Урысые зэнэкъокъоу «Илъэсым икIэлэегъэджэ анахь дэгъу» ыкIи «Илъэсым икIэлэпIу анахь дэгъу» зыфиIорэр илъэс къэс зэхащэ. Ар едзыгъо пчъагъэкIэ зэтефыгъ.

Мы мафэхэм республикэм икъалэхэм ыкIи ирайонхэм муниципальнэ уцугъохэр ащыкIуагъэх ыкIи зэфэхьысыжьхэр къэнэфагъэх. ТекIоныгъэр къыдэзыхыгъэхэм ащыщхэм ацIэ къетIон.

МыекъуапэкIэ 2023-рэ илъэсым икIэлэегъэджэ анахь дэгъу хъугъэр лицееу N 19-м пэублэ классхэмкIэ икIэлэегъаджэу Анатолий Казаковыр ары, джащ фэдэу хагъэунэфыкIырэ чIыпIэхэр къыдахыгъэх лицееу N 8-м икIэлэегъаджэу Тыкъэ Дианэ, гурыт еджапIэу N 15-м иIофышIэу Ольга Людновам, гурыт еджапIэу N 7-м щылажьэу Ольга Астапеевам, гурыт еджапIэу N 2-м икIэлэегъаджэу Светлана Гладковам ыкIи лицееу N 35-м Iут Дарья Ивановам.

Мыекъопэ районымкIэ кIэлэегъэджэ ыкIи кIэлэпIу 12 зэнэкъокъугъэх. ТекIоныгъэр къыдэзыхыгъэр поселкэу Тульс-кэм дэт гъэсэныгъэм игупчэу N 1-м хьисапымкIэ икIэлэегъаджэу Юлия

Ясониди. Теуцожь районымкIэ ПчыхьалIыкъое гурыт еджапIэу N 3-м географиемкIэ икIэлэегъаджэу Маргарита Фарафоновам текIоныгъэр къыдихыгъ.

Мыхэр ыкIи нэмыкI муниципалитетхэм текIоныгъэр къащыдэзыхыгъэхэр зэнэкъокъум иреспубликэ уцугъо хэлэжьэщтых, ащ пхырыкIыхэрэр Урысые зэнэкъокъум кIощтых.

Гъэтхапэм и 13-м «Адыгеим икIэлэпIу анахь дэгъу» зыфиIорэ зэнэкъокъур аублагъ. Ащ хэлажьэхэрэм ащыщых муниципальнэ уцугъом текIоныгъэр къыщыдэзыхыгъэхэ Мыекъуапэ икIэлэцIыкIу IыгъыпIэу N 32-м икIэлэпIоу Наталья Пуштовар, Мыекъопэ районымкIэ станицэу Кужорскэм дэт кIэлэцIыку IыгъыпIэу N 37-м иIофышIэу Вероника Рылинар, Шэуджэн районымкIэ Хьакурынэхьаблэ дэт кIэлэцIыкIу IыгъыпIэу «Насып» зыфиIорэм икIэлэпIоу Индрыс Рузан, Тэхъутэмыкъое районымкIэ поселкэу Яблоновскэм дэт кIэлэцIыкIу IыгъыпIэу N 10-м икIэлэпIоу ХьакIэкIо Мэлайчэт.

ДЕЛЭКЪО Анет. Сурэтхэр: Мыекъопэ къэлэ администрацием исайт