Гъэтхэ дзэ дэщыгъор къэблагъэ. Мыгъэ ащ ипIалъэ лъагъэкIотагъэп, зэрэхабзэу, мэлылъфэгъум и 1-м Урысыем щырагъэжьэщт ыкIи бэдзэогъум и 15-м нэс кIощт. Гъэтхэ дзэ дэщыгъом зэрэфэхьазырхэм, зэхъокIыныгъакIэу къыхэхьагъэхэм, нэмыкIхэм афэгъэхьыгъэу гущыIэгъу тыфэхъугъ Адыгэ Республикэм идзэ комиссарэу Александр Авериным.

Пшъэрылъ шъхьаIэр

— УФ-м зыкъэухъумэжьынымкIэ и Министерствэ аужырэ зэхэсыгъоу иIагъэм УIэшыгъэ КIуачIэхэм зэзэгъыныгъэ шIыкIэм тетэу къулыкъур ащызыхьыхэрэм ыкIи дзэ къулы­къур зыхьыщтхэм япчъагъэ хэгъэ­хъогъэн фаеу пшъэрылъ министрэм къыгъэуцугъ, — къы­Iуагъ комиссар шъхьаIэм.

Адыгеими пшъэрылъ къыфагъэуцугъ блэкIыгъэ илъэсхэм дащыщтыгъэ пчъагъэм фэди 1,7-кIэ нахьыбэ джы агъэкIонэу.

Мы гъэтхэ дзэ дэщыгъом къыхиубытэщтхэр къулыкъум къызэрэтыщтхэр зы илъэс.

Мэзэ 12-рэ къулыкъур зыхьыщтхэм яигъэкъун

Александр Авериным къызэриIуагъэмкIэ, мыгъэрэ гъэтхэ дзэ кампаниер бэкIэ нахь къэ­зыгъэхьылъагъэхэм ащыщ дащын фэе пчъагъэм зэрэхагъэ­хъуагъэр. ГущыIэм пае, блэкIыгъэ илъэсхэм нэбгырэ 600 фэ­диз ащэщтыгъэмэ, джы 900-м кIахьэу агъэкIон фае.

— Мы гъатхэ къулыкъур зыхьыщтхэм япчъагъэ зэрид­гъэкъущтым ихэкIыпIэхэм тягупшысагъ, — къеIуатэ респуб­ликэм икомиссар шъхьаIэ. — Ахэм зэу ащыщ зызгъэбылъы­хэрэм якъэгъотын. Сыдигъуи дзэ къулыкъум зыщызыдзыехэрэр щыIэх. Ащ фэдэу алъы­тэрэр повесткэ ратыгъэу комиссием е къулыкъум иещэжьэгъум къемыкIолIагъэр ары. Кон­ституцием къызэрэдыхэлъы­тагъэмкIэ, УФ-м игражданин пэпчъ хэгъэгум икъэухъумэн ипшъэрылъ. Дзэ комиссариатым иучет хэмыуцорэм ыкIи игъом хэмыкIыжьырэм административнэ е уголовнэ пшъэдэкIыжь рагъэхьы. НахьыбэрэмкIэ зэ­рэхъурэр тэ тиучет зыхамы­хыжьэу нэмыкI шъолъыр мэкIожьых. Джырэ уахътэм ахэм япчъагъэ нэбгырэ 200 фэдиз мэхъу. Ахэм тынаIэ нахь лъэшэу атедгъэтыщт, нэмыкI шъолъыр­хэми макъэ ядгъэIущт.

Гъэтхэ дзэ дэщыгъом къыхиубытэщт ныбжьыкIэхэм къулыкъур зыщахьыщт чIыпIэхэр джыри гъэнэфагъэу зэрэщымытым фэшI Александр Авериныр а лъэныкъом къатегущыIагъэп. Ау къыхигъэщыгъэр зы — зыщымырэхьат чIыпIэхэм ахэр ащэщтхэп ыкIи гъэтхэ дзэ дэщыгъор Украинэм щыкIорэ хэушъхьафыкIыгъэ дзэ операцием зыкIи епхыгъэп.

— Сицыхьэ телъэу къасIомэ сшIоигъор, мы ныбжьыкIэхэр хэушъхьафыкIыгъэ дзэ операциер зыщыкIорэм е зыщымырэхьат нэмыкI чIыпIэхэм ащэщтхэп. Анахь чыжьэу зыдащэнхэ алъэ­кIыщтыр Карелием игъунапкъэ нэс. Мыекъопэ батальоным къулыкъур щызыхьыхэрэм ащыщ­хэр Къырым игъунапкъэ къа­гъэгъунэнэу ащагъэх. Ау ахэр хыгъэхъунэм шIокIыхэрэп. УФ-м къыхэхьажьыгъэхэ Херсон ыкIи Запорожскэ хэкухэр, Донецкэ ыкIи Луганскэ народнэ респуб­ликэхэм къулыкъушIэ ныбжьыкIэхэр рагъа­хьэхэрэп, зэпэуцужьхэм ахэлажьэхэрэп. Ау сыдэу хъугъэми, тикъэралыгъо гощыгъэ мыхъуныр ыкIи ащ ищынэгъончъагъэ къэтыухъумэныр типшъэрылъ, — хигъэунэфыкIыгъ А. Авериным. Мы уахътэм гъэтхэ дзэ дэщыгъом къызэджэщтхэ нэбгырэ ми­нищым якъэбархэр зэрагъа­шIэх.

ЗэзэгъыныгъэкIэ дащыщтхэр

Мы купым хахьэхэрэм алъэ­ныкъокIэ федеральнэ гупчэм къафигъэуцугъэ пшъэрылъыр гъэцэкIэгъэныр къин дэдэщт. Мы илъэсыр екIыфэ къулыкъум ащэн фаер нэбгырэ мин 1,5-м ехъу. — АдыгеимкIэ мы пчъагъэр бэдэд ыкIи игъэкъугъуае хъущт, — къеIуатэ Александр Авериным. — ИкIыгъэ илъэсхэр пштэмэ, зэзэгъыныгъэм кIэтхэгъэ нэбгырэ 300 фэдиз ядгъэщэн тлъэкIыщтыгъ. Мы Iофым хэкIыпIэ закъоу иIэн ылъэкIыщтыр цIыфхэр зэнэцIын е федэ афэхъун ылъэкIыщт социальнэ ыкIи финанс амалхэр къэралыгъом къаритынхэр ары.

Къэралыгъо IэпыIэгъур

Республикэм идзэ комиссар шъхьаIэ къызэрэхигъэщыгъэмкIэ, къулыкъум ащэгъэ кIэлэ ныбжьыкIэм апэрэ мафэм къыщегъэжьагъэу къэралыгъор къызэрэфэгумэкIырэр зэхи­шIэным мэхьанэ иI. УIэшыгъэ КIуачIэхэм къу­лыкъу ащызыхьынэу кIуагъэхэр джыри угъоипIэ чIыпIэм щы­Iэхэзэ афашIэн фаер зэкIэ гъомылапхъэ­кIи, щыгъын­кIи, банковскэ картэхэм анэсыжьэу аIэ­кIагъахьэ. ЫпкIэ зыхэмылъ медицинэ IэпыIэгъур ыкIи Iэзэгъу уцхэр арагъэгъо­тых. Федеральнэ бюджетым имылъкукIэ дзэ къулыкъу­шIэм ипсауныгъэ ыкIи ищыIэныгъэ страховать ашIы. Къулыкъум епхыгъэ упчIэхэм афэ­гъэхьыгъэу ыпкIэ зыхэмылъ юридическэ IэпыIэгъу къэралыгъом аре­гъэгъоты.

Ахъщэ тынхэр

— КъулыкъушIэм иунагъо ахъщэ тынхэр раты, — къеIуа­тэ Александр Авериным. — Ащ сабый иIэу щытмэ, 2023-рэ илъэсым мэзаем къыщегъэжьагъэу мазэ къэс сомэ 15548-м ехъу фатIупщы. Готхагъэу ишъ­хьэ­гъусэ мэфи 180-м нахь мыма­кIэу лъэрымыхьэм зэтыгъо ахъщэ IэпыIэгъоу сомэ 36278-м ехъу раты.

Дзэ къулыкъур зыухэу къэ­кIожьыхэрэм IофшIапIэ IухьанхэмкIэ амалышIухэр яIэх. Дамыщыхэзэ аIыгъыгъэ IэнатIэм нахь мыцIыкIоу къэралыгъо организацием мэзищым къыкIоцI Iухьанэу фитыныгъэ яI.

Хьакъулахьыр ыкIи нэмыкI тынхэр

НыбжьыкIэр дзэ къулыкъум щэIэфэ ахъщэ тынэу къыратырэмкIэ, мылъку ыкIи чIыгу IахьымкIэ хьакъулахьыр рагъэтырэп.

Къэбарыр зэры­жъугъотэщтыр

УФ-м зыкъэухъумэжьынымкIэ и Министерствэ иофициальнэ сайт дзэ къулыкъум фэгъэхьыгъэ къэбарыр игъэкIотыгъэу ны-тыхэм ыкIи ныбжьыкIэхэм рагъотэщт. А нэкIубгъор едзыгъохэмкIэ зэтеутыгъ: «Контакты», «Призывникам», «Научные роты», «Служба по призыву».

Ащ нэмыкIэу Урысыем исубъект пэпчъ ащыIэ дзэ комиссариатхэм яофициальнэ нэкIуб­гъохэм къулыкъум епхыгъэ упчIэхэм яджэуапхэр арагъотэщтых.

АР-м идзэ комиссариат инэкIубгъо шъузэрихьащтыр: http://voenkom-ra.ru/ Мыекъопэ гарнизоным идзэ прокуратурэ ителефоныр: 8(8772)56-21-35.

Iэшъынэ Сусан.