Iашэхэр зытыхэрэм ахъщэ къаратыщт
Росгвардием и ГъэIорышIапIэу Адыгэ Республикэм щыIэм къызэритыгъэмкIэ, 2023-рэ илъэсым гъэтхапэм и 7-м Адыгэ Республикэм иминистрэхэм я Кабинет N 44-р зытет унашъо ыштагъ — «Хабзэу щыIэм диштэу регистрацие ашIыгъэ Iашэ зиIэхэм ежьхэм яшIоигъоныгъэкIэ ар зэратырэм пае ахъщэ кIэгъэгушIунэу къаратыщтым фэгъэхьыгъ» зыфиIорэр. Ахъщэу къаратыщтыр зыфэдизыр а унашъомкIэ аухэсыгъ.
ГъэIорышIапIэм иIофышIэхэм республикэм щыпсэурэ пстэуми закъыфагъазэ бзэджэшIагъэ, хабзэм пэшIуекIорэ мыхъо-мышIагъэхэр зэрамыхьанхэм пае Iашэ зиIэхэм ежьхэм яшIоигъоныгъэкIэ ар тыгъэным фытегъэпсыхьэгъэ программэм чанэу къыхэлэжьэнхэу.
Хабзэу щыIэм тетэу регистрацие ашIыгъэ Iашэр атыным пае Росгвардием и ГъэIорышIапIэу Адыгэ Республикэм щыIэм лицензиехэм ыкIи Iизыным япхыгъэ IофшIэныр гъэцэкIэгъэнымкIэ иподразделениехэм яофисхэм зафагъэзэн алъэкIыщт. Республикэм ирайон пстэуми ащ фэдэ офисхэр арытых.