Урысые Федерацием ыкIи Адыгэ Республикэм якъэралыгъо тынхэр къызфагъэшъошагъэхэм зыщаратыжьыгъэ мэфэкI зэхахьэ АР-м и Къэралыгъо филармоние щыкIуагъ. Сэнэхьат зэфэшъхьафхэм ялIыкIохэр, общественнэ IофшIэкIошхохэр ащ хэлэжьагъэх.

Адыгеим и ЛIышъхьэу КъумпIыл Мурат тынхэмкIэ къыхагъэщыгъэхэм шIу­фэс къарихызэ, лъэпкъ гухэлъэу ыкIи проектэу шъолъырым иэкономикэ игъэ­пытэн, цIыфхэм ящыIакIэ нахьышIу шIыгъэным афытегъэпсыхьагъэхэм япхы­рыщын ахэр зэрахэлажьэхэрэр къыкIигъэтхъыгъ.

— Нэбгырэ пэпчъ Iофэу зыфэ­гъэзагъэм гъэхъагъэу щишIырэмкIэ ежь ыпэкIэ ащ рылэжьагъэхэм яIоф лъегъэкIуатэ, республикэм хэхъоныгъэхэр ышIынхэм, ыпэкIэ лъыкIотэным иIахь хелъхьэ. Лъэныкъо зэфэ­шъхьафхэм Iоф ащышъошIэ, ау шъуисэнэхьат шъузэрэ­фэшъыпкъэмкIэ, Адыгеим, Урысыем щыIэкIэшIу арылъыным шъуфэлэжьэным шъу­зэрэпылъымкIэ пстэуми шъуа­къыхэщы, — къыIуагъ респуб­ликэм ипащэ.

КъумпIыл Мурат республикэм хэхъоным зиIахьышхо хэзылъхьэхэрэм зырызэу ацIэ къыриIуагъ. Ахэм ащыщхэр федеральнэ тынхэмкIэ къыхагъэщыгъэх. УФ-м и Президент иунашъокIэ Зэкъошныгъэм иорден къыфагъэшъошагъ АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъыз­мэтымкIэ иминистрэу Валерий Картамышевым.

Адыгэ шъолъыр общественнэ организациеу «АР-м имедицинэ иIофышIэхэм я Ассоциаций» зыфиIорэм ипащэу Валерий Ковалевым «За заслуги перед Отечеством» зыфиIорэ орденым имедалэу апэрэ шъуашэ зиIэр къыфагъэшъошагъ. КъумпIыл Мурат къызэрэхигъэщыгъэмкIэ, ар Мыекъопэ медицинэ колледжым зыщипэщэгъэ уахътэм гъэсэныгъэм исистемэ изегъэушъомбгъун, зиIофшIэн хэшIыкIышхо фызиIэ специалистхэр гъэхьазырыгъэнхэм иIахьышхо хилъхьагъ.

НэмыкI врачэу медицинэм игъэпытэн зиIахь мымакIэу хэзылъхьэхэрэми Адыгеим и ЛIышъхьэ ацIэ къыриIуагъ. Пандемием илъэхъан Iофышхоу ашIагъэм пай Крымскэ Лука ыцIэкIэ агъэнэфэгъэ медалымкIэ къыхагъэщыгъэх Шэуджэн район сымэджэщым иврачэу Дыхъу Марыет, Адыгэ респуб­ликэ кIэлэцIыкIу сымэджэщым иотделение ипащэу Юлия Корчагинар, Мыекъопэ къэлэ поликлиникэм иврач шъхьаIэ игуадзэу Кушъу Ларисэ, «УФ-м изаслуженнэ врач» зыфиIорэ цIэр къыфагъэшъошагъ мы сымэджэщ дэдэм иотделение ипащэу Бэгъ Альберт.

Джащ фэдэу УФ-м ФедерациехэмкIэ и Совет и Федеральнэ ЗэIукIэ и Тхьаматэ иунашъо­кIэ физкультурэм ыкIи спортым язегъэушъомбгъун иIахьышхоу хилъхьэрэм фэшI рэзэныгъэ тхылъ къыратыгъ Урысыем ихэ­шыпыкIыгъэ командэхэм ягъэ-­хьазырын фэгъэзэгъэ Гупчэм шъхьафит бэнэнымкIэ итренер шъхьаIэу Тембот Андзор.

Адыгэ Республикэм и ЛIышъхьэ иунашъокIэ «АР-м инароднэ сурэтышI» зыфиIорэ щытхъу­цIэр къыфагъэшъошагъ зэлъа­шIэрэ фольклористэу, искусствэхэмкIэ Адыгэ республикэ кIэлэцIыкIу еджапIэу Лъэцэрыкъо Кимэ ыцIэкIэ щытым икIэлэегъаджэу ГъукIэ Замудинэ. АР-м и Къэралыгъо филармоние исимфоническэ оркестрэ идирижер шъхьаIэу Аркадий Хуснияровыр «АР-м инароднэ артист» цIэмкIэ къыхагъэщыгъ.

Псалъэм ыуж КъумпIыл Мурат тынхэр къэзыушыхьатырэ тхылъхэмрэ бгъэхалъхьэхэмрэ аритыжьыгъэх. Культурэм, псауныгъэм икъэухъумэн, гъэсэныгъэм, социальнэ лъэныкъом, къэбарлъыгъэIэс амалхэм, юриспруденцием, промышленностым, мэкъумэщ ыкIи псэупIэ-коммунальнэ хъызмэтхэм, транспортым ащылажьэу мы мафэм агъэшIуагъэхэр нэбгырэ 41-рэ мэхъух.

Исэнэхьат фэшъыпкъэу, рес­публикэм ыкIи хэгъэгум хэ­- хъо-ныгъэхэр ягъэшIыгъэнхэм зи­Iахьышхо хэзылъхьэхэрэм Адыгеим осэ ин зэращыфашIырэр ЛIышъхьэм нэужым къыхигъэщыгъ. — ТапэкIи джыри зэшIотхын фаер макIэп, арышъ, шъощ фэдэу профессионализмагъэ зыхэлъэу, иIофшIэн шIу зылъэгъоу лажьэхэрэм тащэгугъы. Къэралы­гъом ипащэу Владимир Путиным къызэриIоу, «зыкIыныгъэр гъэхъа­гъэхэр тшIынхэмкIэ, текIоныгъэхэр къыдэтхынхэмкIэ анахь шъхьаI». Тызэгъусэмэ къин пстэури къызэрэзэпытчыщтым, дгъэнэфагъэхэр зэрэпхырытщыщтхэм сицыхьэ телъ, — къыIуагъ КъумпIыл Мурат.

Мы Iофтхьабзэм ыуж бзылъфыгъэхэм я Дунэе мафэ фэгъэ­хьыгъэ мэфэкI зэхахьэ Къэралыгъо филармонием щызэхащэгъагъ. Адыгэ Республикэм и ЛIышъхьэу КъумпIыл Муратрэ АР-м и Къэралыгъо Совет —Хасэм и Тхьаматэу Владимир Нарожнэмрэ тишъолъыр ис бзылъфыгъэхэм къафэгушIуа­гъэх.

АР-м и ЛIышъхьэ ипресс-къулыкъу.