гъогухэр» зыфи­Iорэм къыдыхэлъытэгъэ IофшIэнхэм Мыекъуапи, зэрэ Адыгееуи щападзэжьыщтых. ГъогушI предприятиехэмрэ подряднэ организациехэмрэ апэкIэ къэт IофшIэнхэм джыдэдэм зафагъэхьазыры.

Республикэм игъогушI предприятиехэм ащыщэу ДСУ-3-м асфальтышI завод гъэрекIо асфальт тонн мини 100-м ехъоу къыщагъэхьазырыгъэм ызыныкъо нахьыбэр лъэпкъ проектэу «Щынэгъончъэ ыкIи шэ­хъэшIу­хэм адиштэрэ гъогухэр» зыфиIорэм къыщыдэлъытэгъэ гъогухэм ягъэцэ­кIэжьынкIэ къызфагъэ­федагъ.

ГъогушI предприятием илабора­торие ипащэу Хьагъур Анзаур къы­Iотагъ предприятием итехни­кэрэ илабораторнэ оборудованиерэ къапыщылъ IофшIэнхэм икъоу зэрэ- фагъэхьазырыгъэхэр, шэпхъэшIу-хэм адиштэрэ продукцие къыда­гъэкIыным ахэр щыгугъынхэ зэра­лъэкIыщтыр. Лъэпкъ проектэу «Щы­нэгъончъэ ыкIи шэпхъэшIухэм ади­штэрэ гъогухэр» зыфиIорэм хэхьэрэ псэуалъэхэр ары мыгъэ апэрэ чэзыоу Iоф зыдашIэщтхэр. ПэшIоры­гъэшъэу къыIэкIагъэхьэгъэ заказхэм атетэу тонн мини 10 хъурэ продукцие заводым къыдигъэкIыщт.

Предприятием къыпэблэгъэ мы­жъокъычIэхыпIэхэм шэпхъэшIухэм адиштэрэ мыжъуакIэхэр хъоеу къащищэфыгъ. Асфальт-бетоным игъэ­хьазырынкIэ ащ къызфигъэфедэхэрэр тихэгъэгу къыщыдагъэкIыгъэ битумыр, адгезионнэ, целлюлоз хэгъахъохэр, минеральнэ порошокыр, мастикэр ары.

КъэIогъэн фае гъогушIыным те­лъытэгъэ лъэпкъ проектым къыды­хэлъытэгъэ шъолъыр гъогухэм ягъэ­цэкIэжьынкIэ мыжъуакIэрэ мастикэрэ зыхэгъэкIухьэгъэ асфальт-бетоныр (ЩМА) илъэсищ хъугъэу зэрагъэфедэрэр. Ар зэрэдэгъум ишIуа­гъэкIэ гъогухэм псыр ащ фэдизэу апхырыкIырэп, гъогушъхьашъори лъэшэу зэщыкъорэп.

ЩМА-15-р къызфагъэфедэзэ ашIырэ гъогухэм мылъкоу апэIухьэрэр нахьыбэми, япытагъэкIэ зыкъагъэшъыпкъэжьы, фэди 2 — 3-кIэ на­хьыбэу ахэр агъэпсэуалъэх.

Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм тетэу мыгъэ авто­мобиль гъогу километрэ 54-рэ рес­публикэм зыпкъ щырагъэуцожьынэу рахъухьэ. Ахэм асфальт-бетон тонн мини 120-м ехъу апэIухьанэу къырадзэ.