Хабзэ зэрэхъугъэу, гъэтхэпэ мэфэкI ошIухэм ялъэхъан псэупIэхэр агъэкъабзэхэу, шIы­хьафхэр зэхащэхэу аублэ.

БлэкIыгъэ тхьаумэфэ ма­фэхэм Адыгеими шIыхьафхэр щырагъэжьагъэх. Адыгэ Рес­публикэм и ЛIышъхьэ ахэм ахэлэжьагъэхэм «тхьашъуегъэ­псэу» ариIуагъ, къэбзэныгъэм ренэу лъыплъэнхэ зэрэфаер къыхигъэщыгъ.

— ШIыхьафхэм язэхэщэн зэдытиIоф. Республикэм ипсэу­пIэхэм ятеплъэ зыфэдэщтым ыгъэгумэкIырэ цIыфыбэ зэрэщыIэм, ахэр чанэу шIыхьафхэм зэрахэлэжьэщтхэм, Адыгеим ипсэупIэхэм язэтегъэпсыхьанрэ яукъэбзынрэ яIахь зэрахашIыхьащтым сицыхьэ телъ. ТшIагъэм тыкIэгушIуным ыкIи тапэкIи тыкъэзыуцухьэрэ дунаим тыфэсакъыным иамал ащ къытыщт, — къыIуагъ КъумпIыл Мурат.

Адыгэ Республикэм и ЛIышъхьэ муниципалитетхэм япащэ­хэм зэIукIэгъоу адыриIагъэм пшъэрылъ щафишIыгъ псэупIэ­-коммунальнэ хъызмэтым ипредприятиехэм ягъусэхэу шIы­хьаф­хэм язэхэщэнкIэ ищыкIэгъэ амалхэр зэрахьанхэу, Iофэу агъэцэкIэщтхэр организациехэм афагъэнэфэнэу, пшъэдэ­кIы­жьэу ыхьырэмкIэ гъунэпкъэ гъэнэфагъэ зиIэ обществэу «Эко­центрэм» игъусэхэу хэкIхэр аугъоинэу ыкIи Iуащынэу.