ПэшIорыгъэшъ ушэтынхэр рагъэжьагъэх
Непэ Урысыем пэшIорыгъэшъ зыкI къэралыгъо ушэтынхэр щаублагъэх. Гъэтхапэм и 20-м къыщегъэжьагъэу мэлылъфэгъум и 19-м нэс ахэр кIощтых.
УрысыемкIэ ахэр нэбгырэ мин 18,3-мэ атынхэу агъэнафэ. Ахэм ащыщэу нэбгырэ мин 15-р блэкIыгъэ илъэсхэм еджапIэр къэзыухыгъэх. Апэрэ мафэм географиемрэ литературэмрэкIэ заушэтыгъ, гъэтхапэм и 23-м урысыбзэмкIэ, и 27-м хьисапымкIэ, и 30-м биологиемкIэ, физикэмкIэ заушэтыщт ыкIи IэкIыб къэралыгъуабзэхэмкIэ тхэн IофшIэныр агъэцэкIэщт. Мэлылъфэгъум и 3-м IэкIыб къэралыгъуабзэхэмкIэ ятIонэрэ уцугъор (жэрыIо едзыгъор) зэхащэщт, мэлылъфэгъум и 6-м обществознаниемкIэ ыкIи информатикэмкIэ, и 10-м тарихъымрэ химиемрэкIэ заушэтыщт.
Мэлылъфэгъум и 12-м къыщегъэжьагъэу и 19-м нэс пэшIорыгъэшъ зыкI къэралыгъо ушэтынхэм ярезервнэ мафэхэу агъэнэфагъэх.
УрысыемкIэ пэшIорыгъэшъ ушэтынхэр анахьыбэм урысыбзэмкIэ атынэу агъэнафэ, профильнэ хьисапымкIэ нэбгырэ мини 5,8-мэ, обществознаниемкIэ мини 5,5-мэ заушэтыщт. Базово хьисапыр нэбгырэ 800-мэ атыщт, нэмыкI предметхэр нахь макIэу къыхахыгъэх. ЗэкIэмкIи ушэтынхэр пункт 307-мэ ащыкIощтых.
Адыгеир пштэмэ, къэралыгъо аттестационнэ къулыкъум къызэрэщытаIуагъэмкIэ, республикэмкIэ, пэшIорыгъэшъэу ушэтынхэр нэбгырэ 14-мэ атыщтых, ащ щыщэу 12-р блэкIыгъэ илъэсхэм къэзыухыгъэх. Зы нэбгырэм мы илъэсым къеухы, ащ IэкIыбым еджэным щыпидзэн мурад иI, зы нэбгырэм гурыт сэнэхьат зэригъэгъотыгъэу апшъэрэ еджапIэм чIэхьажьы шIоигъу.
РеспубликэмкIэ апэрэ ушэтыныр гъэтхапэм и 23-м аублэщт, ащ нэбгыри 4 къекIолIэнэу агъэнафэ. Предмет заулэкIэ зызыушэтыщтхэри мыхэм ахэтых. ЗэкIэмкIи мэфитфым къыкIоцI ушэтынхэр кIощтых. Ахэр гурыт еджапIэу N 11-м щызэхащэщтых. ЕджапIэр зэрифэшъуашэу агъэхьазырыгъ, джащ фэдэу АР-м хэгъэгу кIоцI IофхэмкIэ и Министерствэ, АР-м псауныгъэр къэухъумэгъэнымкIэ и Министерствэ зэзэгъыныгъэ адашIыгъэу ялIыкIохэр ушэтынхэм ащыIэщтых, щынэгъончъэным, кIэлэеджакIохэм япсауныгъэ алъыплъэщтых.
Мыгъэ ушэтын тыгъо шъхьаIэхэр жъоныгъуакIэм и 26-м къыщегъэжьагъэу мэкъуогъум и 20-м нэс кIощтых. Ащ нэмыкIэу ушэтынхэр етIани мэкъуогъум и 20-м къыщегъэжьагъэу бэдзэогъум и 1-м нэс атынхэ алъэкIыщт.
ДЕЛЭКЪО Анет.