Къырым Урысыем къызщыхэхьажьыгъэр илъэси 9 зэрэхъурэм фэгъэхьыгъэ мэфэкI Iофтхьабзэхэр зэрэхэгъэгоу щыкIуагъэх.

Адыгеими цIыфхэр жъугъэу зыщыхэлэжьэгъэхэ Iофтхьа­бзэхэр ащ епхыгъэу щызэха­щагъэх. Нахьыбэр зыщыкIуагъэр къалэм игупчэу Лениным ыцIэ зыхьырэр ары. Хабзэм иIофышIэхэр къызэгущыIэхэ нэужым мэфэкI концерт щы­Iагъ.

Республикэм щыпсэухэрэм къафэгушIонхэу къэкIуагъэх Адыгеим и ЛIышъхьэу КъумпIыл Мурат, Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, федеральнэ ыкIи шъолъыр къулыкъухэм яIэшъхьэтетхэр, чIыпIэ зыгъэIорышIэжьыным икъулыкъухэм, ныбжьыкIэ объединениехэм, общественнэ ор­ганизациехэм ялIыкIохэр.

Адыгеим и ЛIышъхьэ къызэ­рэхигъэщыгъэмкIэ, Урысыем щыпсэухэрэм мэхьанэшхо зиIэ Iофтхьабз хагъэунэфыкIырэр. Ащ къеушыхьаты илъэси 9-кIэ узэкIэIэбэжьмэ тихэгъэгу тарихъ мэхьанэ зиIэ хъугъэ-шIагъэ къызэрихъухьагъэр.

«Къырым щыпсэухэрэм тихэгъэгушхо къыхэхьанхэмкIэ фитыныгъэ зэряIэр нахьыбэмэ амакъэ зэрэфатыгъэм къыгъэшъыпкъэжьыгъ. Янеущырэ ма- фэ зыфэдэщтыр къызэрэха­хыгъэм джыри зэ къыгъэлъэ­гъуагъ Урысыем щыпсэурэ цIыф лъэпкъхэм ятарихъ гъогу фэдэ ежьхэми къызэракIугъэр, а чIы­гухэр ижъыкIэ къыщегъэжьа­гъэу Урысые къэралыгъом иехэу зэрэщытыгъэхэр къагъэшъып­къэжьыгъ», — къыIуагъ КъумпIыл Мурат.

Республикэм и ЛIышъхьэ джащ фэдэу къыхигъэщыгъ Урысыем иIэпыIэгъу хэлъэу Къырым щыпсэухэрэм Украинэм инеонацистхэм апкъ къи­кIыгъэ ушэтынхэр зэрэщагъэзыягъэхэм имызакъоу, зэхъо­кIыныгъэ инхэр зэрашIыгъэхэр. Илъэсэу блэкIыгъэхэм Къырым лъэмыджыр агъэпсыгъ, инфраструктурэм ипсэолъи 10 пчъагъэ зэтырагъэпсыхьагъ ыкIи ашIыгъ, еджапIэхэр, кIэлэцIыкIу IыгъыпIэхэр, сымэджэщхэр, джырэ уахътэм диштэрэ аэропорт агъэпсыгъэх, социальнэ мэхьа- нэ зиIэ проект зэфэшъхьафхэр рахъухьагъэх.

«Къырым игъатхэ ия 9-рэ илъэс хэдгъэунэфыкIызэ, ти­зэдегъэштэныгъэрэ тизэкъотныгъэрэ тызэрарыгушхорэр джыри зэ къытхэщыгъ. Урысыем зыкIы­ныгъэ илъэу тапэкIи щыIэкIэшIу зэрэщагъэпсыщтым икъэкIуапIэу ахэр ренэу щытыгъэх ыкIи къэ­нэжьых. 2014-рэ илъэсым Къы­рым Урысыем къызэрэхэхьа­жьыгъэм Донбасс щыпсэухэрэм гугъапIэ къаритыгъ тарихъ зэфагъэр зыпкъ зэриуцожьыщтымкIэ, янеущырэ мафэ нахьышIу зэрэхъущт Iофтхьабзэхэми ащ нахь афигъэчэфыгъэх», — къы­Iуагъ КъумпIыл Мурат.

Конституцием пэшIуекIорэ Iофыгъоу Киев щызэрахьагъэ­хэм къатегущыIэзэ республикэм и ЛIышъхьэ къызэрэхигъэщы­гъэмкIэ, тхьамыкIэгъуабэ ахэм къакIэлъыкIуагъ: Украинэм щы­псэурэ цIыфхэу урысыбзэр зы­Iулъхэм яфитыныгъэхэм къы­кIырагъэчыгъ, Донбасс лагъымэхэр бэу тырадзагъэх, Херсон ыкIи Запорожскэ хэку­хэм арыс цIыфхэм яфитыныгъэ­хэр лъэшэу аукъохэзэ шъхьакIо арахыгъ, НАТО-м хэхьэрэ хэгъэгухэм Урысыем пэшIуекIорэ «Зэошхоу» къырагъэжьагъэм дезыгъаштэхэрэр щыIэ хъугъэх.

«Непэ Урысые Федерацием и УIэшыгъэ КIуачIэхэм яфэ­шъошэ шъыпкъэу тарэгушхо, Урысыем и Президентэу Владимир Путиным, Апшъэрэ Главнокомандующым иунашъо тетэу зидзэкIолI пшъэрылъ зэрифэ­шъуашэу зыгъэцакIэхэрэм, Ук­раинэм инационалистхэм апэшIуекIорэ хэушъхьафыкIыгъэ дзэ операцием илъэхъан лIыхъужъныгъэ зезыхьэхэрэм инэу тызэрафэразэр къэтэIо», — къыхигъэщыгъ КъумпIыл Мурат.

Тихэгъэгу илъ зыкIыныгъэмрэ зэдегъэштэныгъэмрэ ыгъэпы­тэ­хэзэ, пшъэрылъэу иIэхэр тикъэ­ралыгъо зэригъэцэкIэщтхэм, фашизмэм зэрэтекIощтым ицы­хьэ зэрэтелъыр Адыгеим и ЛIы­шъхьэ къыIуагъ.

Iофтхьабзэм джащ фэдэу къы­щыгущыIагъэх Адыгэ Рес­публикэм и Къэралыгъо Совет — Хасэм и Тхьаматэу Владимир Нарожнэр, Мыекъуапэ имэрэу Геннадий Митрофановыр, партиеу «Единэ Россием» ишъо­лъыр гъэцэкIэкIо комитет ипащэу АфэшIэгъо Рэмэзан, Адыгэ Республикэм и НыбжьыкIэ парламент итхьаматэу Эвелина Ананниковар.

ИкIэухым мэфэкI концертэу кIуагъэм хэлэжьагъэх зэлъа­шIэ­рэ эстраднэ орэдыIохэр ыкIи республикэм итворческэ кол­лек­тивхэр.

АР-м и ЛIышъхьэ ипресс-къулыкъу Сурэтыр Iэшъынэ Аслъан ты­рихыгъ.