Партиеу «Единэ Россием» ишъолъыр общественнэ приемнэу Адыгеим щыIэм плакатхэмкIэ зэнэкъокъоу зэхищэгъагъэм зэфэхьысыжьхэр фашIыгъэх. Хэгъэгум шIулъэгъоу фыряIэр къызыщыраIотыкIырэ плакатхэу «ZА своих» зыфиIорэр лъэныкъо зэфэшъхьафхэмкIэ гощыгъагъэ. Ахэр мыщ фэдагъэх: «IэкIыб фейкмэ апэуцужьырэ акъылыгъэ зыхэлъ мем», «ДзэкIолIхэм зэрадырагъаштэрэр къизыIотыкIырэ анахь плакат дэгъур», «IэкIыбым къикIырэ къэбархэм афэгъэхьыгъэ анахь плакат щхэныр». «Единэ Россием» ишъолъыр къутамэ къызэрэщыхагъэщыгъэмкIэ, тиреспубликэ щыпсэухэрэр чанэу зэнэкъокъум хэлэжьагъэх, тидзэкIолIхэм зэрягъусэхэр къызыщагъэлъэгъорэ плакати 100-м ехъу агъэхьазырыгъ.