Гъогухэм япхыгъэ лъэпкъ проектыр гъэцэкIэгъэным фэгъэхьы­гъэ игъэкIотыгъэ зэхэсыгъо «Адыгеяавтодорым» щыкIуагъ.

Зэхэсыгъор зэрищагъ Адыгэ Республикэм псэо­лъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевым.

Лъэпкъ проектэу «Гъогу щынэгъончъэхэр ыкIи шэпхъэшIухэм адиштэхэрэр» зыфиIорэм къыдыхэлъытэгъэ гъэцэкIэжьынхэу ыкIи гъогукIэу мы илъэсым тишъо­лъыр щашIынэу агъэнэ­фагъэхэм къатегущыIагъэх «Адыгеяавтодорым» ипащэу Алексей Корешкиныр, къа­лэу Мыекъуапэ иадминистрацие ипащэу Геннадий Митрофановыр ыкIи къэлэ гъэпсыкIэ зиIэ Яблоновскэ муниципалитетым ипащэ игуадзэу Руслан Концевыр.

Зэхэсыгъом зэрэщы­ха­гъэу­нэфыкIыгъэмкIэ, шъо­лъыр мэхьанэ зиIэ IофшIэ­нэу агъэнэфагъэхэм чIыпIэ гъогу 23-рэ къахеубытэ, зэ­нэкъокъоу зэхащагъэм сомэ миллион 715-рэ а IофшIэнхэм апэIухьанэу къыщагъэлъагъо. ХъызмэтшIапIэу IофшIэнхэр зыгъэцэкIэщтхэр мэлылъфэгъум и 1-м нэс къыхахынхэу щыт, 2023-рэ илъэсым иIоныгъо мазэ и 1-м нэс зэкIэ Iоф­шIэнхэр зэшIуахынхэу агъэ­нафэ.

Мыекъопэ къэлэ шъолъы­рым 2023-рэ илъэсым ­гъогу 11 щагъэцэкIэжьынэу рахъу­хьагъ. Ахэм сомэ миллион 313-рэ къафатIупщыгъ. Iоф­шIэнхэр пIалъэм ыпэу зэрэзэшIуахыхэрэм ишIуагъэ­кIэ ъо­гуитф гъэрекIо агъэ­цэкIэ­жьыгъ: Мыекъуапэ иурамхэу Пушкиным ыцIэ зыхьырэр, Советскэр, станицэу Ханскэм игъогуитIу ыкIи поселкэу Родниковэм изы урам. Ахэм сомэ миллион 215-рэ атырагъэкIо­дагъ.

Яблоновскэм щагъэцэкIэ­жьынхэу гъогуи 6 щагъэ­нафэ. ГъогурыкIоныр щы­нэгъончъэнымкIэ АР-м и Гъэ­IорышIапIэ ипащэ ипшъэ­рылъхэр зыгъэцэкIэрэ Хъу­нэго Махьмудэ къызэриIуагъэмкIэ, Яблоновскэм джыри зы лъэмыджэу щашIырэр джырэблагъэ атIупщы­нэу щытышъ, гъогухэр агъэ­цэкIэжьы хъумэ, ар къы­дэлъытэгъэн фае. Ащ пае, Яблоновскэм гъэцэкIэжьын IофшIэнэу щызэшIуахыщтхэр зыфэдэщтхэм шъхьафэу, АР-м и ЛIышъхьэ зэхищэщт зэхэсыгъом щызэхафынэу рахъухьагъ.

Нахьыбэрэ автомобильхэр зыщызэутэкIыхэрэ чIыпIитIоу къыхагъэщыгъэхэр щынэгъончъэхэу шIыгъэнхэм фэшI сурэт ыкIи видео тезыхырэ пкъыгъохэр ащагъэу­цунхэу зэхэсыгъом щызэ­даштагъ. Ащ фэдэ чIыпIэу Мыекъуапэ иIэхэм нэфрыгъуазэхэр атырагъэуцощтых.

«Тызэгъусэу тызкIызэдэлажьэрэр, лъэпкъ проектэу «Гъогу щынэгъончъэхэр ыкIи шэпхъэшIухэм адиштэхэрэр» зыфиIорэм Iоф зыкIыдатшIэрэр, зы лъэныкъомкIэ, гъогухэр нахьышIу тшIынхэу, адрэ лъэныкъомкIэ, тIэкIу-тIэкIузэ щынэгъончъэ хъунхэу ары, — къыIуагъ Вале­рий Картамышевым. — Джащ пае Iофхэр етымы­гъажьэзэ тызэхэгущыIэжьы, Къэралыгъо автоинспекциер хэтэгъэплъэжьы».

Федеральнэ программэу «Къоджэ псэупIэхэм хэхъо­ныгъэ ягъэшIыгъэныр» зыфиIорэм игъэцэкIэн хэлэ­жьэрэ лIыкIохэу муниципалитетхэм къарыкIыгъэхэри зэхэсыгъом къыщыгущы­Iагъэх, ащ къегъэлъагъо ­лъэпкъ проектхэм ягъэцэкIэн зэрэкIорэм цIыфыбэ къызэрэхагъэгущыIэрэр.

Шэуджэн районым гъо­гуищ, Кощхьэблэ районым гъогуиплI, Джаджэм зы, Мые­къопэ районымкIэ тIу мы илъэсым агъэцэкIэжьыгъэхэм ахагъэхьагъэх. Шъо­лъыр гъогушхоу агъэцэкIэ­жьыгъэхэм алъыпыдзагъэхэу къоджэ гъогухэр агъэ­кIэ­жьын­хэу ары зэрэрахъу­хьэрэр, ащ фэдэ екIолIакIэр нахьыбэрэмкIэ Iэрыфэгъу зыфэхъухэрэр къоджэ цIыкIухэм ащыпсэухэрэр ары. ГущыIэм пае, Мыекъопэ районым ит поселкэу Тульскэм иурамэу Танюковам ыцIэ зыхьырэм мыгъэ джащ фэдэ гъэцэкIэжьынхэр ща­шIынхэу щыт.

Мыекъопэ районым ипащэ игуадзэу Андрей Пономаревым зэрэхигъэунэ­фыкIыгъэмкIэ, урамэу агъэ­нэфагъэр районым игупчэ сымэджэщ екIуалIэ, ащ хэ­хьэ IэпыIэгъу псынкIэм икъулыкъуи, арышъ, зы IофышIур ашIэзэ, IофышIу пчъагъэ зэшIохыгъэ мэхъу.

Джащ фэдэу зэхэсыгъом зыщытегущыIагъэхэм ащыщ гъогухэм якъызэтегъэнэ­жьын, ащ пае хьылъэзещэ машинэхэр зыщауплъэкIу­хэрэ щэчалъэхэр джыри шIы­гъэнхэ фае. Ащ фэдэхэр Мыекъопэ ыкIи Джэджэ районхэм 2023-рэ илъэсым ыкIэ нэс ащагъэпсыщтых. А Iофыгъом къытегущыIагъ гъогухэр щынэгъончъэн­хэмкIэ Гупчэм ипащэу Даур Аргун.

Зэхэсыгъом икIэухым ащ хэлажьэхэрэм Валерий Кар­тамышевым закъыфигъэ­загъ: «Лъэпкъ проектыр тэ­рэзэу шъолъырым щыд­гъэцакIэмэ, республикэм щыпсэурэ нэбгырэ пэпчъ ащ ишIуагъэ зэхишIэщт, хьакIэу къытфакIохэрэри къытфэрэзэщтых. ЦIыфхэм анаIэ зытырадзэрэ щыкIагъэхэр дэгъэзыжьыгъэнхэр, лъэпкъ проектхэр тиIэубытыпIэу тигъогухэр щынэ­гъончъэхэу тшIынхэр ти­пшъэ­рылъ шъхьаIэхэм ащыщ».