«Урысыер — амалыбэ зиIэ хэгъэгу» зыцIэ президент платформэмрэ программэу «ЗекIоным нахьыбэу» зыфиIорэмрэ зэгъусэхэу студенческэ экспедициеу «Урысыер икIэрыкIэу къызэIутэхы» зыцIэ университет программэм хэлэжьэщтхэм якъыхэхын иапэрэ едзыгъо рагъэкIокIыгъ.

Экспертнэ советыр заявкэ 47-мэ ахэплъагъ, текIоныгъэ къыдэзыхыгъэхэм апшъэрэ еджэпIэ 17-рэ организацие 23-рэ ахэфагъэх. Мэлылъфэгъу мазэм къыщегъэжьагъэу Iоныгъом нэс экспедициехэр хэгъэгум ишъолъыр 41-мэ ащырагъэкIокIыщтых. «Урыс фольклорыр нэмыкIыбзэхэмкIэ къэуцухьагъэу» зыфиIорэ экспедициер Адыгэ Республикэм щызэхащэщт, ар Саратов дэт къэралыгъо консерваториеу Л. В. Собиновам ыцIэ зыхьырэм ригъэкIокIыщт.

Лъэпкъыбэ зыщыпсэурэ Адыгэ Республикэм итарихъ-культурнэ кIэн икъэухъумэн экспедицием хэлажьэхэрэр пылъыщтых. Зыми фэмыдэ орэдыIохэм къаIорэ орэдхэр экспедицием хэлажьэхэрэм атхыщтых, шэн-хабзэхэм арылажьэхэрэм зэдэгущыIэгъухэр адашIыщтых, фольклорым къыхиубытэрэ пстэуми сурэт ыкIи видео атырахыщт, ащ хэхьащтых пщынэм, балалайкэм, лъэпкъ Iэмэ-псымэхэм мэкъамэу къарагъэтыхэрэр. Аугъоирэ материалхэмкIэ нэужым концертхэр къатын гухэлъ зэхэщакIохэм яI.

Мы илъэсым экспедициер лъэныкъуищэу гощыгъэ: «ПчъэшъхьаIум узэребакъоу» зыфиIорэр шъолъырэу къыкIэлъэIугъэм фытегъэпсыхьэгъэ программэ кIэкIэу щытыщт, «Хъугъэ-шIэгъэшху» зыфиIорэм мэфэ 14 икIыхьэгъэщт, къэралыгъом исыд фэдэрэ шъолъыри къыхиубытэн ылъэкIыщт, «Гухэлъым уфакIозэ» зыфиIорэр зэкIэмэ анахь кIыхьэщт, ар мэфэ 21-рэ рагъэкIокIыщт. «Хъугъэ-шIэгъэшху» зыфиIорэ экспедициер ары нахьыбэрэм къыхахыгъэр, ащ пае лъэIуи 127-рэ къатыгъагъ, ау къыхахыгъэр 23-рэ.

«Лъэшэу тегъэгушIо проектым зызэриушъомбгъурэм, тистуденчествэ социальнэ екIолIакIэу Iофым фыриIэм зэрэхахъорэм. Апшъэрэ еджапIэм ущеджэ хъумэ нахь шъхьаIэр щыIэныгъэм цIыф шъхьафэу, ор-орэу ухэзэгъэшъуныр, пшъэдэкIыжь зэрэпхьырэр зэхэпшIэныр ары. Хэгъэгум хэхъоныгъэ егъэшIыгъэнымкIэ мы проектэу «Урысыер икIэрыкIэу къызэIутэхы» зыфиIорэм мэхьанэшхо иI, ащ ишIуагъэкIэ ныбжьыкIэхэм зыкъагъоты, IофыгъуакIэхэм ахэлэжьэнхэ алъэкIы. Сэ къызэрэсшIошIырэмкIэ, экспедицием хэлажьэхэрэм ясэнэхьати къыщызэIуахышъу, еджэным дакIоу яамалхэри къызкъуахых»,— къыIуагъ «Урысыер—амалыбэ зиIэ хэгъэгу» зыфиIорэ президентскэ платформэм игенеральнэ пащэу Иван Шулюпиным.