ЯтIонэрэ лигэм хэт командэхэм блэкIыгъэ зыгъэпсэфыгъо мафэхэм яешIэгъухэр рагъэжьэжьыгъэх.

Я 19-рэ турым Мыекъопэ «Зэкъошныгъэр» Волгоград икомандэу «Роторым» IукIагъ. ЕшIэгъум зэкIэмкIи нэ­бгырэ 9870-рэ еплъыгъ.

«Ротор» (Волгоград) — «Зэкъошныгъ» (Мыекъуапэ) — 0:1 (0:1)

Бысымхэм текIоныгъэр къыдахыным фэшI алъэкI къагъэнагъэп, ау Адыгеим икомандэ нахь лъэшэу къычIэкIыгъ. Беслан Аджинджал зипэщэ тифутболистхэм амалэу аIэкIэлъыр къагъэлъэ­гъуагъ, къэлапчъэм бэрэ дэуагъэх, зыу­хъумэ­жьынри дэгъу дэдэу агъэцэкIагъ.

Я 26-рэ такъикъым «Ротор» икъэлапчъэ Iэгуаор дэзыдзагъэр Датхъужъ Адам. АщкIэ зишIогъэшхо къэкIуагъэр бэмышIэу командэм аштэгъэ Зезэрахь Артур.

— СызэрегупшысэрэмкIэ ешIэгъур зэкIэми агу рихьыгъ. КомандитIуми Iэгуаор къэлапчъэм дадзэн амал яIагъ, ау тэ ар къыддэхъугъ. ЗэIукIэгъум дэгъоу зызэрэфэдгъэхьазырыгъэм мы зэфэхьысыжьыр къыкIэлъыкIуагъэу сэлъытэ. АщкIэ сифутболистхэм зэкIэми сафэраз, — къыIуагъ Адыгеим икоман­дэ итренер шъхьаIэу Беслан Аджинджал.

«Ротор» зэрэтекIуагъэм ишIуагъэкIэ тикомандэ я 9-рэ чIыпIэм къэкIон ылъэ­кIыгъ, я 10-м щыт «Динамо» (Ставрополь).

Мыекъопэ «Зэкъошныгъэм» джыри дэкIыгъо ешIэгъуитIу иIэщт. Гъэтхапэм и 18-м IукIэщт «Биолог-Новокубанск» зыфиIорэм.