ЦIыфмэ япсауныгъэ изытет фэгъэхьыгъэ хэшыпыкIыгъэ уплъэ­кIунхэу 2022-рэ илъэсым рагъэкIокIыгъэхэм къагъэлъэгъуагъ щыгъур къызэбэкIырэ шхыныгъохэр Адыгеим щыпсэухэрэм азыплIанэм зэрякIасэр. Адыгеястатым къызэритыгъэмкIэ, илъэс 15-м къыщегъэжьагъэу ыкIи нахьыжъхэр ары ауплъэкIугъэхэр.

Шхыныгъом ищыугъэ амыуплъэкIоу щыгъу хэзытэкъожьырэр проценти 2,1-рэ мэхъух, процент 23,2-мэ арэущтэу ренэу ашIы, процент 36,7-мэ загъорэ щыгъур гъомылапхъэм хатэкъожьы, процент 25-мэ зэгъорэ дэдэу, процент 13-мэ зыкIи хатэкъо­жьырэп. Къыхэгъэщыгъэн фае гъэтхэ лъэхъанэу тызхэхьагъэм пкъышъо­лыр витаминмэ ащыкIэу зэрэригъажьэрэр, ар Роспотребнадзорым иIофышIэхэм къаIо шхыныгъо зэмылIэужыгъохэр цIыфмэ агъэфедэн зэрэфаер. Ащ фэшI гъатхэм зигъо хъурэ хэтэрыкIхэр нахьыбэу цIыфмэ ашхымэ нахьышIу.