Адыгэ Республикэм и Къэралыгъо филармоние къызэлъиубытырэ чIыпIэм изэтегъэпсыхьан лъагъэкIуатэ. — Непэ ащ сыщыIагъ, Iоф­шIэнхэр зэрэлъыкIуа­тэрэм зыщызгъэгъозагъ. Филармониер зычIэт унэм иинженер псэуалъэхэр зэблахъунхэу, чIыпIэр чэщырэ къэгъэнэфыгъэнымкIэ ищыкIагъэхэр агъэуцунхэу ыкIи чъыгхэм, къэгъагъэхэм псы акIэзыгъэ­хъощт системэр агъэ­псынэу псэолъэшIхэм пшъэ­рылъ яI, — къыщитхыгъ АР-м и ЛIышъхьэу КъумпIыл Мурат исоциальнэ нэкIубгъохэм ащыщ.

ЛIышъхьэм къызэрэхигъэщыгъэмкIэ, а зэпстэумэ адакIоу зыгъэпсэфыпIэ ыкIи культурнэ Iофтхьабзэхэр зыщызэхащэщтхэ чIыпIэм ищыкIагъэхэр агъэпсыщтых. Ащ пае тIысыпIэхэр, хъэренэхэр къызэгъэуцокIыгъэ зэIухыгъэу сценэ агъэуцущт. ЦIыфхэм къыщакIухьанэу гъогухэр иIэщтых, лъэпкъ нэшанэ зиIэ псэуалъэхэр ашIыщтых.

— Уц къашхъо къызщыкIыщт чIыпIэ иIэным анаIэ тырагъэтынэу, къэгъагъэхэр, кондэ дахэхэр бэу агъэтIысхьанхэу пшъэ­рылъ афэсшIыгъ. IофшIэнхэр гъэмафэм аухыщтых. Мыр къэлэдэсхэмрэ хьакIэхэмрэ къызэзыщалIэхэрэ зыгъэпсэфыпIэ чIыпIэ дахэ хъунэу тыфай, — къыхигъэщыгъ КъумпIыл Мурат.